بەكر كەریم حەسەن
نوسەر و رۆژنامەنووسی میسری جەلال عامردەلێ” كشتوكال برسیەتی ناهێلێ، پیشەسازی پێداویستییەكان دابین دەكات، بەڵام پەروەردە و فێركردن نیشتمانێك دەچێنێ و دروستی دەكات “. كە نیشتمانێك چاندراوە دروست كراوە بێگومان مرۆڤەكانن نیشتمانەكەیان بنیاتناوە، بەڵام پێشتر مرۆڤەكان بنیات نراون لە رێگای پەروەردە و فێركردن، واتە كلیل و هەنگاوی یەكەمی بنیاتنانی مرۆڤ پەروەردە و فێركردنە. بۆیە گرنگە وە پێویستییەكی نیشتمانی و نەتەوایەتییە ئەوپەری گرنگی بە كۆی سیستەمی پەروەردە و فێركردن بدەین لە هەرێمی كوردستان بە جۆرێك سەرەتا پێویستە یەكەم لە پرۆگرامەكانی خوێندنی هەر سێ قۆناخی باخچەی منداڵان و قۆناخی بنەڕەتی و قۆناخی ئامادەیی دەست پێ بكەین، پرۆگرامێك لە هەر قۆناخێك تەواو كەر و درێژەپێدەری قۆناخەكانی پێش خۆی بێت، پرۆگرامێك بێت چۆن بتوانین مرۆڤی كوردستانی بنیات بنێین، بێگومان ئەوەش ئەركی راستەوخۆی وەزارەتی پەروەردە و بەرێوەبەرایەتی گشتی پرۆگرامەكانە، دەكرا چەند سالێك بەر لە ئێستا و ئێستاش درەنگ نییە پرۆگرامەكانمان گوزارشتیان بكردایە لە واقیعی ئەورۆی كوردستان و راهێنان و پەروەردە كردن و فێركردن و تێگەیاندنی رۆڵەكانمان لە سەر پڕەنسیپی بەها كۆمەڵایەتییەكان و كارامەییەكانی كۆمەڵایەتی و ژیان كە راستەوخۆ پەیوەندی تاك بە تاكی بە رۆڵەكانی كوردستان هەیە، جگە لەوەش ئەركی راستەوخۆی وەزارەتی پەروەردەیە كە سوود لەو جۆرە پرۆگرامانە وەربگرێ كە لە زۆربەی هەرە زۆری ووڵاتانی جیهان پەیڕەو دەكرێن چەندەها ساڵە.
بێگومان ئامانجی راستەوخۆی پێكاوە لە بنیاتنانی مرۆڤ هەر بۆ نموونە لە ووڵاتانی ژاپۆن و كۆریای باشور و سەنگاپورە و مالیزیا و ئیمارات و لوبنان و ئوردون و میسر و دەیەها ووڵاتانی تر ئەو جۆرە پرۆگرامانە دەخوێنن و ئەنجامیان هەبووە. گرنگە لە هەرێمی كوردستان نەخشە رێگا و ستراتیژیەتێكی روون و دیدگایەكی رۆشنی دوور مەودامان هەبێت پاڵپشت بە كۆمەلێ پڕەنسیپی راست و دروست و پتەو كە ئامانجی سەرەكیمان بنیاتنانی مرۆڤی كوردستانی بێت لە سەر كۆمەلێ بنەما و پڕەنسیپ لە پرۆگرامەكان و پەرتووكی قوتابیان لە سەرجەم قۆناخەكان رەنگ بداتەوە و قوتابیان پەروەردەی كۆمەلێ چەمك و ئادكاری جوان و پێویست بكات هەروەكو لە ووڵاتانەی باسمان كردن پەیڕەو دەكرێن، ئێمە لە هەرێمی كوردستان پێویستییەكی زۆر و بەردەواممان هەیە بۆ بنیاتنانی مرۆڤی كوردستانی لە هەموو روویەكەوە لە پێش هەموویان لەسەر خۆشەویستی بۆ خاك ونیشتمان فرچك بگرێ و متوو بێت و هەرگیز نەتوانێ دەستبەردار و سازشكاری بستێ لە خاكی نیشتمان بێت و لەگەڵ بەهێزبوونی بەها كۆمەڵایەتییەكان و فێربوونی كارامەییەكانی ژیان، چونكە بنیاتنانی مرۆڤ پێویستە ئەو پڕەنسیپ و بنەما نەگۆڕانە لە ناخی هەر تاكێك رەنگ بداتەوە و لەگەڵی گەشە بكات و گەورە بێت. جارێكی تر جەخت لە سەر ئەوە دەكەمەوە پێویستە وەزارەتی پەروەردە هەماهەنگی و پەیوەندی لەگەڵ ئەو وڵاتانە بێت كە پرۆگرامەكانیان ئاماژە و هێما و چەقی قورسایین بۆ بنیاتنانی مرۆڤ، بەردەوامیمان لەگەڵ ئەو ووڵاتانە هەبێت لەسەر زەوی لە قوتابخانەكانمان لە پرۆگرام و پەرتووكی قوتابییەكانمان رەنگدانەوەی پرۆگرامەكانی ئەو وڵاتە پێشكەوتووانە ببینن كە ئامانجیان بنیاتنانی مرۆڤە، تاوەكو ئێمەش بە ئەرك و بەرپرسیاریەتی خۆمان هەڵسین وەكو وەزارەتی پەروەردە لە بنیاتنانی مرۆڤی كوردستانە.
❊ بەرێوەبەری گشتی چاڵاكی وەرزش و هونەر.
