تەحسین سەلیم
ساڵێك بەر لە ئێستا لەڕۆژی 2/4/2018 هەواڵێكی خەمناكم پێگەیشت، ئەویش هەواڵی كۆچی دوایی هەڤاڵی زێدە خۆشەویست و دۆستی دێرینم كاك دلوڤان بارزانی بوو. لەگەڵ ئەوەی خەم و پەژارەیەكی لە ڕادەبەدەر بوو، بە هیچ شێوەێك بۆم نەدەكرا بڕوا بكەم كاكە دلۆڤان دوا ماڵئاوایی لێ كردووین و بۆ هەمیشە بەجێمان دێڵێ.
ئەمڕۆ ساڵێك بەسەر كۆچی دوایی ئەو مرۆڤە خۆشەویستەدا تێدەپەڕێ، لەماوەی یەك ساڵی ڕابردوودا تەنانەت بۆ یەك ڕۆژیش نەمتوانیوە یادی ئەو هەڤاڵ و هاوڕێ خۆشەویستەم نەكەم و هەست بە بۆشاییەكی گەورە نەكەم كە دڵسۆزو جوامێرە جێ ی هێشتووە. لە دوای نسكۆی ساڵی (1975) و ئاوارەبوونمان بۆ ئێران بە ماوەیەكی كەم كاك دلۆڤان بارزانی و ئەندامانی تری بنەماڵەكەیانم ناسی، دواتر بەهۆی خوێندن و ئەركی پارتایەتی لە نزیكەوە ئاشنایەتیم لەگەڵ خوالێـخۆشبوو و براكانی پەیدا كرد، لە سەروشیانەوە جەنابی كاك نێچیرڤان بارزانی. كاك دلۆڤان بارزانی كەسێكی مرۆڤ دۆست و میهرەبان بوو، وەكو داب و نەریت و رەوشت بەرزی بنەماڵەی بارزان، بە رێزەوە لە خەڵكی دەڕوانی، لە قسەكردن، زۆر هێمن و لەسەرخۆ بوو. لەگەڵ ئەوەش كە هاوتەمەن بوو لەگەڵ بەڕێز كاك نێچیرڤان بارزانی بەڵام هەر لە تەمەنی لاوێتییەوە وەكو براگەورە هەڵسوكەوتی لەگەڵ كاك نێچیرڤان بارزانی دەكردو بۆ هەموو كارێك پرس و ڕاوێژی پێ دەكرد. لە هەمان كاتیشدا بە چاوی ڕێزەوە سەیری براكانی تری دەكرد كە بە تەمەن لەخۆی بچوكتر بوون، هەموو ئەو هەڵسو كەوت و ڕەوشتبەرزییە لە قوتابخانەی بارزانیی نەمر سەرچاوەی گرتبوو، كە خوالێخۆشبووان كاك ئیدریس و نازدارخانی هاوسەری بەشێكی گرنگی ئەو قوتابخانەیە بوون.
خوالێخۆشبوو لە ناو دۆست و هەڤاڵانیدا كەسێكی خۆشەویست بوو، ڕێزی لە هەموو كەسێك دەگرت بەتایبەتی خاوەن خەبات و شۆڕشگێر و ماندووەكان، هەمیشە هەوڵی دەدا سەردانیان بكات، ئەگەر دەرفەتی ئەوەش نەبووایە لە ڕێگەی ترەوە هەواڵی دەپرسین. ئەو كەسانەی سەردانیان دەكرد بۆ هەر مەبەستێك بووایە بەتایبەتی بۆ هاوكاری، بەو پەڕی توانای خۆی هاوكاری دەكردن، ئەگەر لە دەرەوەی دەسەڵاتی خۆی بوایە بە سەرووی خۆی ڕادەگەیاندو پشتگیری دەكردن. خوالێخۆشبوو كەسێكی دڵسۆزو میهرەبان بوو، زۆر بە هێمنی قسەی دەكردو هەرگیز تووشی هەڵچوون نەدەبوو.هەمیشە پشتگیری كەسانی خاوەن مافی دەكردو لە ڕووی كۆمەڵاتیشەوە هەر كێشەیەكی دەخرایە بەردەم هەوڵی دەدا بە ڕێگای گونجاو و شایستە چارەسەری كێشەكە بدۆزێتەوەو هەردوو لایەنی بە تێگەیشتنێكی سەردەمیانە ئاشتدەكردەوە بۆ ئەوەی كێشەی نێوانیان بەتەواوی چارەسەر بكرێ، وە دوای چارەسەرەكردنی كێشەكە بە مەبەستی دڵنیابوون لە جێ بەجێ كركردنی، بەدواداچوونی كێشەكەی دەكرد. كەسێكی هونەر دۆست بوو بەتایبەتی لەگەڵ شیعرو هۆنراوەدا، دۆستایەتی لەگەڵ هەردوو هۆزانڤانی مەزن مامۆستا هەژار موكریانی و هێدی هەبوو، بەشێكی زۆر لە شیعری شاعێرانی ناوداری لەبەر بوو لەوانە شیعرەكانی مەلای جزیری و هێمن و هەژارو هێدی و بەشێكی زۆر شیعری فارسی. حەزو خولیای بۆ خوێندنەوەو كتێب زۆر بووە بایەخی زۆری بەم بووارە دەدا.
هەمیشە دۆست و هەڤاڵانی خۆی لەبیر بوو ئەگەر دەرفەتی لە نزیكەوە بینینیشیان نەبووایە لە ڕێگەی پەیوەندی تەلەفۆنی بەسەری دەكردنەوە. بەشداری پرسەو سەرەخۆشیەكان دەبوو، شێوەی بەشداربوونی لە پرسەو سەرەخۆشیەكان مایەی سەرنج بوو، زیاتر لە كاتی ئاسایی لە ناو كۆڕو پرسەی سەرەخۆشیەكان دەمایەوەو دەبووە مایەی دڵخۆشی خاوەن پرسە، هەست بەوە دەكرا كە كەسێكی پایە بەرزو دڵ فراوان بەشداری پرسەكەی كردووە. خاوەن هەڵوێست بوو لە كاتی گونجاودا هەڵوێستی ڕوونی دەردەبڕی. لەڕووی هەستی نەتەوایەتیەوە كەسێكی دڵسۆز بە گەل و نیشتیمانەكەی بوو. كە بڕیاری ئەنجامدانی كارێكی دەدا زۆر بە ووردی و بەرنامەبوون هەوڵی جێ بە جێ كردنی و بە ئامانج گەیاندنی دەدا. لە كۆتاییدا دەبێ ئەوە بڵێم. ئەگەر بمانەوێ لەسەر تەواوی لایەنەكانی ژیانی خوالێخۆشبوو بدوێین زۆر لەوە زیاتر كات و نووسین هەڵدەگرێ، مایەی شانازی و سەربەرزییە بۆ من كە ساڵانێكی زۆر لە خزمەتیان بووم و هیچ كاتێ ئامۆژگاری و بیرەوەریەكانم لەیاد ناچێ و وەكو هەمیشە ڕێبوارێكی ئەو ڕێبازە پیرۆزە دەبم كە ئەوانلەپێناویدا سەریان نایەوە.
درودو سڵاو دەنێرم بۆ گیانی پاكی بارزانی نەمرو كاك ئیدریسی هەردەم لە یاد، سڵاو لە ڕوحی پاكی ڕۆلەی جوانەمەرگ و خۆشەویستی بنەماڵەی بارزان كاك دلۆڤان بارزانی كە بە ڕاستی لە ساتە وەختێكی یەكجار زوو ماڵئاوایی لێكردین.
