دڵشاد میراودەلی
بارزانی نەمر، ئەو پیاوە خەباتگێڕ و كۆڵنەدەر و نیشتمان پەروەرە. كاتێك لەساڵی 1903 لە زینداندا چاوی گەشی بەدونیای بەریندا هەڵهێنا، نەخاسمە لە تەمەنی لاویدا، هەر لە منداڵیدا، لەناو ئازار و كۆڤاندا، ژیانی منداڵی دەستپێكرد. لەوێ ڕۆژێدا، تاكو 1946 كە پارتی دامەزراند، هەر لەخۆڕانەبوو بەڵكو لەسەرەتای ژیانییەوە، لەخەباتدا بوو، دژی داگیركەرانی كوردستان، پێش دامەزراندنی پارتیش سەركردایەتی شۆڕش و خەبات و هێرش و هێزی كردووە، دوای دامەزرانی پارتیش بێجگە لە درێژەدان بەخەبات، هیچ كات مساوەمەی لەسەر بستێك خاكی كوردستان، نەكردووە.
بۆ وێنە كاتێك لە سەرتەای هەڵگیرسانی شۆڕشی ئەیلول، عبدولكەریم قاسم، داوایكرد، دەست لەخەبات و بەرەنگاربوونەوەی رژێمی عێراق هەڵگرێ، لەبەرامبەردا، كۆشك و زێڕو پارە و چەند هەزار ماڵی بارزانییەكانیشی بەشایستەترین شێوە بۆ نیشتەجێ بكات. بەڵام بەرسڤی بارزانی نەمر ئەوەبوو، (من داوای حقوقی میللەتی كورد دەكەم، نەوەك تەنها بارزانییەكان.) ئیدی ئەم هەڵوێستە كوردانەو بەسەدانی دیكەی لەم ڕەنگە بوون كە ناوی بارزانی نەمری لەناو مێژوودا هێشتەوە و خەباتیشی بێ فەناو وەك ئەستێرەیەكی پڕشنگدار، لەئاسمانی كورد و كودایەتیدا دەدرەوشێتەوە. ئەوجا لەزۆر ڕوانگەی مرۆیی و عەداڵەت و یەكسانی كومەڵایەتی و كورد پەروەرییش ، ڕۆژهەڵاتناسەكان لەبارەی ئەو زاتە مەزنە دواون و ڕای بەرزو شاستەیان داوە، ناڵێم لەنووسیندا حەق نەدراوەتە، مێژووی پڕسەروەری و خەبات و تێكۆشانی بارزانیی نەمر، بەڵام چەندی لەبارەی ئەوزاتە مەزنە و خەباتە ڕەواكەی و پەیامە كوردانەكەی بنووسرێت، پێویستە و نووسین و یادكردنەوەی بەرز هەڵدەگرێت. وەكو كورد گوتەنی ئەو هەویرە ئاو زۆر دەكێشێ.
هەنوكە كە ساڵیادی وەفاتی ئەوزاتە مەزنە دەكەینەوە، یادی بەرز دەنرخێنین و شكۆی گەلەكەمان، ڕایەڵێكی تەواو و تۆكمەی پەیوەستە بە گیانبازی و خۆڕاگری و نەتەوەپەرستی و كۆڵنەدانی ئەو زاتە مەزنەوە. واتە ئەوەی ئێستا هەیە و لەبەردەستە، حكومەتی هەرێمی كوردستان و قەوارەی سیاسی و ئابووریەكەی، هەمووی دەستكەوت و خەباتی ڕەوای بارزانیی نەمرە. ئەركە لەسەر هەموومان، كە ئەم دەسكەوتانەی هەرێم، وەك سۆمای چاو بپازێزین، پاراستنی ئەم دەسكەوتانەش، بەهەر ڕەنگێك بێت، پێویستییەكی نەتەوەییانەی ڕێبازی بارزانیی نەمرە. بە واتایەكی دیكە، پاراستنی دەسكەوتەكانی گەلی كورد، دێژەدانە بەخەبات و فەلسەفەی بیری بارزانیی نەمر.
وەفا و وەفاداریش، یەك لە تایبەتمەندییە، جوانەكانی گەلی كوردن،با لەم ڕۆژەدا، وەفاتی بارزانی باوك بكەینە هەوێنی سازانی نیشتمانی و یەكبوون و ئاشتەوایی گەلەكەمان. چونكە، شكاندنی بەستەڵەكی گرژی و ناهەمواری كوردستان خزمەتە بە ڕێبازی پیرۆزی بارزانیی نەمر. نیەتپاكی و نیازبێكەردی هەموومان، چ بۆ ناوخۆی، ئیداری و چ بۆ ئایدیا نیشەمانییەكەی، ڕاستەوخۆ خزمەتە بەڕێبازی پڕ شكۆی بارزانی و گەلی كورد. یادت پڕ شكۆ و گڵكۆت پڕنوور. بارزانی باوك و ئیدریسی هەمیشە لەدڵدا.
