خه‌بات: سەرهەنگ نەجمەدین
پێرێ 12/4/2019 لە شاری هەولێری پایتەخت لەیانەی نێو دەوڵەتی ئەسپسواری هەولێر پاڵەوانیەتی ئەسپسواری بۆ كۆمەڵێك یاریزانی ناوخۆیی و عەربی و بیانی ئەنجام درا.
لەپاڵەوانیەتیەكە ژمارەیەكی زۆر بەشداریان تێدا كردبوو كەماوەی یەك رۆژی خایاند، سەبارەت بەوەڕگرتنی زانیاری لەبارەی ئەنجامدانی پاڵەوانیەتیەكە بەرێوەربەری یانەی ئەسپسواری نێودەوڵەتی هەولێر بەرێز خالید راشد بۆ خەبات ڕایگەیاند: ئەم پاڵەوانێتییە لەسێ گێم پێكهاتووە، بێگومان گێمی یەكەم بۆ بەشداربووانانی ناوخۆیی یە كە لەشەش ئەسپسواری پێكهاتووە، گێمی دووەم بۆ یاریزانە عەربەكانە كە لە8 ئەسپسواری پێكدێت، هەروەها گێمی سێیەم لەیاریزانە بیانیەكان پێكدێت كەتیایدا نۆ ئەسپسواری لەپێشبڕكێیەكەدا لەخۆی دەگرێت، ئەو ڕكابەرییە لەسەر ئەوەیە كەكام ئەسپ لەپێشبیڕكێیەكەدا خێراتر رادەكات و پێش هەمووان دەكەوێت، ئەو پاڵەوانیەتیەیش هەموو هەفتەیە واتە لەڕۆژانی هەینی بۆ بەشداربووانان ساز دەدەین.
هەر لەبارەی بەرنامەو پڵانی داهاتوویان بەرێوەبەری یانەی ئەسپسواری نێو دەوڵەتی هەولێر بەرێز خالید راشد بۆ ئەم مەبەستە گوتی: لەكۆتایی ئەم مانگە واتە بەرواری 26/4 پاڵەوانیەتی جامی نەورۆزی ساڵانە بۆ یاری ئەسپسواری ئەنجام دەدەین و تیایدا گرانبەهاترین خەڵات لەپاڵەوانیەتیەكەدا بەپاڵەوانی پێشبڕكێیەكە پێشكەش دەكرێت، بێگومان پاڵەوانیەتی جامی نەورۆزی ساڵانە جیاواز دەبێت بەباراورد لەگەڵ پاڵەوانیەتیەكانی دیكە، چونكە لەم پاڵەوانیەتیەدا رێژەیەكی زۆر لەسەر ئاستەكانی ناوخۆ و دەرەوە وڵات بەشداری تێدا دەكەن، بۆیە گرینگیەكی تەواو بەپاڵەوانیەتیەكە دەدەین بەهەوڵ وكۆششی هەموولایەكیش كار بۆ پێشخستنی پاڵەوانیەتیەكە دەكەین.
لەبارەی گرینگیدان و پێشخستنی یاری ئەسپسواری لەكوردستان بەگشتی ولەهەولێری پایتەخت بەتایبەتی بەرێز خالید راشد بۆ ئەم مەبەستەیش قسەی خۆی هەبوو ئەو بەوشێوەیە گوتی: بێگومان من لەم یانەیە وەك بەرێوەبەری گشتی كار دەكەم، بۆ زانیاریتان ئەم یانەیە لەدوو بەش پێكهاتووە واتە لەنێو یانەكە دوو پرۆژەی جیاوازمان هەیە ، پرۆژەی یەكەم بۆ پێشبڕكێی وكردنەوەی پاڵەوانیەتی یە ، پرۆژەی دووەمیش فێرگەی یاری ئەسپسواری یە ، واتە لەیەك كاتدا دوو پرۆژە لەم یانەیە جێبەجێ دەكرێت ، یەكێك بۆ بەرێوەچوونی پاڵەوانیەتی و ئەوەی دیكەیش بۆ فێركردن و كردنەوەی خولی فێربوون بۆ ئەوانەی كە هیچ شارەزاییان لەپێشبڕكیی و بەكارهێنانی ئەسپسواری نییە.
دواجار ئەو بەرێوەبەرە لەبارەی ژمارەی یانەكانی ئەسپسواری لەعێراق وكوردستاندا ناوبراو بۆ ئەم پرسەش گوتی: بێگومان یانە لەعێراقدا زۆرن ، بەڵام یانەی بەغدا لەباشترین و نایابترین یانە لەشاری بەغدا هەژمار دەكرێت، هەروەها لەكوردستاندا چوار یانەمان هەیە بەناو یانەكانی ئەسپسواری هەولێر ، كەتین ،سلیڤان ، ناوەندی مەم بۆ ئەسپسواری، ئەو چوار یانەیە بەفەرمی یاری و پێشبڕكێی ئەسپسواری ئەنجام دەدەن.
هەر لەدرێژەی ڕاپۆرتەكەدا سكرتێری یەكێتی ئەسپسواری كوردستان جەمال جامباز لەبارەی كردنەوەی پاڵەوانی ئەسپسواری جامی نەورۆزی ساڵانە بۆ خەبات گوتی: بەڵێ، بەنیازین لە26/4 پاڵەوانێتییەكی گەورە و بەشێوەی كراوە بۆ بەشداربووانانی یاریزانانی ناوەوەو دەرەوەی وڵات ساز بدەین، مەبەست لەكردنەوەی پاڵەوانیەتیەكە گرینگیدانە بەپێشبڕكێی ئەسپسواری لەكوردستان، هیوادارین رێژەی بەشداربووانان زۆر بێت تا پێشبڕكێیەكە خۆشتر وگەرمتر و ڕكابەرتر بێت.
یاریزانی ئەسپسواری یانەی هەولێر عەلی عەدای كەپلەی یەكەمی لەپێشبڕكێیەكە دەستەبەر كردبوو ناوبراو بۆ ئەم ئەنجامە بەرزە بۆ خەبات ڕایگەیاند: خۆشخاڵبووم لەم پاڵەوانیەتیەدا بەبەشداری چەندین یاریزانی ئاست بەرزی یانەكانی كوردستان و عێراق و دەرەوەی عێراق پلەی یەكەمم بەدەستهێنا، ئەو سەركەوتنە و ئەو ئەنجامە منی زیاتر هاندا بۆ ئەوەی ئامادەكاری تەواو بكەم بۆ پاڵەوانیەتی ئەسپسواری جامی نەورۆزی ساڵانە كەوابڕیارە لە26/4 لەهەولێری پایتەخت ئەنجام بدرێت، ئەو سەركەوتنەی ئەمڕۆ بەدەستم هێناوە پێشكەشی سەرجەم ئەندامانی یانەكەو و هاندەرانی خۆشەویست دەكەم كەلەهەموو پێشبڕكێیەكان ئامادە دەبن.
ئەنجامی پێشبڕكێیەكە بەمشێوەیە بوو:
گێمی یەكەم: بۆ ئەسپسواری ناوخۆیی بۆ ماوەی 1200 مەتر عەلی عەدای 44 خاڵ لەكێشی 55?5 پلەی یەكەم
عەلی محەمەد 40 خاڵ لەكێشی 58?5 پلەی دووەم، شاهۆ جودە46 خاڵ لەكێشی 60 پلەی سێیەم.
گێمی دووەم، بۆ ئەسپسواری عەرەبی بۆ ماوەی 1200 مەتر یاریزان عەمار عەبدولعال لەیانەی كەتین 46 خاڵ لەكێشی 62 پلەی یەكەم ، یاریزان عەلی فەتاح 42 خاڵ لەكێشی 61پلەی دووەم، شاهۆ جودە 28 خاڵ لەكێشی 57.5 پلەی سێیەم
