شەوانە ژمارەیەك لە شێخ و موریدانی تەریقەتی نەقشبەندی لە خانەقای سیراجەدین لە دەربەندیخان كۆدەبنەوە، بەشێك ئەو كەسانەی لەو ئەڵقەی زیكرەدا بەشدارن لە شارەكانی تری هەرێمی كوردستان و عێراقەوە هاتون ، زۆرجار موریدانی ئەم تەریقەتە لە وڵاتانی دراوسێ و جیهانیشەوە سەردانی خانەقاكە دەكەن و بەشدار دەبن لە ئەڵقەی زیكر و حاڵی خانەقاكەدا.مەجید سەعید پێنجوێنی بڕوانامەی دكتۆرای هەیە و یەكێكە لە مامۆستایانی ئاینی شوێنكەوتووی تەریقەتی نەقشبەندی، ئەو كە لە كۆڕی ئەڵقەی زیكری خانەقاكەدا ئامادەیی هەیە گوتی: “شەوانە بە بەردەوام لە خانەقای حەزرەتی شێخی سیراجەدین لە دەربەندیخان بە سەرپەرشتی مامۆستا شێخ حسەین كە وەكیلی شێخ عوسمانی سیراجەدینە زیكر و یادی خودای تێدا دەكرێت لەسەر رێگای تەریقەتی نەقشبەندی، لە هەمووشار و شارۆچكەكان خانەقا و حوجرە و مەدرەسە هەیە و لەو شوێنانە سەدان فەقێ پێگەیشتوون و ئێستا لە مزگەوتەكان خزمەت دەكەن”.
ئەو گوتی: “مرۆڤ لە سیمایدا هەرچۆن بێت ئەوا خودای گەورە بۆ سیمای ناڕوانێت و سەیری ناخی دەكات، بۆیە ئەهلی تەسەوف ئەهلی تەزكییەیە”.مەجید سەعید پێنجوێنی هەروەها گوتی: “ئیستانبوڵ سەنتەر و شوێنی نیشتەجێبونی حەزرەتی شێخ عوسمان سیراجەدینە و ئارامگای ئەوە، ئەو شارە سەرەڕای ئەوەی سەنتەری خەلافەتی ئیسلامی بووە، ئارامگا و جێگا و شوێنی تەریقەتەكانە بەتایبەت تەریقەتی نەقشبەندی كە حەزرەتی شێخ عوسمانی سیراجەدین لەوێ دانیشتووە و مورید و شوێنكەوتوویەكی زۆری هەبووە و تائێستاش هەماهەنگیمان هەیە پێكەوە”. ئەو ئاماژەی بەوەش كرد، “لە هەموو شار و شارۆچكەكانی هەرێمی كوردستان و عێراق سەردانی ئەم خانەقایە دەكەن و بەبۆنەی ئامادەیی مامۆستا شێخ حسەینەوە، تەنانەت لە توركیا و ئێران و وڵاتانی ئەورووپاش میوانمان هەیە و شەوانە بە بەردەوامی زیكر و ئەوراد لەم خانەقایە هەیە و بەشداری تێدا دەكەن”.لە هەرێمی كوردستان ژمارەیەكی زۆری شوێنكەوتووانی تەریقەتی نەقشبەندی هەیە و لە شارو شارۆچكەكانی هەرێم خانەقا و كۆڕی زیكر و حاڵیان.
