خه‌بات: سەرهەنگ نەجمەدین
ئەمڕو كاروانی وەرزی ساڵی 2019ـی خولی نایابی كوردستان بەبەشداری 9 یانە لەسەرتاسەری كوردستان بەرێوەدەچێت، ئەمڕۆ دووشەممە لەشارۆچكەی دەربەندیخان لەیەكەمین یارییدا هەردوو تیپی باسكەی دەربەندیخان و باسكەی قەڵا لەیارییەكی بەهێز و جەماوەریدا بەیەك دەگەن، هەردوو یانەكە ئامادەكارییەكی تەواویان بۆ ئەنجامدانی ئەو یارییە كردووە و بردنەوەو كۆكردنەوەی زۆرترین خاڵ لەخولەكەدا، تیپەكەی دەكاتە پاڵەوانی خولی نایابی كوردستان، بۆ ئەم مەبەستە وەڕگرتنی زانیاری لەبارەی چۆنییەتی ئامادەكاری تیپی باسكەی قەڵا بۆ یارییەكەی ئەمڕۆ بەتایبەتی و بۆ خولەكەیش بەگشتی، عەبدولخاڵق عەبدوڵقادر بەرێوەبەری هونەری تیپی باسكەی قەڵا بۆ لاپەرەی وەرزشی خەبات گوتی: ئامادەكارییەكی تەواومان بۆ یارییەكەی ئەمڕۆ بەرامبەر دەربەندیخان كردووە و متمانەم بەتیپەكەم زۆرە كەبتوانن بەئەنجامێكی شایستە سەركەوتووبن، سەبارەت بەچۆنییەتی خۆئامادەكرنمان بۆ خولەكە بەگشتی ئەوەیان بۆ یانەكان و بۆ یانەكەی ئێمەش كەمێك ناخۆش و قورس بوو، چونكە هەر تیپێك پێش دەستپێكردنی خول پێویستە دوو مانگ ئامادەكاریی تەواوی بۆ بكات، بەڵام ئێمە پێش چەند رۆژێك ئاگادار كراینەوە كە خولی باسكەی كوردستان دەستپێدەكات، بۆیە هەر بەپەلە توانیمان تیپێكی رێكوپێك پێك و دامەزراو پێك بهێنین و چەند یاریزانێكی ئاست بەرز و بەتوانا لەشارەكانی هەولێر و زاخۆ و دهۆك و كەركوك لەتیپەكە كۆبكەینەوە و تیپێكی گونجاو وبەهێزمان بەسەرپەرشتی ڕاهێنەر سەردار ساڵح پێكهێناوە بۆئەنجامدانی یارییەكانی خولی باسكەی كوردستان.
عەبدولخاڵق زیاتر گوتی: سیستەمی خولەكە بەشێوەی یەك قۆناخ بەرێوەدەچێت، 3 یانە بۆ یانەپلە یەكەكان دادەبەزێ و دوو یانەش لەپلەیەكەكان سەردەكەوێت بۆ رێزی یانەنایابەكان، پاشان دووبارە بۆ وەرزی داهاتوو واتە وەرزی 2019- 2020 خولێكی دیكە بۆ ئەو نۆ یانەیە سازدەدرێت.
سەبارەت بەو یارییانەی كەباسكەی قەڵا تێدا یاری دەكات عەبدولخاڵق عەبدولقادر بۆ ئەم پرسەیش وەڵامی خۆی هەبوو ناوبراو گوتی: تیپەكەمان 8 یاری لەخولەكە ئەنجام دەدات، یەكەم یاریمان بەرامبەر دەربەندیخان دەبێت ، بەڵام یارییەكانی دیكەی تیپەكەمان بەرانبەر هەر یەك لەم یانانە دەبێت : سۆلاف *قەڵا ، قەڵا*دبس، دهۆك*قەڵا، قەڵا*زاخۆ،قەڵا *پێشمەرگە،ئاسۆ* قەڵا، ئەكاد*قەڵا
دواجار ئەو بەرێوەبەرە هونەرییەی یانەی قەڵا گڵەیی وگازاندەی لەبەرپرسانی وەرزشی كوردستان دەكات و دەڵێت: تائێستا یانەیەكی وەك قەڵا خاوەن هۆڵێكی وەرزشی نییە، ئەوەی ئێمەی نیگەران كردووە نەبوونی هۆڵ شوێنی مەشق كردنمانە، بەسوپاسەوە بۆ كۆلێژی پەروەردەی وەرزشی و یانەی وەرزشی ئەكاد كە دەرگای هۆڵەكەیان بەڕووی تیپەكەمان كردۆتەوە بۆ ئەنجامدانی مەشق وڕاهێنان.
