غازی حەسەن
ئەو ڕاوێژكار (ڕاوێژچیانە) و كاوێژكار و ڕووناكبیرانەی دەیانویست بزوتنەوەی گۆڕان بە ئارەزووی ئەوان بەڕێوەبچێت، هەنووكە پێچەوانەی ئامۆژگاراییەكانی دوێنیان بۆ گۆڕان، بەڕقێكی ئەستوورەوە دەگرین، گوایە گۆڕان گورگ دەیخوات، لەكاتێكدا پێشتر وەكو ئەوە وابوو، گۆڕان مەڕ بیخوات. ئاساییە لەهەموو سەردەمێكدا توێژ و كەسان و گروپ و ئاڕاستەیەك درووست ببێت، بیانەوێت وەكو ڕەمز و خاوەنشكۆی فكری بزاڤە كۆمەڵایەتییەكان دەربكەون، بەڵام لەكۆتایدا دەیانەوێت شێوەیەكی كاریكاتێری بەڕەوشەكە بدەن. هەر ئەو دەزگایەی ماركوژی دەكردن، ئێستا ببێتە مینبەری بانگەشەكانیان و وێنەی گریانە ڕقاوییەكەیان بڵاوبكاتەوە.
ئەوانەی بەرنامەی ئەوەیان هەبوو 17ی شوبات بكەنە بزاڤێكی كۆمەڵایەتی مۆدێرن و بەهاوپەیمانی ئیسلامی سیاسی، كۆتایی (بەدەسەڵاتی عیلمانی/ كە من هەزار و یەك پرسیارم دەربارەی چەمكی عیلمانی و شێوەی سیستەمی حكومڕانی هەرێم هەیە) لە هەرێمی كوردستان بهێنن، لەجیاتی پێداچوونەوە بەشكستی فكری و قەناعەتە كورتبینییەكانیان، دەستیان بەگریانێكی بەتاوكردووە، گوایە ئیتر گۆڕان دوا بزماری لەتابووتی خۆی دا، هەروەها ئەوەی گۆڕان لەكابینەی نوێی حكوومەتی هەرێم پێ دەدرێت، لەقەبارەی خۆی پترە.
گۆڕان كارتە، یان هێزێكە دەتوانێت لەسەردەمێكی جیاوازدا پەرە بەتوانا و پێگەی سیاسی خۆی بدات، هیچ جیاوازییەكی نییە، كە دەتوانێت لەدەسەڵات بێت و هێزێكە چی دیكە بەرگەی ئەوە ناگرێت لەدەرەوەی دەسەڵات بژیت. من بڕوای تەواوم بەوە هەیە، گۆڕان لەڕابردوودا بەبەرنامەیەكی جیاواز و شێوازێكی دیكەی بیركردنەوە كاری دەكرد، دوێنێ بەرژەوەندی دەكوشت، بەڵام ئەمڕۆ خاوەنی بەرژەوەندییە، بەرژەوەندی زۆربەی لایەنە سیاسییەكان لەوەدایە كوردستانێكی ئارام، هاوسەنگ، بە بەشداری هەموو لایەنەكان و پێكهاتەكان و گروپە جیاوازە كۆمەڵایەتییەكان بەڕێوەبچێت.
ئەوەی ڕوودەدات گۆڕان نییە گۆڕاوە، بەلكو قۆناغەكە و پێكهاتەی لایەنە سیاسییەكان لەڕووی ژمارە و قەوارەوە گۆڕاوە. پارتی ئەزمونێكی دیكەی لەگەڵ گۆڕان هەیە، ئەم گۆڕانەی لەهاوسەنگی و قەوارەی نوێنەرایەتی لایەنە سیاسییەكان ڕوویداوە، هەمان ئەزموون نابێت، كە پێشتر هەبوو. بۆیە سەردەمی نوێ زەرورەتی كاركردنێكی نوێشی پێویستە، لەبەر ئەوە ئاساییە ئەمڕۆ پارتی و گۆڕان ڕێككەوتنێكی كاریگەری سیاسی لەپێناو بەڕێوەبردنی هەرێم بە بەرنامەی هاوبەش ئەنجام بدەن، دووریش نییە یەكێتیش بگاتە ئەو بڕوایەی لەپرۆسەكە بەشدار بێت. هیچ ڕێككەوتنێكیش بێ گرفت و ناكۆكی و هەتا بادانەوەش نابێت، باشترین نموونەش ڕێككەوتنی ستراتیجی نێوان یەكێتی و پارتییە، بەڵام ئەوەی ئەمجارە ئەنجام دراوە، هەر بەتەنیا كاردانەوەیەكی كتوپڕی پارتی لەسەر هەڵوێستی یەكێتی نییە، بەڵكو زەروورەتی قۆناغێكی نوێیە، كە یەكێتی بە”حكوومەتی نوێ و سەردەمی نوێ” وەسفی دەكات. هیچ نوێیەكیش بێ سیستەمی نوێی هاوپەیمانی و كاركردن و قەناعەت نایەتەدی.
ئەم ئەزموونە، هەڵگێڕانەوەی تەوەقوعاتەكانە، ئەم كودەتا هاوپەیمانییەی ڕوودەدات، سەرەتاكەی بۆ هەڵوێستی هەندێك لایەن لەچۆنیەتی پێكهێنانی كابینەی نوێی حكوومەتی عێراق و شێوازی هەڵبژاردنی سەرۆك كۆماری بەغدا دەگەڕێتەوە. یارییەكان لەوێ دەستی پێكرد، كە لەسەر بنەمای تەقڵەلێدان بەفیل ڕۆنرابوو.
دەگەڕێمەوە سەر گریانی پڕ لەقینی هەندێك كەس و قەڵەمی ئەنیشك چنی هەندێكی دیكە. ئەوانەی دەیانویست لەپشتەوە كۆنترۆڵی عەقڵی سیاسی و توڕەیی و ناڕازیی بوون و شكاندنی هێزەكان لەپێناو بەدیهێنانی هێزی ڕقلێبوونەوە بكەن، كە لەسەر بنەمای نەخۆشی كۆمەڵایەتی و دووبەرەكی و دەستەمۆكردنی سیحربازانە لەڕێگەی بەكارهێنانی دەستەواژەی تیشكهاوێژ و زارەوەچنی لەنێو عاتیفەی هاووڵاتیانی هەقبەدەستی ئاسایی بەڕێوە دەبرا، ئەمڕۆ لەنێو زیندانی فكری خۆیاندا، دەیانەوێت دۆزەخێكی دیكە بۆ تێكشكاندنی هەموو شكۆیەكی لێكنزیبوونەوە و هاوسەنگی و لێكتێگەیشتنی لایەنەكان درووست بكەنەوە.
وابزانم گۆڕان و پارتیش لەوە گەیشتوون نەگریانی ڕق ئەستووری هەندێك بۆ گۆڕان دەتوانێت هەڵوێستی ڕقچنینەوەی ڕابردووی بەناو فەیلەسوفەكان بشارێتەوە، نە كاتكوژی هەندێك توانی ترس بكاتە كردەیەكی هەقیقی و هەموو دەرگا و پەنجەرەكان دابخات، نە ژمارەی كورسییەكانی پارتی بەتەنیا دەتوانێت چارەسەری قەیرانەكان بكات، نە گریانی ڕقاوی دەتوانێت چی دیكە كۆمیدیایەكی ڕۆژهەڵاتیانەی كۆمەڵگەیەكی داخكراوی وەكو كوردستان فریوبدات. خەریكە دەمامكی گوتارە دەمامكدراوەكان و خاوەنەكانیان دەكەون.
پارتی و گۆڕان دەتوانن ببەنە سەرەتایەكی خێر بۆ كۆتایی هێنان بەكۆمیدیای گریان بەناوی میللەت و مافی خەڵك، كۆتایی هێنان بەلێخوڕینی هەرێم بەمەزەندەی ئەوەی من دەمەوێت، هەموو ڕۆژێك هەڕەشەی دوو ئیدارەیی، هەروەها ڕەنگە ببێتە سەرەتایەكی نوێش بۆ كۆتایی هێنان بەكۆمیدیای ڕاوێژچییەكان.
