خەبات: شاخەوان برایم عەبدوڵڵا
فراكسۆنی پارتی دیموكراتی كوردستان كار دەكات بۆ كاراكردنەوەی سەرۆكایەتیی هەرێمی كوردستان لەگەڵ سەرجەم لایەنەكانی دیكەی ناو پەرلەمان بە هەمواركردنەوەی یاسای سەرۆكایەتیی هەرێم، سەرۆكی فراكسیۆنی پارتی دیموكراتی كوردستانیش لە پەرلەمانی كوردستان سەبارەت بە هەڵوێستی فراكسیۆنەكانی ناو پەرلەمان لەبارەی هەمواركردنەوەی یاسای سەرۆكایەتیی هەرێمی كوردستان جەخت لەسەر ئەوە دەكاتەوە هەموو لایەنەكان كۆكن لەسەر ئەوەی دەبێ دامەزراوەی سەرۆكایەتیی هەرێمی كوردستان كارا بكرێتەوە.
ئەمێد خۆشناو، سەرۆكی فراكسیۆنی پارتی دیموكراتی كوردستان دوای كۆبوونەوەكەی رۆژی هەینی پەرلەمانی كوردستان لە كۆنگرەیەكی رۆژنامەنووسیدا بۆ دەزگەكانی راگەیاندن، سەبارەت بە پێشكەشكردنی پڕۆژە یاسایەك بە مەبەستی هەمواركردنەوەی یاسای سەرۆكایەتی هەرێمی كوردستان رایگەیاند: تا ئێستا هیچ پرۆژە یاسایەك بۆ هەمواركردنەوەی یاسای سەرۆكایەتیی هەرێمی كوردستان پێشكەش نەكراوە. خۆشناو سەبارەت بە هەڵوێستی لایەنەكان لەبارەی كاراكردنەوەی سەرۆكایەتیی هەرێمی كوردستان، گوتی: هەموو لایەنەكان لەسەر ئەوە كۆكین كە دامەزراوەی سەرۆكایەتیی هەرێمی كوردستان كارابكرێتەوە و یاسای سەرۆكایەتیی هەرێمی كوردستانیش بە كاردەخرێتەوە.
سەبارەت بە رێككەوتن و گفتۆگۆی لایەنەكان لەبارەی ئەو پرسەوە، سەرۆكی فراكسیۆنی پارتی لە كۆنگرە رۆژنامەنووسییەكەیدا بۆ میدیاكان، رایگەیاند: ئەو بابەتە بابەتێكی نیشتمانییە و پەیوەستە بە هەموو لایەكمانەوە و بە دڵنیاییەوە لە نێو گفتوگۆی هەموو لایەنەكاندا هەیە و هەموومان بە یەكەوە بە تێگەیشتنێكی هاوبەش هەنگاو بۆ ئەو بابەتە دەهاوێین. سەبارەت بە وادەی هەمواركردنەوەی یاسای سەرۆكایەتیی هەرێمیش، سەرۆكی فراكسیۆنی پارتی دیموكراتی كوردستان، گوتی: هەمواركردنەوەی یاسای سەرۆكایەتیی هەرێم كاتەكەی دیاری نییە، بەڵام لە كارە لە پێشینەكانی ئێمە دەبێت.
ئەنجوومەنی سەركردایەتیی پارتی دیموكراتی كوردستان لە كۆبوونەوەی خۆیدا بڕیاری دا كە نێچیرڤان بارزانی سەرۆكوەزیرانی كوردستان كە هاوكات جێگری سەرۆكی پارتی دیموكراتی كوردستانیشە، بۆ پۆستی سەرۆكایەتیی هەرێمی كوردستان كاندید بكات، لە ئێستاشدا فراكسیۆنی پارتی دیموكراتی كوردستات جەخت دەكاتەوە لەسەر ئەوەی كاری لە پێشینەیان هەمواركردنەوەی یاسای سەرۆكایەتی و كاراكردنەوەی دامەزراوەی سەرۆكایەتیی هەرێمی كوردستان دەبێت.
