نەزهەت حالی
ئێمەی كورد لەو سەردەمە و لەو سات و كاتە هەستیارەدا لە هەرێمی كوردستان، زیاتر لە هەموو كات پێویستیمان بە پەیڕەو كردنی سیاسەتی سازانی نێوخۆیی جیاواز لە ڕابردوو هەیە، دەبێت هەموومان ئەو باوەڕەمان لا دروست ببێت كە هێزی هەر گەلێك لە ناوەخۆی ئەو گەلە سەرچاوە دەگرێت، یەك هەڵوێستی و خەبات بۆ پاراستنی گەل و نیشتمان و بەرژەوەندییە باڵاكان دەبێت ئامانجی گشتی و هەموومان بێت، پێویستە سەردەمیانە بیربكەینەوە ریگە نەدەین كەس نێوماڵی خۆمان تێكبدات، ئەو دەستكەوتەی ئێستا وەكو گەلی كوردستان هەمانە لە حكوومەت و دامەزراوەكان و مافەكانمان ئەگەرچی بەدەر نییە لە كەموكورتی و نەگەیشتۆتە ئەو ئاستەی كە ئێمە تەواو پێیڕازی بین و داوای زیاتر نەكەین.
بەڵام لە ڕاستیدا ئەو ئەزموونە حوكمڕانییەی هەمانە كەم نییە و ئەركمانە بیپارێزین و پەرەی پێ بدەین، نابێت ڕێگە بە كەسانێك بدەین نەك ئەو سیستەمە تێكبدەن بەڵكو نابێت جەسارەتی ئەوەش بكەن باس لە تێكدانی بكەن، ڕوخاندنی سیستەمی سیاسی و حوكمڕانی گەلێكی زوڵملێكراوی وەكو گەلی كوردستان كە لە مێژووی هاوچەرخدا سیستەمێكی سیاسی خۆ بەڕێوە بردنی تا ئەو ئاستە بە خۆیەوە نەدیتوە، ئارەزووی نەیارانە، نەك ئارەزوو و ویستی كورد و كوردپەروەران، بەڵام لەبەر ئەوەی هیچ سیستم و دامەزراوەیەكی كامل و تەواو لە جیهان بوونی نەبووە و نابێت، ئەو سیستمە سیاسییەی كوردستانیش كامل و تەواو نییە و پێویستی بە ریفۆرم و چاككردنی بەردەوام هەیە.
ئەو ئەزموونەی كە هەمانە بە خوێن و فرمێسك و عارەقی شۆڕشگێڕانی گەلی كوردستان بونیادنراوە، هەر بۆیە بەر لەوەی بە دوای چارەسەر كردنی پرسی كورد لە دەرەوە و بۆ بەدەستهێنانی پاڵپشتی دەرەكی بگەڕێین، با لەنێو خۆمان بە دوای چارەسەركردنی دەردە كورد، كە دەردی دژایەتی كردنی یەكتری و خۆمانە بگەڕێین، دەردە كورد ڤایرۆسێكی كوشندەیە، كە لە دەروونی هەر تاكێكی كورد بوونی هەیە و لە نێوبردنی ئاسان نییە، وەكو “النفس الأمارە بالسوء) وایە، مرۆڤبەرەو خراپەكردن هان دەدات، چارەسەری ئەو دەردە لەنێو خودی خۆمانە، بە خۆشەویستی گەل و نیشتمان، بە خۆشەویستی یەكتری و بە گۆڕینی دیدی سیاسیمان دەتوانین نەك تەنیا بەهێز بین بەڵكو دەتوانین ئەو ڤایرۆسە لەنێوبەرین و ڕێگە بگرین لە گواستنەوەی ئەو ڤایرۆسە بۆ نەوەكانی داهاتوو.
گەلی كورد گەلێكی مەزنە بەڵام ئەو دەردە كوردە زۆر جار هۆكاری لاوازیەتی، هەر ئەو دەردە كوردە هۆكارێكیشە بۆ لە خۆبایی بوون و خۆ بە زلزانینی بێ مانایە لە بەرانبەر یەكتری. گەر بتوانین دەردە كورد لە نێو بەرین گەورەترین شۆڕشی سەردەمی گەلی كوردستان سەركەوتوو دەبێت، ئەو شۆڕشە پێویستی بە هیچ ڕێبەرو سەركردەیەك نییە، هەر كەسێك دەبێت سەركردە و ڕێبەری خۆی بێت.
