خه‌بات: رەمزی میرەكانی
بەرە بەیانی دوێنێ شەمە، یارییەكانی پاڵەوانیەتی كۆپا ئەمریكا 2019، كە وەشانی ژمارە 46،لە وڵاتی بەرازیل دەستی پێ كرد، جاری پێنجەمە بەرازیل مێوانداریەتی ئەو پاڵەوانیەتییە دەكات، هەڵبژاردەی سامبا هەر چوار جاری پێشوو، نازناوەكەی بەدەستهێناوە، كە خۆی مێوانداریەتی كردووە.
❊ ژمارەی هەڵبژاردە بەشداربووەكان 12 هەڵبژاردە یە، 10 وڵاتی كیشوەرەكە، لەگەڵ دوو مێوان، قەتەڕ و ژاپۆن.
❊ یارییەكان لە 5 شار بەڕێوە دەچن كە ئەمانەن: سلڤادۆر، بیلۆ هۆریزۆنتی، ریۆدی جانیرۆ، ساوپاولۆ، پۆرتۆ ئەلیگری.
❊ هەڵبژاردەكان دابەش كراونەتە سەر سێ كۆمەڵە، بەم شێوەی لای خوارەوە:
یەكەم: بەرازیل، بۆلیڤیا، پیرۆ، ڤەنزوێلا
دووەم: ئەرژەنتین، كۆلۆمبیا، پاراگوای، قەتەڕ
سێیەم: چیلی، ئیكوادۆر، ئۆرۆگوای، ژاپۆن
یەكەم ودووەمی هەر سێ كۆمەڵە، راستەوخۆ بۆ قۆناغی داهاتوو سەردەكەون، لەگەڵ باشترین دوو سێیەم، بەمەش كۆی هەڵبژاردە سەركەوتووەكان دەبێتە 8 هەڵبژاردە. یەكلاییكردنەوەش لە رێگەی خاڵ، جیاوازی گۆڵ، گۆڵی تۆماركراو، رووبەڕووبوونەوەی راستەوخۆی دەبێت.
لۆگۆی پاڵەوانیەتییەكە كاپیبارا یان بەرازی ئاوە، كە ناوی زیزیتۆیە، هۆكارەكەشی بۆ رێزگرتن لە یاریزانی بەرازیلی زیزینیۆ دەگەڕێتەوە، كە بە تۆماركردنی 17 گۆڵ، بە هاوبەشی لەگەڵ یاریزانی ئەرجەنتینی، نۆربرتۆ میندێز، زۆرترین گۆڵیان لەو پاڵەوانیەتییەدا تۆمار كردووە.
*تەنیا 4 یاریزان لە مێژووی كۆپا ئەمریكادا، توانیویانە لەیەك یارییدا 5 گۆڵ تۆمار بكەن، ئەوانیش ئەمانەن: هیكتۆر سكارۆنی ئۆرۆگوای لە ساڵی 1926. مارفێزی ئەرجەنتین لە ساڵی 1941. خۆسێ مۆرینۆ ئەرژەنتین لە ساڵی 1942. ئیڤاریستۆ بەرازیل لە ساڵی1957.
*پاڵەوانانی كۆپا ئەمریكا:
ئۆرۆگوای 15 جار، ئەرژەنتین 14 جار، بەرازیل 8 جار، چیلی، پاراگوای و پیرۆ 2 جار، كۆلۆمبیا و بۆلیڤیا 1 جار.
>ئەو هەڵبژاردانەی زۆرترین جار گەیشتوونەتە یاری كۆتایی:
ئەرجەنتین 28 جار، ئۆرۆگوای 21 جار، بەرازیل 19 جار، پاراگوای 8 جار، چیلی 6 جار، پیرۆ، كۆلۆمبیا، بۆلیڤیا و مەكسیك 2 جار.
