خه‌بات: رەمزی میرەكانی
دانی كارفاخال، بەرگریكاری لای راستی یانەی ریال مەدریدی ئیسپانی، دووپاتی كردەوە، هاوتیپەكەی ئیسكۆ، یاریزانێكی گرنگە لە ریزەكانی مێرینگێدا، ئاماژەی بەوەش كرد، بڕیاری بەشداریكردنی تەنیا بە دەستی راهێنەرە. كارفاخال لەو لێدوانەیدا، كە رۆژنامەی مۆندۆ دیپۆرتیڤۆی ئیسپانی هەندێكی بڵاو كردووەتەوە وتی:”ئیسكۆ یاریزانێكی پێشگەیشتووە، چەندین ساڵە لە ریزەكانی ریال مەدرید یاری دەكات، بەدڵنیاییەوە كە راهێنەر دەرفەتی پێ دەدات، دەیقۆزێتەوە”. وتیشی:”ئیسكۆ بۆ ئێمە یاریزانێكی گرنگە، زۆر شتمان پێشكەش دەكات، بڕیاری بەشداریكردن و نەكردنیشی تەنیا بەدەستی راهێنەرە، بەڵام بە بۆچوونی من یاریزانێكی باش و گرنگە بۆ تیپەكەمان”. شایستەی باسكردنە، راهێنەری ئەرجەنتینی سانتیاگۆ سۆلاری، لەوەتەی بووەتە راهێنەری تیپەكە، لە هیچ یارییەكی خولی ئیسپانیا، بە شێوەی سەرەكیی یاری بە ئیسكۆ نەكردووە، تەنیا لە جامی شا بەرامبەر میلیلە نەبێت، لە یاری رۆماش لە خولی یانە پاڵەوانەكانی ئەوروپا، لە لیستی تیپەكەی دوور خستەوە.
