ساسان دەرویش-خەبات
وێڕای سەختی ساڵێكی پڕ لە ڕووداو و ئیشوئازار بۆ گەلەكەمان لە بەردەوامی قەیرانی ئابووری و جەنگی تیرۆریستانی داعش لە ساڵی 2018 هەروەها بە هۆی بارودۆخی ناسەقامگیریی عێراق و پێشێلكردنی ماددەكانی دەستوور و بڕینی موچە لە لایەن هەندێك بەرپرسی عێراق هۆكاربوون ، بەڵام خۆشبەختانەش بە خۆڕاگری خەڵكی كوردستان و هەوڵەكانی حكوومەتی هەرێمی كوردستان و رێكخستنەوەی پەیوەندییە نێودەوڵەتییەكانی و ئەنجامدانی هەڵبژاردنی پەرلەمان بۆ كوردستان و عێراق ساڵ تێپەڕی، بەڵام ئەوەی جێگەی داخ و نیگەرانی بوو بۆ تەواوی خەڵكی كوردستان لە هەمان ساڵدا هەڵكشانی كۆمەڵێك ئەستێرە بوون لە رۆشنبیران و نووسەران و خاوەن بیری جوانی كوردایەتی كە بە ئاسمانی بەرزی كوردستانەوە بۆ هەتاهەتایە ئەدرەوشێنەوە، كە بوونە خەزانی گەڵای پاییزی قەڵەمە هەڵوەریوەكان كە بە جوانی خۆیان ئێمەیان لە پاییز تۆران، راستە بە جەستە لەناومان نەمان، بەڵام كار و كردەوەكانیان بۆ هەمیشە بوونە وێردی سەرزمانی نەوە بۆ نەوەمان و بۆ بیرخستنەوە و بەرزڕاگرتنی هەڵوێستی جوانی كوردایەتیان و خەرمانی بەرهەمەكانیان و یادیان لە ناوماندا وێنە و ناوهێنانیان دەكەینە شادبوونی رەوانشادی و ئارام بوون لە گۆڕەكانیاندا .
-فەرهاد ئەبدولحەمید پاڵەوان لە ساڵی 1945 لە دایكبووە، پێشمەرگەیەكی دێرین و خاوەن بەرهەمی قەڵەم ونووسەر و سەرۆكی ئەنجوومەنی ناوەندی زەردەشتیان بوو لە 31/10/2018 كۆچی دواییكرد.
-حەكیم كاكەوەیس لە ساڵی 1949 لە دایكبووە، نووسەر و وەرگێڕ و رۆماننووس بووە خاوەنی 27 پەرتووكی چاپكراوە لە 18/11/ 2018 كۆچی دوایی كرد.
-فریاد شێخ حەسەن مەعرووف، لە ساڵی 1957 لە دایكبووە، پێشمەرگەی دێرین و خاوەن قەڵەم و بەرهەمی ئەدەبی و سیاسی بووە و ئەندامی ئەنجوومەنی ناوەندی زەردەشتیان بوو لە 21/11/2018 كۆچی دوایی كرد.
-پڕۆفیسۆر د.جەمال نەبەز مامۆستا و نووسەر و ئەكادیمی ناسراوی كورد، كە بە بیرمەندی بیری نەتەوەیی لە كوردستان دادەنرێت لە ساڵی 1933 لە دایكبووە، لە كۆی تەمەنی 85 ساڵیدا خاوەنی زیاتر لە 60 پەرتووكی چاپكراو و سەدان سیمینار و كۆڕی ئەدەبی و سیاسی و لێكۆڵینەوەی دۆزی كوردە لە 8/12/2018 كۆچی دواییكرد .
-رەئووف حەسەن لە ساڵی 1945 لە دایكبووە، نووسەر و چیڕۆكنووس و رەخنەگر بوو، خاوەنی چەندین شاكاری جوانی ئەدەبییە لە 20/12/2018 كۆچی دواییكرد.
