خه‌بات: فاتیح بەرزنجی
رۆژی 1-5-2019 بەئامادەبوونی ڕێزدار نێچیرڤان بارزانی سەرۆكی حكومەتی هەرێمی كوردستان و جێگری سەرۆكی حكومەتی هەرێم و ژمارەیەك لە وەزیر و پەرلەمانتارانی كوردستان و عیراق و كونسوڵ و نوێنەری وڵاتانی بیانی و ژمارەیەك لە پزیشكانی پسپۆڕی بواری تەندروستی وڵاتان وپزیشكانی پسپۆڕی كوردستان و عێراق گەورەترین پێشانگای رۆژهەڵاتی ناوەڕاست لە بواری دەرمانسازی و پزیشكی و پزیشكی ددان لەپێشانگای نێودەوڵەتی لە هەولێر كرایەوە.
دوای بەسەركردنەوەی پێشانگایەكە لەلایەن سەرۆكی حكومەتی هەرێمی كوردستان دەست خۆشی لەكۆمپانیای ئێرا تاریق كرد بۆ ڕێكخستنی ئەو چالاكیەو هیوای خواست كە ئەو چالاكیە ببێتە دیدارێكی ساڵانەی بەرهەمدار لەسەر ئاستی ناوچەكەو جیهان و ڕاسپاردەو ئەنجامی باشی لێ بكەوێتەوەو هاوكار بێت بۆبرەودان بەكەرتی تەندروستی و پزیشكی و دووپاتی كردەوە، كە بنیاتنانی سیستەمێكی تەندروستی پێشكەوتوو كارێكی لە پێشینەی حكومەتی هەرێمی كوردستان بووە. دەربارەی گرنگی و بایەخی ئەو پێشانگایە وەك ڕۆژنامەی خەبات ئەو ڕاپۆرتەمان ئامادەكرد.
دەربارەی ئەو پێشانگایە عەبدوڵڵا ئەحمەد عەبدولڕەحیم سەرپەرشتیاری پێشانگای نێودەوڵەتی هەولێر گوتی: ئەو پێشانگایە لە ژێر ناونیشانی فارمی دێنتی پزیشكی ـیەو پێكدێت لەهەموو بەشەكانی پزیشكی وەك دەرمانسازی و پزیشكی گشتی و پزیشكی ددان و بریتییە لە كردنەوەی پێشانگاو كۆنفراسی پزیشكی و چەندین پەنەڵی گرنگی بوارە جیاجیاكانی پزیشكی لەخۆدەگرێت و چەندین كەسایەتی گەورەی پزیشكی لە دەرەوەو ناوەوەی عێراق و وڵاتانی عەرەبی و ئەوروپی بەشداریان تیادا كردووە. هەر لەو پێشانگایەدا چەندین كۆڕو سیمیناری پزیشكی ئەنجام دەدرێ سەبارەت بە دوایین پێشهاتەكان لە بواری پزیشكی و پێشانگاكە بۆ ماوەی چوار ڕۆژ بەردەوامبوو بەبەشداریكردنی 80 كۆمپانیا لە20 وڵاتی جیاواز و ڕۆژانە ژمارەیەكی یەكجار زۆر لە هاووڵاتیان سەردانی ئەو پیشانگایەیان كرد.
دواتر هەردی عومەر بەڕێوەبەری كارگێڕی پێشانگای نێو دەوڵەتی هەولێر دەربارەی پێشانگاكە ڕوونیكردەوە: لەو پێشانگایەدا چەندین پەنەڵی گرنگ لەلایەن كەسایەتی وڵاتانی ئەوروپیەوە پێشكەش دەكرا سەبارەت بە بوارەكانی پزیشكی و دوا پێشهاتەكانی بواری تەكنەلۆژیای پزیشكی و دوا پەرەسەندنەكانی تەندروستی و پزیشكی و تیایدا چەندین پزیشكی پسپۆڕ ئامادەی ئەو پەناڵانە دەبوون، دیارە وەزارەتی تەندروستی كوردستانیش ڕۆڵی باڵای دەگێڕاو تیایدا نوێنەری وەزارەتی تەندروستی ئامادەی كۆڕو سیمینارەكەیان دەكردو چەندین كۆمپانیای خۆماڵی هانی كۆمپانیا بیانیەكان دەدەن تا بێنە كوردستان وەبەرهێنان بكەن و لقی كۆمپانیا بیانیەكانیش لەكوردستان بكرێتەوە، لەماوەی 15 ساڵی ڕابردوو چەندین گەورە كۆمپانیای جیهانی بەشداریان لە پێشانگای نێو دەوڵەتی كوردستان كردووەو چەندین پڕۆژەی گەورەیان لە كوردستان ئەنجامداوە دیارە ئەوەش كاریگەری زۆری دەبێت لە بەرەو پێشەوە بردنی كەرتی بازرگانی و ئابووری لە كوردستان.
بەدرەدین ئەحمەد خاوەنی كۆمپانیای لۆك گوتی: ئامانجی ئێمە خزمەتكردنی هاووڵاتیانی كوردستانە لە بواری تەندروستی و مەبەستیشمان بوو ئەو كەلوپەلانەی كە هەمانە لەو پێشانگایەدا نیشانی بدەین جگە لەوەش هەوڵ دەدەین، كە پەیوەندیەكی پتەو لەگەڵ كۆمپانیاكانی دیكەی جیهانی پەیدا بكەین لە میانی بەشداری كردنمان لەو پێشانگایەدا ڕۆڵی كۆمپانیاكەی ئێمە لەبواری قەستەرەو نەشتەرگەری بوو خوازیاریشین پێشانگای زیاتری پزیشكی بكرێتەوە.
ئاری عوسمان قوتابی قۆناغی پێنجەمی كۆلیژی پزیشكی هەولێرو نوێنەری كۆمپانیای ئۆتۆسان گوتی: پێشانگای ئەمجارە زۆر گەورەترو فراوانتربوو لەبەرئەوەی چەندین گەورە كۆمپانیای وڵاتانی ئەوروپی بەشداریان لە پێشانگاكەدا كرد، كۆمپانیای ئۆتۆسان كۆمپانیایەكی ئیتاڵی براندە و كەلوپەلەكان زیاتر لە بواریENT ـیە، بۆیە بەشداریمان كرد چونكە كۆمپانیا گەورەكان بەشداریان كردبوو لە بوارە جیاجیاكانی پزیشكی و خەڵكێكی زۆر كەلوپەلەكانی ئێمەیان بەدڵ بوو. كاكل محەمەد یەكێك لەو كەسانەیە كە سەردانی ئەم پیشانگایەی كردووەو دەڵێت گوتی: كە سەردانی پیشانگایەكی لەوشێوەیە دەكەیت، هەست دەكەی كە پێویستە زیاتر گرنگی بە كەرتی تەندروستی بدرێت، چونكە بواری پزیشكی زۆر گرنگە و لە دوایین پێشهاتەكانی دونیای دەرەوە دەبین لە ڕووی دەرمان و چۆنیەتی چارەسەركردن و كەلوپەلە پزیشكییەكانەوە.
هەورەمان عەلی پیشەی دەرمانسازە و دەڵێت: بەڕاستی كردنەوەی پێشانگای تەندروستی گرنگی تایبەتی خۆی هەیەو تیایدا كۆمپانیای خۆماڵی زۆر سوود لە ئەزموونی كۆمپانیا گەورەكان وەردەگرێت كردنەووەی پێشانگای ئەمجارە بەلای كادیرانی بواری دەرمان زۆر بەسوود بوو، ئاشنایەتیمان لەگەڵ دەرمان و كەلوپەلی تازەی پزیشكی پەیداكرد و ئومێد دەكەین بەزووترین كات ئەو دەرمان و كەلوپەلە پزیشكییانە بگەنە وڵاتی ئێمە و نەخۆشی خۆمان چیتر پێویستی بە چوونە دەرەوەی وڵات نەبێت.
