خەبات: سەید فاتیح بەرزنجی
ئەندازیار عەبدولواحێد ئەحمەد حەمەد بەڕێوەبەری ئەندازەی پاركەكانی هەولێر بە خەباتی ڕاگەیاند: وەكو ئەندازەی پاركەكان لە شاری هەولێر چەندین تیمی جوانكردنی ناوەندە شەقامەكان و چاندنی گوڵ و نەماممان هەیەو ساڵانە چەندین هەڵمەتی نەمام چاندن ئەنجام دەدەین بۆ ئەوەی ڕێژەی سەوزایی لە پایتەخت ڕوولە زیادبوون بكات.
بۆ ئەمساڵ ئامادەكاری تەواومان كردووە بۆ چەند چالاكیەك وەك بەبۆنەی لەدایكبوونی باوكی رۆحیی نەتەوەیی كورد بارزانیی نەمر هەڵمەتێكی گەورەی نەمام چاندن لە هەولێر بەبۆنەی ڕزگاركردنی شاری هەولێرو ڕێكەوتننامەی 11ی ئادار ئەنجام دەدەین، بۆ ئەو مەبەستەش چەند شوێنێكمان دیاری كردووە.
دواتر دەربارەی چالاكیەكانی دیكەی ئەندازەی پاركەكان، بەڕێوەبەری ئەندازەی پركەكانی هەولێر ڕونیكردەوە: زیادبوونی ڕێژەی سەوزایی شاری هەولێر بۆ ئەو بەرهەمە ناوخۆییانەی خۆمان دەگەڕێتەوە كە نەمامگەی نموونەی پارك و باخچەكانە بەرهەمی ئەو نەماگەیە وای كردووە شاری هەولێر جوان و ڕازاوە بكات و ساڵانە چەندین هەڵمەتی نەمام چاندن بۆ جوانكردن و زیادكردنی ڕێژەی سەوزایی ئەنجام دەدەین بەچاندنی نەمام و گوڵ لەناوەندە شەقامەكانی شاری هەولێرو چاندنی نەمام لە سەر چەندین پارچە زەوی ناو گەڕەكەكان كاری نەمام چاندن لەلایەن تیمەكانمانەوە ئەنجام دراوە، بۆ ئەمساڵیش لە ڕێگەی نەمامگەی نموونەیی خۆمان توانرا زیاتر لە100 هەزار گوڵی وەرزی بەرهەم بەێنین بۆ چاندنی ئەو ژمارە زۆرەی گوڵەكان هەوڵماندا لەلایەن تیمەكانەوە ڕۆژانە بچێنرێت لە ناوەندە شەقامەكانی پایتەخت و شوێنە پێویستەكان تا دیمەنێكی جوان و قەشەنگ بە شاری هەولێر ببەخشێت، وەك چاندنی گوڵی جۆری پەپوولەو گوڵی پەتۆنیاو چەندین دارو درەختیش چاندراون. هەرلە نەمامگەی نموونەیی خۆمان توانیمان زیاتر لە4 هەزار نەمام بەرهەم بەێنین. دیارە بەرهەمهێنانی ئەو گوڵ و نەمامانەی نەماگەی خۆمانەو هیچ جۆرە گوڵ و نەمامانە لە دەرەوە نەكڕدراوە، بەڵكو بەرهەمی نەمامگەی نموونەیی خۆمانە كەلەلایەن چەند كادیرێكی شارەزای خۆمان بەرهەم دێت و ئامادەدەكرێ بۆ چاندن ئەو هەنگاوەی كارمەندە دڵسۆزەكانی پارك و باخچەكان وادەكات كە پارە بۆ كڕینی گوڵ و نەمام خەرج نەكرێت.
دواتر ئەندازیار عەبدولواحێد ئەحمەد بەڕێوەبەری ئەندازەی پاركەكانی هەولێر ڕونیكردەوە: هەموو ساڵێك لە مانگی ئادارو نەورۆزو یادی ڕاپەڕین چەندین چالاكی ئەنجام دەدەین لە هەمووی گرنگتر لەیادی لەدایكبوونی بارزانیی نەمر هەڵمەتێكی گەورەی نەمامچاندن لەچەندین شوێن ئەنجام دەدەین بەهاوكاری و هەماهەنگی پارێزگای هەولێرو دامودەزگا پەیوەندیدارەكان ئەو هەڵمەتە ئەنجام دەدرێت و هاوڵاتیان و فەرمانبەرانیش بەشداری لەو هەڵمەتەدا دەكەن، هەربەو بۆنەیەوە چالاكی دیكەیش ئەنجام دەدرێت وەك كردنەوەی پێشانگایەكی گوڵ و باخچە لە ڕۆژی 11ی ئادار ئەو پێشانگایە تا ڕۆژی13 ی مانگ بەردەوام دەبێت، ئەو پێشانگایە لەبەردەمی پاركی شانەدەر یەك دەكرێتەوە بەبەشداری كردنی زیاتر لە40 نەمامگەی نموونەیی ناو شاری هەولێر لەگەڵ بەشداری كردنی چەند كۆمپانیایەكی كشتوكاڵی و بەشداری كردنی كۆلیژی كشتوكاڵی و بەڕێوەبەرایەتی ئەندازەی پاركەكانی هەولێریش بەشداری دەكات بۆ ڕێنمایی كردنی هاوڵاتیان، ئەو پێشانگایە یەكەمین پێشانگایە كەلەلایەن ئێمەوە ئەنجام دەدرێت، دیارە ئامانجیش لە كردنەوەی ئەو پێشانگایە پێدانی ڕێنمایی و هوشیاركردنەوەی هاوڵاتیان و ئاشناكردنیانە بە گوڵ و نەمام و هاندانی هاوڵاتیان بۆ ئاشناكردن بە گوڵ و نەمام كارێكی گرنگە و دەزانین كە ڕۆژانە خەڵكێكی زۆر سەردانی نەماگەكان دەكات بۆ كڕینی نەمام و گوڵی جوان، ئەوەی كە گرنگە لەو پێشانگایە بە خاوەنی نەمامگەكانمان ڕاگەیاندووە كە لە یەكەمین ڕۆژی پێشانگاكە نەمام و گوڵ نەفرۆشن، بەڵكو بە هاوڵاتیانی ئاشنا بكەن، بۆیە هاوڵاتیان لە ڕۆژەكانی دووەم و سێیەم دەتوانن گوڵ و نەمام بۆ خۆیان بكڕن د داواشمان لە نەماگە بەشداربووەكان كردووە كە نابێ گوڵ و نەمام بە نرخی گران بفرۆشن بە هاوڵاتیان پێویستە نرخەكانیان گونجاو بێت.
لەكۆتایشدا ئەندازیار عەبدولواحێد ئەحمەد گوتی: ئومێدەوارین لە كابینەی تازەی حكومەتی هەرێم گرنگی زیاتر بە پڕۆژەكان بدات بەتایبەتی ئەو پڕۆژانەی كە پایتەخت جوان و ڕازاوە دەكەن. جگە لەوەش ئاماژەی بە چەند پڕۆژەیەكدا كە لەسەر داهاتی سەرۆكایەتی شارەوانی هەولێر ئەنجام دەدرێت و چەند دەرخستەو پڕۆژەیەكمان بۆ سەرۆكایەتی شارەوانی هەولێر بەرزكردۆتەوە، گوتیشی، سوپاسی سەرۆكایەتی شارەوانی هەولێر دەكەین كە هەمیشە پاڵپشتی لە كارو پڕۆژەكانمان دەكات لە تازەترین چالاكیش لەلایەن تیمەكانمانەوە هەوڵدرا لە گەڕەكی زانكۆی نوێ لە ناوەندە شەقامەكانی ئەو گەڕەكە هەڵمەتێكی نەمام چاندن ئەنجام بدەین.
