ساسان دەروێش – هۆڵەندا
ئەمڕۆ پێنجەشەممە 23 تا 26 ئایار 2019 پرۆسەی دەنگدان لە 28 وڵاتی ئەندام لە یەكێتیی ئەورووپا دەستپێدەكات بەوە هاووڵاتییان یەكێتییەكەش لە وڵاتانی خۆیان، بەرەو سندوقەكانی دەنگدان هەنگاو دەنێن بۆ هەڵبژاردنی بەربژێرەكانی لیستی پارت و قەوارە سیاسییەكانی نێو وڵاتەكانیان بۆ مسۆگەركردنی زۆرینەی كورسییەكان، لە كۆی 751 كورس ئەو یەكێتییە.
ئەمەش لە پێناو پتەوكردن و مانەوەی یەكێتیی ئەورووپای یەكگرتوو كە سنووری لە نێوانیاندا نەهێشتووەتەوە و هەوڵی دەوڵەمەندكردنی كایەكانی ژیانیان دەدات، وێڕای ژینگەیەكی خاوێن و كەشوهەوایەكی دیموكراسی و ئارام و ئاسایش، كە تێیدا بژین، ئەوەی لێرەدا مەبەستە باسی لێوە بكەم، رەوەندی كوردستانییە كە بە لەشكرێك مەزەندە دەكرێن لەناو دەوڵەتانی سەر بە یەكێتیی ئەوروپا، كە زۆرینەیان خاوەنی ڕەگەزنامەی وڵاتانن و بەم پێیەش مافی دەنگدان و خۆپاڵاوتنیان هەیە لە پرۆسەكانی دەنگدان و بڕیاردان لە چارەنووسی ئەو وڵاتەی تێیدا نیشتەجێن، بەداخەوە رەوەندی كوردستانیان تا ئێستا لە قورسایی دەنگ و بوون خۆیان تێنەگەیشتوون كە بە یەكگرتوویی و دەنگدان لە پڕۆسەكانی شارەوانییەكان و پەرلەمانەكان و پەرلەمانی یەكێتیی ئەورووپا چی بەدەست دەهێنن تا چەند سوودمەند دەبن لەو هێزە شاراوەیەی كورد كە هەیەتی لە تاراوگەدا، كە گەورەترین سەرمایەیە بۆ ئایندە و ئێستای كوردستان.
ئەگەر هەریەكەمان بە ویژدانەوە وەك وەفایەك بۆ كوردستان كە هەریەكمان لە سەری لە دایكبووین و ژیاوین، ئینتیمای نەتەوەییمان بۆ خاك و گەلەكەمان دووپاتدەكەینەوە و بەڵێن دەدەین بە یەكگرتوویی، كوردستان بپارێزین، ئەمەش بەوەی هەریەكەمان خۆمان بە خاوەنی هەموو دەنگەكانمان بزانین و بە سوودی كوردستان بەكاریان بهێنین، ئەگەر تاكو ئێستاش دەنگەكانمان یەكنەبوون، بەهۆی ڕەنگدانەوەی ڕەنگەكانی پارتەكان و جیاوازییەكانی ئایدیاكانمان و لە یەك دووركەوتنەوەمان لە یەكتر لە پێناوی كوردستانێكی بەهێز و هەنگاونان بۆ ئامانجە پیرۆزەكانمان لە سەربەخۆیی كوردستان با بە رۆحیەتی كوردایەتی و بیرهێنانەوەی یەكەم رۆژی ڕاپەڕینی بەهاری ساڵی 1991 كە هەموومان پێكەوە یەكترمان دەپاراست و دەستماندایە چەك و دار و بەرد لە دژی رژێمی دیكتاتۆری بەعس و سەرئەنجام رووخاندمان، ئەو رژێمە كە زیاتر لە 30 ساڵ هەموومانی چەوساندەوە و كوشتوبڕ كورد دەكرد، با لاپەڕەیەكی تری زێڕین لە مێژووی كوردایەتیمان بنووسینەوە.
ئەم جارەیان لە تاراوگەوە دەست بخەینە نێو دەستی یەكتر و بەرەو سندوقەكانی دەنگدان هەنگاو بنێین بۆ قازانجی كوردستان و ئاشتبوونەوەی گشتی و كۆكردنەوەمان لە یەك رێكخراوی كوردایەتیدا و لەمەولاش ئەم ئەركە دەخەینە ئەستۆی حكوومەتی هەرێمی كوردستان كە بیر لە فاكتەرێك بكاتەوە، پێشوەختە كار بۆ ئەم پڕۆسانەی دەنگدان بكات و هاوكار بێت لەگەل بەربژێرە كوردەكان بە كۆكراوەیی نەك ئەو پەرتەوازەییە هەبووە و هەریەكە و بە ئاوازێك دەخوێنێت و سەرئەنجام سەركەوتوو نابێت و دەنگی مسۆگەر وەرناگرێت لە هاوزمانەكانی خۆیان، ئێمەی كورد سوپایەك كوڕ و كچی گەنج و خاوەن بڕوانامەمان هەیە كە لەنێو پارت و قەوارە سیاسییەكانی وڵاتان ئەندامی چالاكن و بەرەوپێش هەنگاو دەنێن، بۆیە لەم بوارەشدا دەبێت حكوومەتی هەرێمی كوردستان هاوكار بێت و گەشە بەم پرۆسەیە بدەین بۆ زیاتر هاندانی گەنجەكانمان لە كوڕان و كچان، بەمەش زیاتر لەنێو ناوەندەكانی دەسەڵاتدا دەنگمان دەبێت.
ئەو دەنگانە چەند گرنگ و كاریگەریان هەیە لە بچووكترین گۆڕانكارییەكانی یاساكان و دەنگدانی بە كۆمەڵ بۆ بەلاداخستنی كێشەی رووداوەكان كە هەریەكەمان لە دەنگی كۆكراوەكان سەنگی سیاسی و كاریگەری هەیە و بە هیوام هەموو رەوەندی كوردستانیان لە وڵاتانی جیاجیای یەكێتیی ئەورووپا بە رۆحی كوردایەتییەوە بچن بۆ سەر سندوقی دەنگدان و دەنگ بە پارت و كەسایەتی و بەربژێرە كوردەكان و دۆستەكانمان بدەین كە باڵیۆزی كوردبوون بۆ دەنگهەڵبڕین بۆ داكۆكیكردن لە مافەكانی كورد، ئەگەربێت و دەنگ نەدەین و خەمسارد بین ڕەنگە كاریگەری لەسەر تۆ نەبێت بە سانایی، بەڵام كاریگەری لەسەر كوردستان و كەسوكار و دۆستەكانت دەبێت یاخود لە داهاتوودا رێژەی ڕاستڕەوەكانی دژ بە بیانی زیاد بن، دەكەونە لقكردنی ژیانت لە تاراوگە، بۆیە ئەگەر ئەم ئەركە نیشتمانی و نەتەوەییە جێبەجێ نەكەیت، چۆن بتوانین لۆبی كورد دروستبكەین و كوردستانێكی بەهێز بپارێزین!
