سەڵاحەدین دەمیرتاش هاوسەرۆكی پێشووی هەدەپە لە دیدارێكی رۆژنامەوانی حەفتەنامەی (باس)ـدا باس لە چەندین تەوەر و پرسی گرنگ سەبارەت بە ژیانی خۆی و ناوچەكە و رەوشی سیاسی و رۆڵی سەرۆك مسعود بارزانی لە كۆنگرەی یەكێتی نەتەوەیی دەكات. خەبات بەشێك لەو دیدارە بڵاو دەكاتەوە:لە وەڵامی ئەو پرسیارەی حەفتانەمەی (باس) كە دەپرسێت: لە دوا دانیشتنی یاساییتدا، كاتێك داوات كرد بە كوردی پارێزگاری لە خۆت بكەیت، دڵی زۆر كوردت خۆش كرد. كاتێك ئەو پارێزگارییەت لە خۆت كرد، هەستت بە چی كرد؟ لەناو زینداندا چۆن توانیت زمانە كوردییەكەت بەو شێوەیە باش بكەیت و سەركەویت؟ سەڵاحەدی دەمیرتاش دەڵێت: تاوەكوو ئێستا لەبارەی سەدان لاپەڕەوە، كە لەسەرم بەرز كراوەتەوە، پارێزگاریم لە خۆم كردووە، بەڵام بەبایەخترین و بەماناترین پارێزگاریم، ئەو پارێزگارییە بوو، كە بە زمانی خۆم بە كوردی كردم، چونكە بەهۆی ئەوەی كوردم بۆیە ئەو جۆرە مامەڵەیەم لەگەڵدا دەكەن، بۆیە داكۆكیم كرد لەوەی كە كوردم و لەبەردەم دادگادا دەبوایە ئەو داوایە بكەم كە بە كوردی پارێزگاری لە خۆم بكەم، بۆیە بەشێكی دانیشتنەكە و پارێزگاریكردنەكەم بە كوردی بوو. دەمیرتاش دەشڵێت: وەكوو ئەوەی من دەمەوێت، تاوەكوو ئێستا كوردییەكەم باش نییە، بەڵام بەردەوام دەخوێنم و خۆم فێر دەكەم، ئەمەش لەگەڵ عەبدوڵڵا زەیدانی هاوڕێم هەوڵی بۆ دەدەین و دەیخوێنین، لە رێگەی رۆمان و چیرۆك و گرامەرەوە زمانی كوردیی خۆمان برەو پێ دەدەین. هاوسەرۆكی پێشووی هەدەپە لە وەڵام بەو پرسیارەی حەفتەنامەی (باس)، كە دەڵێت: لەناو كورد و هێزە دیموكراتییەكانی توركیادا كەسایەتییەكی دیاریت، بەڵام لەو رۆژەوەی دەستگیر كراویت، بێدەنگییەك لەبارەی دەستگیركردنەكەت هەیە، دڵت نەشكاوە لەو بێدەنگییەی بەرامبەرت هەیە؟ سەڵاحەدین دەمیرتاش دەڵێت: ئێمە حەدی ئەوەمان نییە دڵمان لە خەڵكی خۆمان زویر بێت، ئێمە دەبینە قوربانیی خەڵكەكەمان و داوای هیچ شتێكیشیان لێ ناكەین و چاوەڕێ ناكەین پاداشتەكەی وەربگرینەوە، تەنیا دەمانەوێت ئەوان لە خەبات پاشەكشە نەكەن، ئەمەش دڵی ئێمە خۆش دەكات و ئەوی تر لە لای ئێمە هیچ نییە، لە ماوەی100 ساڵی رابردوودا، خەڵكەكەمان سەدان رۆڵەیان لەپێناو ئازادیدا فیدا كردووە و ماندووش نەبوونە، ئێمە كاتێك دەبینە مایەی دڵخۆشیی ئەوان و ئێمە بە شایان بزانن، ئەمە بۆ ئێمە مایەی شانازییە، كاری ئێمە ئەوە نییە لە خەڵك دڵگران بین، بەڵكوو پێویستە بۆ بەرپاكردنی ئازادیی خەڵك گیانی خۆمان بكەینە قوربانی. لە تەوەرێكی دیكەی دیدارەكەدا حەفتەنامەی باس لە هاوسەرۆكی پێشووی هەدەپە دەپرسێت: لە فەڕەنسادا خەڵاتی (Montluc) بۆ بەرگری و ئازادیت وەرگرت، دەتوانین لەو رووەوە هەستی بەڕێزتان بزانین؟ سەڵاحەدین دەمیرتاش دەڵێت: بە دڵسۆزییەكی زۆر و بە بڕوابوونێكی زۆرەوە دەیڵێم، ئەو خەڵكەی كە شوێنێكی دڵی خۆی بۆ كردوومەتەوە، ئەو خەڵاتە گەورەیەی باسی دەكەیت، ناگاتە ئەو خەڵاتەی خەڵك، من گەورەترین خەڵاتی خۆمم لە خەڵك وەرگرتووە و ئەوەی دەمێنێتەوە ئەوە سێبەری ئەو خەڵاتە گەورەیەیە، كە باسم كرد. دیسان رای گشتیی نێودەوڵەتی و دۆستەكانمان بۆ ئێمە مایەی شانازییە و ئەمە بە مانایەكی زۆر و بایەخێكی زۆر لێك دەدەمەوە. هەر خەڵاتێكی كە بە منی دەدەن، بە ناوی ئەوانەی لە وڵاتەكەمدا لەپێناو ئازادیدا رەنجیان كێشاوە و قوربانییان داوە، هەروەها بە ناوی خانەوادەكەم قبووڵی دەكەم. خەڵات بۆ من نییە، بۆ ئەو خەڵكە بەشەرەفەیە، كە بەرگرییان كردووە. حەفتەنامەی باس لە سەڵاحەدین دەمیرتاش دەپرسێت: دوای ئەوەی خرایتە زیندانەوە، لە لایەن سەرۆك مسعود بارزانییەوە هیچ پەیامێكت پێ گەیشت؟ ئەگەر پێتگەیشتووە بۆمانی باس دەكەیت؟ سەڵاحەدین دەمیرتاش دەڵێت: كاتێك هاتە توركیا و هەروەها كاتێك لیژنەیەكی هەدەپە سەردانی هەولێری كرد و چوونە لای بەڕێزیان، لە رێگەی ئەوانەوە سەلامی پڕ بایەخی ئەویان بۆ هێنام. لەوە زیاتر هیچ پەیامێكی تر لەنێوانماندا نەبووە، بەڵام هەمیشە هەستم كردووە كە بارزانی بەرانبەر بە من وەكوو خۆشەویست و برا سەیری كردووم، پێچەوانەكەشی هەر وایە، منیش بەرانبەر بە بارزانی خۆشەویستی و رێز و حورمەتێكی بێ سنوورم هەیە بۆی، من لە زیندانەوە لە رێگەی حەفتەنامەی (باس)ەوە سەلامێكی گەرم بۆ بارزانی دەنێرم، كاتێك بارودۆخ زۆر بەرتەسك دەبێتەوە بۆ كورد، لە هەموو لایەكیشەوە پەلاماری كورد دەدرێت ئاگادارم، بەڵام ئەو پیلان و بەڵایەی بەسەر كورددا دێت، كۆتایی پێهێنانی یەك رێگەیە، ئەویش دروستكردنی یەكێتیی نەتەوەیی كوردە، بەڕێزیان لەو رووەوە زۆر هەوڵیاندا و زۆر پاڵپشتی ئەو پرسە بوون، بۆیە تكای لێ دەكەم وازی لێ نەهێنێت و با رۆحی یەكێتیی نەتەوەیی كورد لەدەست نەچێت. داواكارم بارزانی هەمیشە تەندروست باش بێت و سەركەوتوو بێت. لە تەوەرێكی دیكەدا حەفتەنامەی باس پرسیار لە هاوسەرۆكی پێشووی هەدەپە سەڵاحەدین دەمیرتاش دەكات: كاتێك دەستگیر كرایت، هاووڵاتیانی هەرێمی كوردستان زۆر دڵگران بوون بۆت، شتێكت هەیە بۆ ئەو خەڵكە؟ دەمیرتاش دەڵێت: با ئەوان دڵگران نەبن و خەمبار نەبن، بەڵكوو تووڕەبن و تووڕەبوونەكەشیان خەباتكردن بێت لەپێناو ئازادی، كام لە رۆشنبیر و سیاسی و سەركردەی كورد، زیندان و ئاوارەیی و ئەشكەنجەی نەبینیوە و نەناسیوە؟ بەڵام ئەمە تا ئەبەد قەدەری ئێمە نییە، ئێمە ئەو قەدەرەی فەلەك دەشكێنین و قەدەری خۆمان دەگۆڕین. ئێمە بێ هێز و بێچارە و بێ ئومێد نین، كەس با دڵگران نەبێت، چونكە بە بەرگریمان، بەدڵنیاییەوە هەر دەگەینە سەركەوتن. لەم زیندانە ساردەمەوە، بۆ هەموو هاووڵاتیەكی هەرێمی كوردستان سڵاوێكی گەرم دەنێرم و خۆشەویستیی خۆمیان بۆ دەنێرم. خەڵكەكەشمان خەباتی لەسەر حەقیان پێ خۆشە و شانازی بەو خەباتەوە دەكەن. با هەمووتان دڵتان ئاسوودە بێت و هێز بدەنە ئەو خەباتەی هاتووەتە ئاراوە، چونكە ئەم سەدەیە لەگەڵ ئێمەدایە و هیچ هێزێكیش لە دنیادا ناتوانێت بەرمان پێ بگرێت.
