شەنگە هاوار كاكەیی❊
تێكدانی لادێكانی كوردستان یەكێك بوو لەو كارە دزێوانەی كە رژێمی بەعسی فاشیست بەرقەراری كردبوو لە ناوچە كوردییەكاندا و گوزارشتی لە سیاسەتێكی بەزیو و بێ مۆڕاڵ و دۆڕاوخواز دەكرد و بە شكست پڕ لە رق و كینە بەرجەستە بوو، كە پڕ بوو لە زەبروزەنگ، دەرهەق بە نەسرەوتنی گەلی كورد لە سەرەتای ساڵی هەشتاكاندا كە زۆر بێبەزەییانە كەوتە تێكدانی كێڵگە سەوزەكانی ئەوینی كوردایەتی بە رووخاندنی گوندەكانی دەوروبەری شاری هەولێر.
هەڵبەتە ماڵی داپیرەم گوندنشینی بوون لە لادێیەك بە ناوی “مەترادی كوردی” و خانووی داپیرە گەورەم یەكێك بوو لەو خانووانەی كە بەر ئەو هێرشە پڕ چەرمەسەرییە كەوت، وەكو هەزاران ماڵە كوردی دیكە كە چارەنووس و موڵك و ماڵاتیان دەكەوتە ژێر مەرحەمەتی قەدەرێكی شووماویی لە سایەی حوكمی سیاسەتی تاكڕەوی بەعسی فاشیستدا. رەنگە دیمەنی وێرانەیی و خاپووربوون سەبارەت بە نەستی هەڤاڵێكی بارزانیی نەمر كە هەڵگری چەكی پێنووسە، ئاسان نەبووبێت، چونكە تێكڕای ژیانی تا ئەم چركەساتە لە باجی یەك رستەدا خۆی بە كڕنۆش داوە، ئەویانیش “بژی كورد بژی كوردستان” بووە. بەڵێ ئەو ماڵە گەورەمان كەوتە بەر شاڵاوی راگواستن و وێرانەیی و تەختكرا بە خاپووری هیچ شتێك نەما، تەنها یەك شت نەبێت، بنجی دارە گوڵەسوورەكەی ماڵی داپیرەم كە ناسرابوو بە گوڵەباغ، یاخود عەتر، گوڵێكی بە بەرامەت و ئێجگار بۆن خۆش بوو، ئەم دارە لە نەستی باوكمدا هەمیشە گەشبینییەك بوو كە نەماندەڕواند، زۆریش بێ خزمەت بوو، كەچی لە گەشە نەدەكەوت و سەوز دەبوو و هەمیشە باوكم تا سەفەری بۆ ویلایەتە یەكگرتووەكانی ئەمەریكا وەكو خێزان گەشتمان بۆ لای ئەو رەگوڕیشە بەهێزە بوو. جێگای كۆكردنەوەی ماڵە باوانمان بوون كە لە سێبەریدا یادەوەری مناڵی خۆم و ئامۆزاكانم تیایدا بەدی دەكرێن. رەنگە ئەم وردە باسەم بكەوێتە قاڵبی خودێتیی و تایبەتمەندییەوە كە دەربڕینی باسەكە تایبەتە بە باوكی ئازیزم، بەڵام هەر چەند ئەمەم كرد خۆم وەلا بگرم لە دەربڕیندا نەدەكرا و گوزارشتم ناكامڵ دەبوون، چوون لە چركەساتی ئێستامان زۆربەمان پەرۆشی رەگوڕیشەی ئەو شەجەریانەین كە پێی دەڵێن هێزی پۆلایینی نەسرەوتنی كوردیە كە رەوینەوەی ئومێد، بكەینە دیاری بۆ ئەو چینە یاخیەی ناو رێبازی مەردایەتی و ئەوانەی كەوتوونەتە ژێر كاریگەری و موئەسیراتێكی بریق و باقی ماددیەت و تەماحەوە و لە ماڵی گشتی یاخین، لەو رێگا پڕ شكۆیە هەنگاو نانێن بۆ بۆنكردنی بەرامەتی عەتری گوڵە سوورەكەی حەوشەی ماڵی داپیرەم، تەنها ئاڕاستەی چاویان زەنگی هۆشیان بۆ یەك دیوە كە ئەویش ژیانی شاهانەی بەشێك لە بەرپرسانە بێ ئاگا لەوەی قوتابخانەی بارزانی وەكو نموونەی هەر قوتابخانەیەك كۆتا ئەنجام گرنگە، كۆتا ئە نجام بەرقەرارە كە كۆشش و سەعی كردنەكانە و لە وادەیەكی نزیك كە كۆتایی ساڵ بەرامەتەكەی دەگاتە چنگی مستمان. لە هەمان كات مرۆڤ ئەگەر لە خانوویەكی رووخاودا ئەگەر یەك كەرپووچی بمێنێ لە بناغەیەكی مەتین و پوختە، ئەوە ئەو پنتە بچووكە دەبێتە رێگا خۆشكەر و تروسكاییەكی هیوا بۆ دروستبوونی بینایە و ماڵێكی تازە. جوانتر و پتەوتر لە جاران چونكە لە دروستبوونی دووەم كەڕەتدا كەرەستەی بیناسازییان تەژی دەبێت بە ئامرازی بەهێز لە زەنگی هۆشیاری و ئاگایی دروستبوونەوە خۆ ئەگەر چەند نەفس نزمێك رێگامانیان تەڵخاند بە گەندەڵی، ئەوە بەو واتایە نییە، ئەوانە سەری ڕمن و لە جەربەزی ویژدان لە رەهاییدا ئازادن. بۆیە دەبا بۆ رازاندنەوەی شوورا و پەروازی ئەو ماڵە كوردییە كە لە ئایندەیەكی نزیك بەرقەرار دەبێت بەرابەڕایەتی سەرۆك بارزانی گەشە بكا و بیڕازێنینەوە بە وێنەی شەهیدان و ئەنفالكراوەكانمان، زیندانیانی سیاسی، بە وێنەی ئەو هەڤاڵانەی بێ دەمامك و بێ ئارایشت لە گۆڕەپانی كوردایەتیدا لە خەباتن. رەنگە ئەم روانینە بكەوێتە قاڵبی ستایش و مەدح و سەنا كە ئەمەیانیش دروستە، بەڵام لە ئاست هەڵوێست نواندنیان زۆر كەمە كە هەڵگری وزەی بێگەردی و شەرافەتن، بۆیە خامەی پڕ بڕشت و جوانی دەبێ ئەو ساتەوەختانەی كە مەبەستی پێكاندنی باس لە دەربڕینە جوانەكانیان بكات كە لە تاراوگەدا دەینوێنن، پاش تەمەنێكی دوور و درێژی پەناهەندەیی لە ویلایەتە یەكگرتووەكانی ئەمەریكا، هەمیشە باوكم و سێ هەڤاڵی لە خەباتێكی بێگەردی بارزانیدا بەردەوامن. قورسە باسی باوكم بكەم بەبێ ریوایەتی كەڵەپچەی دەستی كە نووسی “بژی كورد بژی كوردستان” لە تافی لاوێتیدا لە رۆژی چەژنی نەورۆز لەسەر دیواری قوتابخانەی ئیمام قاسم لە شاری كەركووك خۆی و هاوەڵەكانی كەوتنە بەندیخانە و زیندان، رەفیقەكانی ئەوانەی لە ژێر ئەشكەنجەدان سەرزەنشت و جنێودان بەبارزانی ئازادكران، تەنها هەڤاڵ هاوار كاكەیی نەبێ ماوەی سێ ساڵ لە زیندان گیرسایەوە و بە كەڵەپچە و بەیاوەری پۆلیس و پیاوانی رژێم رووی كردە هۆڵی تاقیكردنەوەكان و یەكێك لەو چركە هێزانەی بۆ بنەماڵەمان تاجێكی پۆڵایینی باوەڕە تكانی خوێنی دەستە بەندكراوەكەی باوكمە لەسەر پەڕی كاغەزی سپیدا لە كاتی ئەنجامدانی تاقیكردنەوەكان. دڵخۆشیمان و شەنگی بێداریمان لە بزاڤی رزگاریخوازیدا بە گوڵەسوورەكەی حەوشەی ماڵەكەمان و پێنووسی باوكمانە كە لە بەرهەمی خۆڕاگرتن و یەك ئیرادەیی بە بەرامەت بوو بۆمان. ئێستاش بەو تەمەنە كڕنۆشی هەر بۆ پێشمەرگەیە، نە پلە و نە پایە و نەپۆست! تەنها ئامۆژگاری بۆمان بەردەوامبوونە لە رێبازی مەردایەتی دوور لە بەرژەوەندی و تەماح و بۆ دەستەبەربوونی ئاوات و تموحە مادییەكان كە لە بونیادی هەموو نەفسێكدا بوونی هەیە و بەدیدەكرین، ئامۆژگاری بۆمان لە دەرەوەی كۆشش بەو بونیاد دوور لە قۆرغكردنی دەسەڵاتە، ئەگەر بێت بپڕژێینە سەر كاریگەری قوتابخانەی شكۆی لەسەر كەسایەتی قوتابییەكانی لە پەناهەندەیی لە ویلایەتە یەكگرتووەكانی ئەمەریكا ئەوە دەبێت بە هەمان رێگا سەر نەسڵەمنینەوە هەر بگەڕێینەوە بۆ نەفەسی باوكم و ئەمجارەیان هاوەڵەكانی بەسەركەینەوە لە سێبەری هەمان حەوشەی جارانمان كە پڕە لە هێز و گڕوتین و بەرامەتی مەردایەتی گوڵی سووری وەفا بۆ خۆشەویستی بارزانی. خۆ پێنووس درك بەوە دەكات كە تەماح مرۆڤ زۆر بچووك ئەكاتەوە، بەڵام لە ئاست هەڤاڵی هێژا كاك حوسێن مەمەد زمانی لاڵە و كپە و ترسنۆكە، ئەگەر بتوانیت بەدەر لە راستی بدوێی پاش چل ساڵ پەناهەندەیی بەرپرسی لیژنەی (داكوتا) ئەگەر سەردانی ماڵە ساكارەكەی بكەیت بە دڵنەوایی ئاسوودە دەبی، وا دەزانی لە بارەگای بارزانی لە ناوچەی ناوپردانی لە ساڵی حەفتاكانی سەدەی رابردووی و تۆ لە پشوودانی پاش ماندووبوونێكی زۆر لە ژوورە زەردە بەرەو نەقەی دڵ روحت هۆگری ئارامی دەبێت. ئەم هەموو گڕوتینە دڵەخەماوییەكان هێور دەكاتەوە و بە موحیبەت و حەنین و لە دڵڕفێنی كە پاش ئەو هەموو تەمەنە هەڵگری پاسپۆرتی ئەمەریكی نییە و هەرگیز مامەڵاتی نەكردووە و هەوڵی بۆ نەداوە و نەیكردووە بە كۆشش و بە خەم، پێیوایە لەم نزیكانە پاسپۆرتی دەوڵەتی كوردستان دەخاتە باخەڵی، لەسەر پەیڤینی دڵی خۆی دەفەرموێت خۆ ئەگەر تەمەن رێگای نەدا ئەوە كوڕەكەی ئاری كە لە دایكێكی ئەمەریكییە بەو ئەركە هەڵدەستێت كە دڵ و دەروونی لە باوكی بۆ پارتی و بارزانی بەگڕ و بەتینترە. لە بۆنە و یادە حزبی فەرمی و نافەرمییەكانی ناوچەی (داكواتا) زەردپۆش دەكەن، بێ بەرامبەر و پرسین لە نەسریە بە یاوەری كوردانی تاراوگە و هەڤاڵانی بارزانیی نەمر. لە نێواندا هەڤاڵ و دەروێشی تەریقەتی بارزانیدا ئەستێرەیەكی گەشی كوردایەتی كە شایەنی ورووژاندنە لە هەمان ناوچە ناوچەی باكوور ئەویشیان هەڤاڵ ئەندازیار یاسین بەروارییە كە بیرەوەری دەدركێنم تا ئێستا هێز و عەتری گوڵەسوورەكەی حەوشەی داپیرەمی لێ دەبارێت ناكرێ ژیان بەزێو بێ بە یەك ئاڕاستە و روانین و یەك پێناسەی هەبێ كە دەگەڕێنەوە سەر باسی گرێی وەفا، هەڤاڵێكی بارزانی كە چەند دڵسۆزە و بە ئەمەكە، هەڵگری خەسڵەتی مەردایەتی و پیاوەتییە، یەكێك لە ئاكارە جوانەكانی رێچكەی نەتەوایەتییە كە تێكەڵ بە خوێنی بووە لای زاتیان یان كوردستان یان نەمانە.
هەروەها هەڤاڵی كۆڵنەدەر كاك قادر ئاوارە، كە خەڵكی شاری سلێمانی رۆڵێكی كوردپەروەرانەی بەرچاوی هەیە لە ویلایەتی سوفاڵسی ئەمەریكی، ماڵی هەمیشە بارەگای بارزانییە چونكە هاوەڵی بارزانیی نەمرە، خۆی و خانەوادەی بە هەمان رێڕەوی باوك ماڵە تایبەتییەكەیان قوتابخانەیەكی بچووكی كوردایەتییە دیارە لەو ویلایەتە كۆمەڵێك كارو چالاكی و وۆرك شۆپ بۆ ئەو موهاجیرانەی بە ئەنجام ئەگەیەندرێن و رۆژێكیان بۆ تەرخانكراوە بەو هۆیەوە كراوەتە پشوویێكی فەرمی، بەڵام رۆڵی كوڕە شێری سلێمانی هەڤاڵی پارتی و بارزانی بە هۆی پەیوەندییە پتەوەكانی كە بە قەد لۆبییەك كاریگەرن لە رێگای تەنسیق و كۆنێكتە شەخسییەكانی لەگەڵ سیناتۆری ویلایەتییەكەیان توانی بە هەوڵ و تەقەلایەكی زۆرەوە رۆژێكیش تایبەت بكات بۆ كورد و بیكەن بە پشوویەكی فەرمی ئەویش 21 مانگی ئادار كە دەكاتە رۆژی چەژنی نەورۆز. واتا هەموو نەورۆزێك لە ویلایەتی سوفالسی ئەمەریكی هاوچەشنی كوردستان پشووە.
دیارە بە گێڕانەوەی رۆڵی هەڤاڵانی بارزانی لە تاراوگە هەزار بە هەزارن، بەڵام نووسەر جەختی لەسەر لایەنێك لەو لایەنانە كردووەتەوە كە چۆن بە چاوی خۆی و بە نەستی خۆی دێڕ بە دێڕی ئەم راستییانەی بەدیكردوون و بە خیانەتی دەزانی، ئیزافەی یەك پیت، یەك حەرف كردبێت لە دەفتەری میسداقیەتی ئەم هەڤاڵانە، بۆیە لایەنی تەوژمی نەزۆكی بێ ئومێدی نەگەیشتووەتە ناخی نووسەر، كە دڵنیایە رێبازی قوربانیدان تژین لە كەڵە مێردان، بەڵام كە خۆشبەختین ئەو راستییانە خاك ڕابن لە مێرگی شیرینی باپیرانم و حەوشە بەرفراوانەكەی ماڵی داپیرەم بۆ ئەو بۆن و بەرامەتە رەسەنەی عەتری ئەوینی گۆڵی سووری كوردایەتییە كە هەرگیز رژێمی بەعس لە توانای نەبووە لە دەروونی دەروێشانی تەریقەتی بارزانی رایماڵێ، بۆیە كۆتا ئەنجام وێردی زمانی نووسەریش هەر بژی كورد، بژی كوردستانە.
❊ ماستەر لە یاسای گشتی.
