كاروان محەمەد سینۆ
هەفتەی رابردوو 11ی6ی2019 نێچیرڤان بارزانی سەرۆكی هەرێمی كوردستان، بەپێی بڕگەی 12 لە ماددەی 10 لە یاسای سەرۆكایەتی هەرێمی كوردستان ژمارە 1ی ساڵی 2005ی هەموار كراو و پاڵپشت بە بڕیاری پەرلەمانی كوردستان ژمارە7ی ساڵی 2019ی دانیشتنی ئاسایی ژمارە 8 لە 11ی6ی 2019، بەرێز نێچیرڤان بارزانی یەكەم فەرمانی سەرۆكایەتی ئاراستەی بەرێز مەسرور بارزانی كرد و بەرێزیانی راسپارد وەك سەرۆكی ئەنجوومەنی وەزیران بۆ پێكهێنانی كابینەی وەزاری نۆیەمی حكوومەتی هەرێمی كوردستان، فەرمانەكە بەم شێوەی خوارەوە بوو:
1- راسپاردنی بەرێز مەسرور مەسعود مستەفا بارزانی وەك سەرۆكی ئەنجوومەنی وەزیران بۆ پێكهێنانی كابینەی وەزاری نۆیەمی حكوومەتی هەرێمی كوردستان.
2- دەبێ پێكهێنانی كابینەی وەزاری لەماوەی 30ڕۆژدا لە دەرچوونی ئەم فەرمانە تێپەڕ نەكات.
3- ئەم فەرمانە لە رۆژی دەرچوونیەوە جێبەجێ دەكرێت.
بۆیە بڕیارە ئەمڕۆ، بەرێز مەسرور بارزانی سەردانی هەریەكە لە یەكێتی نیشتیمانی كوردستان و بزووتنەوەی گۆڕان بكات لەشاری سلێمانی بۆ وەرگرتنی ناوی كاندیدانی هەردوو حزبەكە، بۆ وەزیرانی كابینەی نۆیەمی حكوومەتی كوردستان.
لێرەدا هەڵوەستە و پرسیار ئەوەیە. مەسرور بارزانی دەیتوانی لە هەولێر و لە ئۆفیسەكەی خۆی، لەرێگای نوسراو یاخود پەیوەندی كردن بە هەردوولایەن، یاخود لەڕێی نێردەی تایبەت ناوی كاندیدەكانی هەردوو لایەن وەرگرێ، بەڵام ئاخۆ بۆچی بەرێزیان بڕیاری داوە خۆی سەردانی هەردوو لایەن بكات بۆ وەرگرتنی ناوەكان؟!.
بێشك مەسرور بارزانی لەم هەنگاوەیدا، دوور لە مۆركی حزبی كە بەرێزیان ئەندامی مەكتەبی سیاسی پارتی دیموكراتی كوردستانە، دەخوازێ بەشێنەیی لاپەڕەیەكی سپی پاك و بێگەرد لەگەڵ لایەنەكان بكاتەوە وەك سەرۆكی حكوومەتی كوردستان و وێرای ئەوەش دەخوازێ لەم سەردانەیدا ناوی كاندیدەكان بۆ پۆستی وەزیر وەرگرێت، هەروەها مەسرور بارزانی كەناڵكی پەیوەندی تازە و راستەوخۆی حكوومەت لە گەڵ لایەنەكان دەكاتەوە. ئەمەش هەنگاوێكی ڕاست و دروست و نیاز پاك و دۆستانەیە كە مەسرور بارزانی دەستی پێكردووە. بۆیە هەموو خەڵكی كوردستان هیوادارن، ئەم سەردانەی مەسرور بارزانی بۆ سلێمانی مایەی خێر و هەماهەنگی و یەكریزی ناوماڵی كورد بێت و بۆ دیاری كردن و ڕاگەیاندیی ناوی وەزیرەكانی داهاتوو.
چونكە كاتەكە دیاریكراوە و ناكرێ سیاسەتی مەرج و گوشار و هەنجەت و كۆبوونەوە و كۆنفڕانس و كیتابونا و كیتابكم پەیرەو بكرێ لەپڕۆسەی پێك هێنانی حكوومەت و رێكەوتنی پێشەكیش هەیە لەسەر پۆستەكان. بۆیە دەبێ هەموولایەنێك ئەوە بزانێ كە بەرێز مەسرور بارزانی تەنها 30 رۆژی لەبەردەستدایە11ی تەمووز بۆ پێكهێنانی كابینەی نۆیەمی حكوومەت، ئەگینا پڕۆسەكە ئاراستەیەكی دیكە وەردەگرێت و مەسرور بارزانی ناچار دەبێت حكوومەتی زۆرینە پێك بهێنێت و ئۆباڵەكەش لە گەردنی ئەوانە دەبێت كە سازیار و یەكریز و هاوكار و هەماهەنگ نەبوون.
