بەیانی رۆژی پێنجشەممەی رابردوو 2019.3.28 و بە ئامادەبوونی بەڕێز فازڵ ئیبراهیم خدر بەڕێوەبەری گشتی كەشناسی و بوومەلەرزەزانی هەرێمی كوردستان، وە هەر یەكە لە بەڕێزان، بەڕێوەبەری گشتی كەشناسی هەولێرو بەرپرسی وێستگەی كەشناسی كلاسیكی هەولێر، وە لە رێوڕەسمێكی خنجیلانەدا، بڕوانامەی بەشداربوون بەسەر 24 بەشداربووی خولی نوێكردنەوەی زانیارییەكانی كەشناسی دابەشكرا كە پێكهاتبوون لە كارمەندانی بەڕێوەبەرایەتی گشتی كەشناسی و بوومەلەرزەزانی هەرێم و وێستگەی كەشناسی كلاسیكی هەولێر، لە پێشبینیكاران و روانگەكارانی كەشناسی.
وانەی خولەكە لەلایەن پسپۆڕی كەشناسی عێراقی، بەڕێز ریاز سەعید موسا و بەشێوەیەكی تیۆری و كرداری گوترایەوەو ماوەی پێنج رۆژی خایاند، واتە لە ماوەی نێوان رۆژانی یەكشەممە، 2019.3.24 تا پێنجشەممە 2019.3.28 لە هۆڵی سیمینارەكان ی تایبەت بە سەنتەری راهێنانی كەشناسی دا ئەنجامدرا كە تایبەت بوو بە چۆنییەتی ئەنجامدانی باشترین و وردترین خوێندنەوە بۆ رەگەزەكانی كەشناسی رۆژانەو چۆنییەتی بە كۆد كردنی داتایەكان و دەرخستنی باشترین بڵاوكراوەی پێشبینی كەشناسی لەسەر بنەمایەكی زانستیانەی هاوچەرخدا.
تەواوی بەشداربووان سوپاسگوزاری خۆیان ئاراستەی تەواوی ستافی ئامادەكردن و ئەنجامدانی ئەم خولەیان كردو هیوایان خواست كەوا ئەم جۆرە چالاكییانە بەردەوام بێت، لە پێناو برەودانی زیاتر بە توانا زانستییەكانیان و فراوانتركردنی ئاسۆی زانیاریان بۆ گەیشتن بە باشترین دەرەنجام لە بواری پێشبینییەكانی كەشناسی لە هەرێمی كوردستاندا.
