د.مستەفا زەنگنە
بمانەوێ یان نەمانەوێ، هەرتاكێكی كوردستان بەشێوەیەك لە شێوەكان،پێیان لە داو و تەونی سیاسەتەوە ئاڵاوە،بۆیە منیش هەرچی بڵێم،دڵنیام خەڵكەكە،بەباڵای سیاسەت و لایەنێكدا قسەكانم لێك ئەدەنەوە،كە لەڕاستیشدا من لە دیدگایەكی نەتەوەییەوە بیروڕای خۆم دەخەمە ڕوو.كاك مەسرور بارزانی،سڵاوت لێبێت،پێش هەمووشتێك تۆ كوڕی پیاوێكیت هەموو دونیا حیسابی بۆ دەكات و پێشتریش من چەندین جار وتارم لەسەری نووسیوە،بارزانی نەمریش باپیری تۆیە،كە ئێمەو مانان لەشەست و یەكەوە تواناو گیانی خۆمان دایە دەستی بەڕێزیان و متمانەی تەواومان بەهەموو هەنگاوێكی هەبوو.تا ئەمڕۆش واین.
ئێستا سەرزەمانێكی ترە،حزبی زۆر و بەرژەوەندیی جیاو ئایدیۆلۆجیای جیا لەكوردستاندا پەیدابوون،لەعێراقیش بۆچوونی باش وخراپ دژی دۆزی كورد هەن،دەورو بەریش هیچ قسەی ناوێ و هەموو كەسێك دەزانێت چین؟! پێش ئەوەی كاندید بكرێی بۆ سەرۆكی ئەنجومەنی وەزیران كاك نێچیرڤان ئەندازیارێكی باشی ڕێكخستن و هەستانەوەو پاراستنی ئەم كیانە بوو، لە سەردەمێكدا ئەو ئەركەی بینی،كێشەی بودجەو هێرشی تیرۆرستان لە لوتكەدابوو. دیارە چرای ڕووناكی ڕێگاكەش جەنابی سەرۆك بارزانی بوو. كە بەحیكمەتی خۆی نەیهێشت پاپۆڕەكە نغرۆ بێت و هەموو تیا بچین.
لەئێستا بەدواوە،ئەركی تۆ قورستر دەبێت، پێویستیت بەهەموو ڕایەكی دروست و خەڵكی پسپۆر و لێزان و دڵسۆز هەیە،بەڵام لەهەموو گرنگتر ئەوەیە.
1- مەرجەعییەت بپارێزیت كە ڕاو مەشوورەكانی جەنابی سەرۆكەو وەكو چاوەكانت ئاگات لێی بێت.
2- پێویستە بەدیراسەو بەڵگە،دوور لەقسەی ئەم بەرپرس و ئەوكەسی نزیك، و بەویژدانێكی كورد پەروەرانەو دوور لە پەلەكردن، كەموكوڕییەكان دەستنیشان بكرێن و چارەسەر گونجاویان بۆ فەراهەم بكرێن. كەسی شیاو بۆ شوێنی شیاو دیاری بكرێن. ڕەنگە ساڵێك لەكاتی تۆ بگرێت بەڵام دوای ئەوە كارەكانت زۆر بەجوانی ئەڕۆن بەڕێوە.
3- ئەركێكی كەت لەپێشە كە زۆر گرانە،ئەویش نەهێشتنی بیرۆكراتییەتە لەبەڕێوەبردنی كاری دەوڵەتدا،چون بەجۆرێك كاردوا دەخێ و دەزگاكانیش پڕن لەكارمەند،كە مرۆڤ بێ تاقەت دەبێت،هێندەی موراجع و هاوڵاتی لەدایەرەكاندا بەدوای دۆسێ و مامەڵەكانیانەوەن،هێندە خەڵكی لەبازاڕی شێخەڵڵادا نابینڕێن،،سستەمی كاركردن زۆرسەقەتە.خەڵكانێك لەدوورەوە دێن بۆ واژوویەك دەجار دێنە دایەرەو،ئەوجا بۆی تەواونەكراوە.
4- سیمایەكی تری ناشیرنی كاری دەزگا حكومییەكان،نەبوونی و ونبوونی، مامڵەو دۆسێی هاوڵاتییانە،كە جۆرێك لەبەتەنگەوە نەهاتن و ڕێزنەگرتن لەهاوڵاتی دەگەیەنێت.
5- پێویستە ڕێزبەندیی ڕەزامەندیكردن لەسەركاری خەڵكی كەم بكرێنەوە..زۆرجار ژمارەی واژۆكان لەژمارەی وشەكانی داواكارییەكە زۆرترن.
6- پێویستە شكۆ بۆ مامۆستا و فەرمانبەران بگەڕێتەوە كارمەند لەنێو دەزگاكەو دایەرەكەی خۆیدا ڕێزی لێ بگیرێت.نەك ئیهانە بكرێت
7- دەزگاهەیە كارمەندی كەمە،دەزگاش هەیە دەیان كارمەندی هەیەو ڕۆژی چوار مامەڵە نایەتە پێشیان. رێكخستنەوەی هەیكەلی ئیداری زۆر گرنگەو،جومگەكان كەمكرێنەوە
8- خزم خزمێنەو خاترانە بنبڕ بكەن.دایەرە هەیە لەدەرگاوە تا بەرپرسی یەكەم هەموویان خزم و كەسی یەكن.یان زۆرجار كاربەدەسەتەكان ئەڵقەی تەواوكەری یەكن.
9- من نامەوێت باس لە مووچەو بژێویی خەڵك بكەم چون چاكردنی ئەو لایەنە،ئەركی پێشینەی دەستبەكاربوونەو دڵنیام لەئێستاوە پلانت بۆی داناوە. هەوڵ بدە پتر كارەكان وچاكسازی ناسنامەی ئەم كابینەیە بێت و بەدوادا چوون و لێ پێچینەوە، سیمای داد
پەروەرییە.و دەبێ وتارەكان كورت و شەفاف و كرۆكی مەبەست بپێكێ .
10- بێگومان سەركەوتنی بەڕێزتان و كاك نێچیرڤان بەواتای سەركەوتنی پارتییە،واتا سەركەوتنی میللەتێكە. خوانەخواستە هەر شكستییەكی ئێوە بەواتای بەڵگەدانە دەس نەیاران وئەوانیش لەخوایان دەوێ كە شەوو رۆژ قەوان لێ بدەن.
11- ئامان سەد ئامان،هەموو هیواكان كەوتۆتە دەستی ئێوە،سەبەتەی كاری ئێوە پڕەلەهێلكەو بەرد،ئاگاداربن هێلكەكان نەشكێن چون دوای بەردەكانیش پیس دەبن.
12- دڵسۆزانی ئەم خاك و میللەتە رۆحی خۆی دەبەخشێ،بۆیە ئامادەیە تاسەر ئێسك هاوكارتان بێت،،نەك بۆ مەبەستێكی شەخسی بەڵكو بۆ بتەوكردنی حكومەت و دۆزی نەتەوەیەك.
13- نووسینگەی سەرۆك ئەنجومەنی وەزیران دەبێ پێشوازی لە داخوازی هەموو كەسێك بكات و وەڵامیان بداتەوەو هەمووشارێكیش ئەو نووسینگەیەی لێ بێت.
14- پێویستە هەموو هەفتەیەك كارو ڕاپەڕاندنی ئەركەكانت لەماوەیەكی كورتدا لەڕێگای تەلەڤزیۆنەوە بەخەڵكی ڕا بگەیەنیت،تا ڕێگانەدەی خەڵكی داخ لەدڵ لەجیاتی تۆ قسە بكەن و دژی خۆتیش بەكاری بهێنن.
هیوای سەركەوتنتان بۆ دەخوازم .گەشبینم بەتواناكانتان،گەرچی دەزانم لەمپەرەكان زۆرن. هیوا داریشم لەم قسانەی من لەدڵگران نەبێت،چون لەسەرچاوەیەكی پاكەوە هەڵقوڵاوە.
