خەبات: عەلی بانیشاری
رۆژی چوارشەممە 27ی ئادار لە هۆڵی مامۆستا سەعد عەبدوڵڵا لە هەولێری پایتەخت، زانكۆی سەلاحەدین دكتۆرای شانازی بەخشییە پڕۆفیسۆر دكتۆر كۆچەر بیركار، زانای ناوداری كورد لە بواری بیركاریدا. لە مەراسیمەكەدا نێچیرڤان بارزانی سەرۆك وەزیرانی هەرێمی كوردستان و قوباد تاڵەبانی، جێگری سەرۆك وەزیران و د. ڤاڵا فەرید سەرۆكی پەرلەمانی كوردستان و وەزیرانی پەروەردە و خوێندنی باڵا و پەرلەمانتارانی كوردستان و نوێنەرانی بەشێك لە كونسوڵخانەكان و پارێزگاری هەولێر و سەرۆكی زانكۆی سەلاحەدین و ژمارەیەكی لە مامۆستایان و قوتابیانی زانكۆ ئامادەبوون.
لەسەرەتای مەڕاسیمەكەدا د.ئەحمەد دزەیی، سەرۆكی زانكۆی سەلاحەدین گوتی” زانكۆی سەلاحەدین لە هەولێری پایتەختی هەرێمی كوردستان، وەك گەورە زانكۆو دێرین و پێشەنگەكەی كوردستان، هەردەم شانازی بە هەموو گەنجێكی كوردی داهێنەر كردووە جا لە هەر شوێنێكی كوردستان یا هەر كونجێكی جیهان بێت، ئەمە جگە لەوەش دەستی هەموو گەنجێكی كوردی گرتووە لە گەیشتن بە ئامانجەكانی و پاڵپشتیكردون بۆ داهێنان لە پسپۆڕی جیاوازدا، ساڵانە خەڵاتی ژمارەیەكی زۆر توێژەر دەكات كە ئاستی توێژینەوەكانیان بەرزە، ئێستاش بە شانازییەوە لەم كەرنەڤاڵە زانستییەدا بڕوانامەی دكتۆرای فەخری دەبەخشینە كۆچەر بیركاری زانای پسپۆڕی ماتماتیك”.
دزەیی گوتیشی” زانكۆی سەلاحەدین، لە مێژووی هاوچەرخی خۆیدا ئەوە سێیەمین بڕوانامەی دكتۆرای فەخرییە دەیبەخشێتە كەسانی ناوازە وەك پێزانینێك بۆ هەنگاوو كارە نمونەییەكانیان، لە ساڵی 2014 بڕوانامەی دكتۆرای فەخری بەخشییە دكتۆر ئیسماعیل بێشكچی بیرمەندی تورك و دۆستی گەلی كورد و پاشتر لە ساڵی 2015 بڕوانامەی دكتۆرای فەخری بەخشرایە دكتۆر مستەفا زەڵمی هزرمەندی كورد، ئەمە رەنگە سێیەم و كۆتا نەبێت هەر كاتێك كەسانێك خزمەت بە دۆزی كورد بكەن لە رووی زانستی و سیاسییەوە و بگەینە ئەو بڕوایە كە دكتۆرا بەو كەسانە ببەخشین ئەوا ئەو هەنگاوە هەڵدەگرین بۆ هاندانی كەسانی دیكەی هاوشێوە”.
دواتر نێچیرڤان بارزانی، سەرۆك وەزیرانی هەرێمی كوردستان لە كاتی بەخشینی دكتۆرای شانازی بە كۆچەر بیركار گوتی: ئەوەی راستی بێت، لەبەر دوو هۆ هەست بە خۆشحاڵی دەكەم. بێگومان یەكەمیان بوونی دكتۆر كۆچەرە لێرە كە ئـەم بۆنەیە تایبەتە بە ئەوان. دووەم: لەوانەیە كاتی هاتبێ ئـێمەش رایبگەینین، كەوا پێویستە رووبكەینەوە بواری ژیانی شارستانییانەی ئـاسایی كە ساڵانێكە بەهۆی گرژییەكان و ئاڵۆزی و شەڕەوە، كەمێك دوور كەوتبووینەوە.
سەرۆك وەزیرانی هەرێمی كوردستان ئەوەشی گوت” گەلی كوردستان لە هەر شوێنێك بێت شانازی بەو كەسایەتییە زانستییانەوە دەكات كە دەتوانن لە بواری جۆراجۆردا ناوی كوردستان ببەنە پێشەوە و لە ناوخۆشدا ببنە هاندەری گۆڕانی بیر و هزری كۆمەڵگە، ئەمە خەباتێكی گەورەیە لە پاڵ خەباتی سیاسیدا”. هەروەها گوتیشی” كوردستان پێشمەرگە و كەسی چاونەترسی زۆرە، ئـەمڕۆ پێویستیمان بە كەسانی لێهاتوو و زانای بوارەكانی زانستە كە بتوانن پەرە بە بیر و مێشك بدەن”. ئاماژەی بەوەشدا دكتۆر كۆچـەر خۆی خۆی پێگەیاندووە و تەنیا بنەماڵەكەی پشتیوان و هاندەری بوون تاگەیشتە ئەوەی كە خەڵاتی ناوداری فیڵدز لە بواری زانستی ماتماتیكدا بەدەست بهێنێت.
پاش بەخشینی دكتۆرای شانازی پ.د كۆچەر بیركار لەبەردەم ئامادەبوواندا سوپاسی كاربەدەستانی حكوومەتی هەرێم و زانكۆی سەلاحەدینی كرد و گوتی” خۆشحاڵم پاش نۆ ساڵ هاتمەوە هەولێر، پاش چەند مانگێگ لە دایكبوونم لە گوندێكی مەریوانی رۆژهەڵاتی كوردستان شۆڕشی ئێران روویدا، ئەوەش شڵەژانی سیاسی بەدوای خۆیدا هێنا و بارودۆخەكە تێكچوو”. گوتیشی” لەو كاتەدا خوێندن لە گوندەكەم پێشینە و مێژووی نەبوو، بەهۆی بارودۆخی ناوچەكەوە سەرەتای خوێندنم بە قۆناغێكی سەختدا تێپەڕی، بەشێك لە قوتابیانی گوند نەیاندەتوانی تا كۆتایی درێژە بە خوێندن بدەن”.
كۆچەر بیركار وەكو خۆی دەڵێت”25 ساڵە لە بواری بیركاریدا خەریكی لێكۆڵینەوە بووە”. دەشڵێت” ئەگەر بتەوێت كەسی داهێنەر دروست ببێت ئەبێت خۆت ماندوو بكەیت”. هەروەها گوتیشی” هەموو وڵاتێك زانای داهێنەری پێویستە، بەڵام تەنها زانین و بڕوانامە وەرگرتن كێشەكانی ئێمە و هیچ وڵاتێك چارەسەر ناكات”. ناوبراو لە درێژەی وتارەكەیدا سوپاسی مامۆستاكانی و دایك و باوك و براكانی كرد كە هاوكاریان كردووە تا درێژە بە خوێندن بدات.
فەریدوون درەخشانی، ناسراو بە كۆچەر بیركار لە ساڵی1978 لە گوندینێی سەر بە شاری مەریوانی رۆژهەڵاتی كوردستان لە دایكبووە، وەكو خۆی باسی دەكات لەسەرەتای چوونی بۆ قوتابخانە بیركاری زۆر پێخۆش بووە. لە زانكۆی تاران بەكالۆریۆسی لە بیركاریدا وەرگرتووە. پاشان لە زانكۆی نۆتینگهامی بەریتانیا ماستەر و دكتۆرای لە هەمان بواردا خوێندووە. لە 2006ـەوە لە زانكۆی كەمبریج مامۆستای زانكۆیە. ساڵی رابردوو لە بواری بیركاریدا لە رێو دی جانێرۆ خەڵاتی جیهانی فێڵدزی وەرگرت.
