خەبات: تریفە ئازاد
هەفتەی رابردوو لە رێورەسمێكی شایستەدا و بە ئامادە بوونی چەندین كەسایەتی سیاسی و خەباتگێر و دیپلۆماسی و وەزیر و سیاسەتمەداری ناوخۆ و بیانی، رێزدار نێچیرڤان بارزانی سەرۆكی هەڵبژێرداوی هەرێمی كوردستان سوێندی یاسایی خوارد. هەڵبەت نێچیرڤان بارزانی وەكو قوتابییەكی چالاك و دڵسۆزی رێبازی بارزانی و خەباتگێرێكی بە ئەزموون لە بواری سیاسەت و دەوڵەتداری و حوكمڕانیدا،لەتوانایدایە سەرۆكایەتی هەرێمی كوردستان بكاتە چەترێكی كۆكەرەوەی ناوماڵی كوردستان بۆ هەموو لایەنە سیاسییەكان و هەموو نەتەوە و ئایین و ئاینزاكانی كوردستان بۆ ئەوەی كوردستان بە دەستەجەمعی و ئاراستەیەكی هاوبەش بەهێزەوە بەرەو ئایندەیەكی گەش هەنگاوبنێت. هاووڵاتیان دڵنیایی خۆیان بۆ رۆژنامەی خەبات خستەڕوو، كە نێچیرڤان بارزانی سەرۆكی هەرێمی كوردستان لە چوارچێوەی دەستوری عێراقی فیدڕاڵ نەخشەرێگای شایستەی لەئەندێشەدایە بۆ چارەسەركردنی كێشە و ناكۆكییەكانی نێوان حكوومەتی ناوەند و هەرێمی كوردستان و پتەوكردنی پەیوەندیی نێوان كوردستان و وڵاتانی دراوسێ و جیهان، هەروەها خۆشگوزەرانی خەڵكی كوردستان هەوڵێكی دیكەی سەرۆكی هەرێمی كوردستان دەبێت. لەم رووەوە رۆژنامەی خەبات راوبۆچوونی هاووڵاتیان دەربارەی ڕۆڵ و تواناكانی نێچیرڤانی بارزانی بۆ خوێنەران دەخاتەروو.
هەمیشە پیاوی ڕۆژە سەختەكان بووە
لە سەرەتا سیروان تۆفیق لە بارەی ڕۆڵ و پێگەی داهاتووی ڕێزدار نێچیرڤان بارزانی وەك سەرۆكی هەرێمی كوردستان لە لێدوانێكی تایبەت بۆ ڕۆژنامەی خەبات گوتی: بێگومان نێچیرڤان بارزانی سەرۆكی هەرێمی كوردستان لە ڕابردوو بە پیاوە نەرمەكەی سیاسەت و دیدگا فراوان لە بەڕێوەبردنی وڵات و هەموو كات رۆڵی گەورەی هەبووە لە كۆكردنەوەی كوردستانیان لە دەوری مێزی گفتوگۆ و هەموو كات پیاوی رۆژە سەختەكان بووە بۆ هێوركردنەوەی گرژی و ناخۆشییەكانی كوردستان لە لایەك و هێوركردنەوەی بارودۆخ و ئاڵۆزی نێوان هەولێر و نەیارانی ، ئەوەی لە رۆژی سوێندخواردنی بەڕێزیان وەك سەرۆكی هەرێمی كوردستان بەدیكرا توانی تەواوی ڕەنگ و پێكهاتە و دەنگە جیاواز و دژ بەیەكەكان لە یەكتری نزیك بكاتەوە و ڕۆژی هەڵبژاردنی بەڕێزیان ببێتە ڕۆژی ئاشتەوایی سیاسی و كۆمەڵایەتی كوردستان و لایەنە سیاسییە ناوخۆیی و عێراقییەكان بە بۆچوونی من كاك نێچیرڤان دەتوانی ببێتە چەترێك بۆ كۆكردنەوەی تەواوی كوردستانیان و ببێتە مایەی سەقامگیری و زیاتر پێشكەوتنی كوردستان و خۆشگوزەرانی بۆ میللەتی كوردستان و پتەوكردنی پەیوەندییە سیاسییەكانی كوردستان و عێراق و وڵاتانی هەرێمایەتی و جیهان و هاونیشتمانیان چاوەڕوانیی گەورەیان لێی هەیە و ئومێدی زۆریان لەسەر بونیاد ناوە.
ڕۆڵ دەبینێ بۆ كۆدەنگی سەرجەم لایەنە كوردستانیەكان
سەفین كاوێس بەرپرسی ناوەندی باڵای دەشتی هەولێر: سەرەتا پیرۆزبایی خۆم ئاراستەی جەنابی كاك نێچیرڤان بارزانی دەكەم بەبۆنەی بوونی بە سەرۆكی هەرێمی كوردستان و هیوای سەركەوتنی بۆ دەخوازم، ئەوەی 10/6/2019ئەو رووداوە مێژوییەی لە هەولێری پایتەختی هەرێمی كوردستان كە مەراسیمی سوێندی خواردنی كاك نێچیرڤان بارزانی بوو بە ئامادەبوونی ڕابەر و پێشەوامان جەنابی سەرۆك بارزانی، سەلمێنەری ئەوەیە كە ڕۆڵی كاك نێچرڤان بارزانی رۆڵێكی گرینگ و یەكلاكەرەوەی باش دەبینێت بۆ خەڵكی كوردستان لە چوار ساڵی ئایندە،ئداەویش لەبەر هۆكاری ئەوەی كە رێزدار جەنابی كاك نێچیرڤان بارزانی كەسایەتییەكی دیار لە كوردستان و عێراق و جیهان و پێگەیەكی گرینگی هەیە لە ڕووی كومەڵایەتی سیاسی و دیبلۆماسی و لە هەمان كاتیشدا ئەزموونی ڕابردووی جەنابیان سەلمێنەری ئەوەیە ڕوڵێكی یەكجار ئیجابی دەبێت ،بۆ چارەسەركردنی كێشەكانی نێوان هەولێر و بەغدا بەپێی دەستوری هەمیشەیی عێراق،وە یەكڕێزی ناوخۆی هەرێم لەگەڵ سەرجەم لایەنە كوردستانییەكان كە ڕۆڵێكی بەرچاوی هەبووە و لە داهاتووشدا بە بایەخەوە ئەو ڕۆڵە دەبینێ بۆ كۆ دەنگیی سەرجەم لایەنەكان كوردستانییەكان، لەوەش دڵنیام ڕۆلی كاك نێچیرڤان بارزانی ئەم ئەركە پیرۆزە بەباشترین شێوە بەڕێوەدەبات، چونكە لە ژێر چەتری ڕابەرایەتیی سەرۆك بارزانی دەتوانین پێكەوە كوردستانێكی بەهێز بنیات بنێین و لە خزمەت بەرژەوەندییە باڵاكانی گەل و نیشتمان، تواناكان یەكبخەن و بەرەوپێشەوە هەنگاو بنێین.
هەنگاوەكانی دروستكردنی كوردستانێكی بەهێز چووە بواری جێبەجێكردن
هەرێم شوكر لە لێدوانێكی تایبەت بۆ ڕۆژنامەی خەبات گوتی: جێگای خۆشحاڵی هەموو كوردێكە كە نێچیرڤان بارزانی بووە سەرۆكی هەرێمی كوردستان كە بە ڕۆلە حەكیمانەكەی گەلی كوردی لە گەلێك قۆناغی سەخت ڕزگار كرد كە تووشمان هاتبوو و چونكە ئێمە دەبێت ئەوەمان لە بیر بێت هەمان دەسەڵاتی سەرۆك بارزانی هەیە كە لە ڕابردوو هەیبووە، بەدڵنیاییەوە جەنابیان درێژەپێدەری هەمان سیاسەتی سەرۆك بارزانی دەبن هەروەك چۆن لە ڕابردوو پاڵپشتێكی سەرسەختی بڕیارەكانی سەرۆك بارزانی بوە . لەهەمان كاتدا ئەوەی جێگای دڵخۆشییە بۆ تەواوی خەڵكی كوردستان ئەو ڕابردووە حوكمڕانیەیی كاك نێچیرڤانە كە لە چەندین وێستگەی جیا حكوومەت قەوارەی سیاسی هەرێمی كوردستانی پاراستووە تاوەكو لە كۆتاییدا گەیاندی بە كەناری ئارام ، ئەمە جگە لە لایەنی خزمەتگوزاری و خۆشگوزەرانی كە جێگا پەنجەی وەك خاوەنی سەرەكی لەسەرە . لەلایەكی تر دەتوانم لە ئێستاوە بڵێم هەنگاوەكانی دروستكردنی كوردستانێكی بەهێز چووە بواری جێبەجێكردن چونكە لەهەمان كاتدا بەرێز مەسرور بارزانی كاندیدی ڕاسپێردراوە بۆ سەرۆك وەزیرانی حكوومەتی داهاتوو بۆیە دەتوانم بلێم كوردستانێكی بەهێز بە هاوكاری كاك نێچیرڤان بارزانی ئەندازیاری ئاشتی و ئاوەدانی هەرێم و كاك مەسرور بارزانی پارێزەری ئارامی و ئاسایشی هەرێم لە ژێر چەتری جەنابی سەرۆك مسعود بارزانی پارێزەری شكۆ و سەروەری هەرێمی كوردستان . كاك نێچیرڤان دەتوانێت هەموو پەیوندییەكان لە ناوخۆ و لەگەڵ عێراق و لەبواری نێودەوڵەتی ڕێكبخاتەوە و بە سیستەمی بكات ، ئەمە جگە لەوەی كە دەتوانێت هەوێنی یەكریزی نێو ماڵی كورد بێت و دامەزراوەی سەرۆكایەتی هەرێم بكاتە چەتری كۆكەرەوەی سەرجەم حزبە سیاسییەكان و پێكهاتە جیاجیاكان و ئاین و ئاینزاكان.
لە پارێزەری ئاوەدانی بۆ پارێزەری سەربەخۆیی
دیدار ستار وەكو مامۆستایەك لە لێدوانێكی تایبەت بۆ ڕۆژنامەی خەبات گوتی: ڕوون و ئاشكرایە بەرێز نێچیرڤان بارزانی لە ساڵانی رابردوو دەورێكی باڵای هەبوو لەسەر ئاستی جیهان و ناوخۆش لە بونیادنانی كوردستانێكی دلگیر و دروستكردنی پەیوەندییەكی كاریگەر لەگەڵ هەموو چین و توێژەكان، بەرێز نێچیرڤان بارزانی بە پیاوی بەرەنگاربوونەوەی ڕۆژەسەختەكان ناسراوە، كەسێك بوو توانی كوردستان لە لێواری قەیرانێكی بەهێز بەرز بكاتەوە بۆ دۆخێكی باشتر ، بوون بە سەرۆكی هەرێم بەشێوەیەكی زۆر ئومێدی بۆ خەڵك گەراندەوە كە ئایندەیەكی ڕوونمان هەبێت چونكە ڕابردووی بەرێز نێچیرڤان بارزانی پڕە لە كاری چاك و پەیوەندیی كاریگەر لەسەر ئاستی هەرێم . بوونی متمانە لە جەنابی نێچیرڤان بارزانی لەداهاتوودا كوردستان بەرەو پێشكەوتنێكی تر دەبات. نێچیرڤان بارزانی واتا پیاوی رۆژە دژوارەكان، واتا پیاوی رۆژی بەرنگار بوونەوەی قەیرانەكان، واتا پیاوی دروستكردنی پەیوەندی نێوان دەوڵەتان، واتا نەرمی نواندن بۆ براكانی بۆ بەهێز كردنی كوردستان، كەسایەتی نێچیرڤان بارزانی بەهۆی ئەزموونی چەندین ساڵەی پێمان دەڵێ لە داهاتوو ژیانێكی ئارامتر بۆ كوردستان دەهێنێ، پێمان دەڵێ كوردستان لە هەموو بوارەكان پێشكەوتنێكی گەورە بەخۆی دبینێ. من وەك خودی خۆم بڕوای تەواوم بە لێهاتوویی جەنابیان هەیە، چونكە بە شێوەیەك ڕووبەرووی كێشە و گرفتەكان دەبێتەوە تا بن بڕكردنی لە ڕەگەوە .هیوای سەركەوتنی بۆ دەخوازم ئومێدەوارم زیاتر لە ئێستا كاری چاكتر بكات تایبەت رێگا خۆش بكات بۆ گەنجان تا ڕۆڵی سەرەكییان هەبێت لە پێشكەوتنی كوردستان.
