سەلام عەبدوڵڵا
پاش زیاتر لە چوار مانگ لە دیاریكردنی ئەنجامەكانی هەڵبژاردن لە هەرێمی كوردستان بۆ پەرلەمان، دوێنێ پەرلەمان یەكەمین كۆبوونەوەی بۆ دەستنیشان كردنی سەرۆكایەتی پەرلەمان و سوێندخواردنی (3) ئەندام پەرلەمان تەرخان كرد كە بەداخەوە یەكێتی نیشتمانی بەشداری تێدا نەكرد، بەپاساوی كۆبوونەوەی سەركردایەتی بۆ گەڵاڵەكردنی داواكانی و دیاریكردنی سەرۆكێك لەلایەن خۆیانەوە بۆ پەرلەمان كە بەپێی ڕێكەوتنە بەراییەكان و ژمارەی كورسیەكانی، ئەو پۆستە بەر برایانی یەكێتی دەكەوێت.
بەڵام لەگەڵ ئەوەشدا و بەوپێیەی هەڵبژاردنی سەرۆكی پەرلەمانی ئەمڕۆ هەر بۆ پڕكردنەوەی ئەو پۆستە بوو، تا ئەو كاتەی خۆیان كەسێك دیاری دەكەن و ئەوكات پۆستەكە دەدرێتەوە ئەوان.
لە ڕاستیدا نەدەبوو پەرلەمان لەوەزیاتر دوابكەوێت بەتایبەتی ناوچەكەو هەرێم بە قۆناغێكی زۆر هەستیار و چارەنووسسازدا تێدەپەڕێت و پێویستە هەرێمەكەشمان لەم بارودۆخەدا خاوەنی بڕیار و هەڵوێستی خۆی هەبێت و ئەمەش بە پەرلەمانێكی كارا دەكرێت، ئەمە سەرەڕای ئەوەی كە پەرلەمان دەتوانێت دەست بەجێبەجێكردنی هەموو ئەو بەڵێنانە بێت كە لەكاتی هەڵبژاردندا بانگەشەی بۆ كراوە و لەو ڕێگەیەشەوە حزبەكان بوونەتە خاوەن سەنگ و پێگەی خۆیان لە پەرلەماندا.
بۆیە دەنگدەر ناتوانێت لەوە زیاتر چاوەڕێی دەستبەكاربوونی پەرلەمان بوایە، ئەوان دەنگیان بەكاندیدەكان داوە بۆ ئەوەی ئەوان لەڕێی پەرلەمان و دانانی یاسای پێویست باری ژیان و گوزەرانیان كە چەندین ساڵە، بەتایبەتی دوای بوودجە نەناردن و مووچە بڕین كە لە ساڵی 2014 لەلایەن دەسەڵاتدارانی بەغداوە بڕدراو دەناڵێنێ، ئەمان ئەمڕۆ لە ڕێگەی پەرلەمانەوە كاری گورج و بەردەوامی لەسەر بكەن كە بژێوی هاووڵاتیان و دەرامەتیان بەرەو ئاقارێكی باشتر ببات و كۆتایی بە نەهامەتیەكانیان بهێنرێت كە ئەمڕۆ هەموو هیوا لەسەر ئەم خولەی پەرلەمان هەڵدەچنێت كە بتوانێ بەو پێكهاتەیەی ئەمڕۆوە كە زۆرینەیەكی لەبار لە ئارادایە، بەئاسانی بتوانێت بڕیاری بەجێ و گونجاو لەو باریەوە بدات و دەست بە چاكسازی و بنەبڕكردنی گەندەڵی و باری بژێوی خەڵك ومووچەخۆران باشتربكات.
ئیدی بەهیوای ئەوەی برادەرانی یەكێتیش دەستوبرد لە بڕیاری خۆیان بكەن و بەزووترین كات بەشداری چالاكییەكانی پەرلەمان ببن كە لایەنگرانی خۆشیان بێ گومان لە چاوەڕوانیدان.
