سوورە مەرگەیی
دوای پیلانە نێودەوڵەتیەكەی جەزائیر و نەخۆش كەوتنی بارزانی نەمر و دواتر كۆچ كردنی، ئەركی هەستانەوە و وڵامدانەوەی ئەو پیلانە نێودەوڵەتی و فرە جەمسەرە كەوتە سەرشانی كاك ئیدریس و سەرۆك مسعود بارزانی، ئەو دوو برایەش كە دوو گەنجی تێگەیشتوو لە كوردایەتی و پێگەیشتووی ناو قوتابخانەی رێبازی بارزانی نەمر بوون برایانە ئەو ئەركەیان گرتە ئەستۆ، ئەوە لە كاتێكدا بوو زۆرێك لە بەرپرس و بڕیار بە دەستانی ئەوكاتی شۆڕش بە راكردن لە بەرپرسیارێتی هەوڵیان دەدا شكستەكە بخەنە ئەستۆی بارزانی نەمر، بەشێكی تریشیان هەوڵیان دەدا لە كانیاوی ئەو شكستەدا جوانكاری سیاسی و شۆڕشگێڕی بۆ رابردووی پڕ لە خراپەكاری خۆیان بكەن و هەر بەو جوانكاریەوەش خۆیان نمایش بكەن، هەر چوار داگیركارەكەی كوردستانیش لەسەر ئەوە كۆك و هاوڕا بوون كە شۆڕش و بزووتنەوەی رزگاریخوازی كورد لە بازنەی ئەو شكستەدا گەمارۆ بدەن.
داگیركارانی كوردستان و ئەو بەشەی كە لە بەرپرسیارێتی رایان دەكرد و ئەو بەشەش كە جوانكاریان بۆ خۆیان دەكرد، لە خاڵی دوور خستنەوەی ماڵباتی بارزانی نەمر لە شۆڕش و بەرخودان یەكتریان دەگرتەوە، بەڵام پێچەوانەی چاوەڕوانیەكان كاك ئیدریس و سەرۆك مسعود بارزانی بە شاندانە بەر بەرپرسیارێتی جیا لەوەی گەمارۆی هەر چوار داگیركارەكەی كوردستانیان كردە پێخوستی شۆڕشگێڕی، چاوەڕوانی نەیارانی ناوخۆشیان كردە خەونێكی بەدی نەهاتوو و بە دۆست و دوژمنیشیان گوت: ئەوە ئێمەین خاوەنی بەرپرسیارێتی راستەقینەی هەستانەوەی دوای شكست و جوانكاری راستەقینەش بەردەوام بوونە لەسەر بەدیهێنانی خواست و ئامانجە نەتەوەییەكان.
هەر كەسێك بۆ تەنیا جارێك بە دیداری ئەو زاتە شۆڕشگێڕ و كوردپەروەرە گەیشتبێ و ئامۆژگاری و هەڵوێستە نەتەوەییەكانی بێنێتەوە پێش چاوی خۆی، دەزانێ كۆچی دوایی كاك ئیدریس لە رۆژی 31ـی1ـی1987 جیا لەوەی بۆشاییەكی گەورەی لەناو بزووتنەوەی رزگاریخوازی كورد جێهێشت، ئەركی سەرۆك مسعود بارزانیشی كردە دوو بەرامبەر، بەڵام ئەگەر دوور لە سۆز و رقی سیاسی هەڵوێستە نەتەوەییەكانی سەرۆك مسعود بارزانی بە بێژینگی شۆڕشگێڕی و كوردپەروەریدا بكەین، دەگەینە ئەو راستییە حاشا هەڵنەگرەی كە سەرۆك مسعود بارزانی بە پابەند بوونی بە رێبازی بارزانی نەمر، هەم توانی ئەو بۆشاییە پڕ بكاتەوە كە كۆچی دوایی كاك ئیدریس خستیە ناو بزووتنەوەی رزگاریخوازی كورد، هەمیش ئەركە دوولایەنیەكە سەركەوتووانە ئەنجام بدات، بۆیە لە ساڵیادی كۆچی دوایی كاك ئیدریس دەڵێم: باشترین وەفا و رێز گرتن لە خەبات و ئامانجەكانی ئەو زاتە شۆڕشگێڕە، پابەند بوونە بە رێبازی بارزانی نەمر و هەڵوێستە نەتەوەییەكانی سەرۆك مسعود بارزانی.
