خه‌بات: رەمزی میرەكانی
كۆمینتاری گەنجی شاری هەولێر، عەبدولسەمەد عەبدولستار، كە بە عەبدولسەمەد خۆشناو ناسراوە، توانی پلەی یەكەم لە پێشبڕكێی كۆمێنتاران لە كەنالی بی ئێن سپۆرت بەدەست بێنێت، كە لە میانی بەرنامەی ئەلۆ بین دەنگی بۆ دەدرا. ئەمەو بێجگە لە عەبدولسەمەد، كۆمینتارێكی دیكەی كوردیش گەیشتە قۆناغی كۆتایی، ئەویش كۆمێنتار، هێژا ئیسماعیل، بوو لە شاری دهۆكدا. مایەی دڵخۆشییە، كە دوو لاوی كورد بتوانن لە كەناڵێكی عەرەبی وا گەورە بگەنە قۆناغی كۆتایی، هەرچەندە ئەوان عەرەب نین و زمانی دایكیشیان كوردییە. سێ كەس گەیشتنە قۆناغی كۆتایی، كە بەدەنگدانی خەڵك بوو، لەوانە دووانیان كوردی خەڵكی باشووری كوردستان شارەكانی هەولێر و دهۆك بوون. لە دەنگدانی كۆتاییدا، هێژا پلەی سێیەمی بەدەستهێنا، بەشداربووەكەی دیكە، كە ناوی مەڕوان و خەڵكی وڵاتی میسڕ بوو، پلەی دووەمی بەدەستهێنا، پلەی یەكەمیش بەر، عەبدولسەمەد خۆشناو كەوت، كە توانی زیاتر لە %32 دەنگەكان بەدەست بێنێت. عەبدولسەمەد،دوای هاتنی بە پلەی یەكەم، دڵخۆشی خۆی بەو سەركەوتنە دەربڕی و سوپاسی ئەوانەی كرد، كە یارمەتیان داوە، یان دەنگیان بۆی داوە.
شیاوی باسكردنە براوەی ئەو بەرنامەیە، كە عەبدولسەمەد خۆشناوە، دەبێتە كۆمێنتاری یاری كۆتایی خولی یانە پاڵەوانەكانی ئەوروپا، كە بڕیارە لە رێكەوتی 1 ی حوزەیرانی داهاتوو، لەسەر یاریگەی واندا میترۆ پۆلیتانۆ، یاریگەی تایبەتی یانەی ئەتلەتیكۆ مەدرید، لە مەدریدی پایتەختی ئیسپانیا، لەنێوان یانەكانی لیڤەرپوول و تۆتنهام بەڕێوە بچێت، دووریش نییە كەناڵی بی ئێن سپۆرت، گرێبەست لەگەڵ ئەو كۆمێنتارە كوردە بكات و بە یەكجاری ببێتە كۆمێنتاری ئەو كەناڵە زەبەلاحە، هاوشانی كۆمێنتارە بەناوبانگەكانی كەناڵەكە، عیسام شەوالی، رەئووف خلێف، یوسف سەیف، عەلی محەمەد عەلی، خەلیل بلوشی، حەفیز دەراجی، سیوار زەهەب و ئەوانی دیكە. هیوای سەركەوتن بۆ كاكە عەبدولسەمەد، دەخوازین و هیوادارین لە كارەكەی سەركەوتوو بێت و سەری كورد و كوردستان بەرز بكاتەوە.
