خه‌بات: مسلم دۆلەمەری:- ئیسرا جاسم، ژدایکبوویا باژێرێ دهۆکێ هەر ژ زارۆکینیی حەزب ڕەنگ و داهێنانێ کرییە ژ بەرهندێ بریاردا ڕێکا هونەری هەڵبژێریتو ل سەر ئاستێ ئەکادیمی پەرەی پێ بدەتو زانكویا جیهان پشکا پەروەردا شێوەکاری تەواو بکەت، دڤێ دیدارێدا ئیسرا جاسم، بۆمە بەحسێ ئەزموونا چەند ساڵیا هونەرێ شێوەکاریا خۆکرد.
*بابزانین تە ژکەنگی ڤەچوویە ناڤ جیهانا هونەری و ژ کیش قوتابخانا هونەری تە دەست پێکریە؟
دەستپێکا من یا ڕاستەقینە د جیهانا شێوەکاریێ دا د لایەنێ ئەکادیمی دا ژ سالێن خواندنێ ل زانكۆی دەست پێکر. ل دەستپێکێ وەک هەر هونەرمەندەکێ، من ب قوتابخانەیا ڕیالیزم (واقیعی) دەست پێکر بۆ هندێ پتر ل سەر کۆنترۆلکرنا هێل و کەرەستان شارەزا ببم، پاشان بەرەڤ قوتابخانەیێن دی یێن هونەری چووم بۆ هندێ هەستێن خۆ ئازادتر دەربڕم.
*تابلۆیێن تە پتر بەحسێ چ دکەنو و زێدەتر ل سەرکیش ستایلێ دچی؟
پتر بەحسا مرۆڤایەتیێ، سرووشت و ژیانا جڤاکی دکەن، ب تایبەتی ئەو بابەتێن کو پەیوەندی ب ئازار و هیوا دکەن. د کارێن خۆدا ئەز زێدەتر ستایلێ ئێکسپرێشنیزم (تەعبیری) و سوریاڵیزم بەکار دئینم، چونکی دەلیڤێ د دەنە من، کو دەربرینێ ژتشتێن شاراوە بکەم. دەربارەی ڕەنگان، ئەز حەز ژ بەکارئینانا ڕەنگێن زەیتی و ئەکڕیلیک دکەم و زۆربەی جاران ڕەنگێن گەرم و زیندوو بەکار دئینم کو هێز و ژیانێ دەخەنە ناخێ بەرهەمی.
*وەکێ شێوەکارەکا ئافرەت تاچەند د تابلۆیێن خۆدا تە گرنگیێ ب ئافرەتێ دایە؟
ئافرەت د ناڤ تابلۆیێن من داکێشەیەکا سەرەکی و هێمایەکە بۆ ژیان و بەردەوامیێ ,ئەز وەک شێوەکارەکا ئافرەت هەمیشە هەوڵ دایە دیتن و هەستێن ڕاستەقینە یێن ئافرەتێ چ ژ لایێ هێز و جوانیێ ڤە یان ژ لایێ ڕووبەڕوو بوونا ئاستەنگێن جڤاکی ڤە ب ڕێکا ڕەنگان نیشان بدەم ئافرەت د کارێن من دا نە تەنێ بابەتە بەڵکو پەیامەکە بۆ جڤاکی.
*ب دیتناتە ئافرەتێ شیایە د جیهانا هونەریدا پێگەهێ خۆبگریت؟
بێگومان ئافرەتێ شیا یە ل ڤان سالێن دوماهییێ ب سەلمینیت کو خودان دەنگ و تابلۆیێن ب هێزە و دشێت کارتێکرنێ ل سەرجیهانا هونەری بکەت. ڕاستە ئاستەنگ و بەربەست هەنە، بەڵکو ل سەر ئاستێ ناڤ خۆیی و نێودەوڵەتی ژن پێشەنگن د ناڤ پێشانگەهو بزاڤێن هونەریدا و توانییە ڕۆلێ خۆ ب سەرکەفتیانە ببینێت.
*تە چ تابلۆیێت تایبەت و خۆشتڤی یان کەسەکێ ڤەشارتی هەیە دژیانا هونەریا خۆدا؟
هەر تابلۆیەک ل دەف من پارچەیەکە ژ گیان و بیرهاتنێن مندا لەوما هەمی بۆمن د گرنگن, بەلێ هەمیشە تابلۆیا ئێکێ یا کومن پێش چاڤێن خەڵکی دانا تایبەتمەندییا خۆ هەیە. دەربارەی کەسێن شاراوە، بەلێ! د ناڤ زۆربەی تابلۆیێن من دا هێما، تیشک، یان کچەکا تەم و مژاوی هەیە کو ڕەنگدانە ڤەیا ناخێ منە یان کەسەکێ کاریگەری ل سەر ژیانا من کری و من دڤێت وەک نهێنیەک د ناڤبەرا من و تابلۆیێ دا بمێنیت و بینەر ب خۆ ل سەر بگەریت.
