ئاسایشی هەولێر دەستگیركردنی ئەو كەسەی ڕاگەیاند، كە نزیكەی 400 هەزار دۆلاری لە ماڵێک دزیبوو، دەڵێ: بەو پارەیەش ئۆتۆمبێل كڕیوە و گەشتی دەرەوەی وڵاتیشی پێكردووە.
ئەمڕۆ دووشەممە 29ـی 12ـی 2025، بەڕێوەبەرایەتیی ئاسایشی هەولێر ڕایگەیاند: “بە فەرمانی دادوەری لێکۆڵینەوەی ئاسایشی هەولێر تۆمەتبار (ش. س. ع)مان دەستگیر کرد، کە هەڵساوە بە ئەنجامدانی تاوانێکی دزیکردن لە ماڵی هاووڵاتییەک لە قەزای خەبات و بڕێکی زۆر پارە کە بە نزیکەی (400 هەزار دۆلار ) دەبێت، كە (27 مسقاڵ زێڕ) و (سێ ئامێری مۆبایل)یشی دزیوە.”
ئاسایشی هەولێر دەشڵێ: “بەر لە دەستگیرکردنی بەو پارە دزراوە هەڵساوە بە کڕینی ئۆتۆمبێل و سەفەری دەرەوەی وڵاتی کردووە، تاوەکوو خۆی لە پێش چاوی تیمەکانمان بزر بکات.”
ئەوەش دەخاتە ڕوو، كە “پەڕاوای لێکۆڵینەوەی ئاراستەی دادگا کراوە و لێکۆڵینەوەش بەردەوامە.”
ئاسایشی هەولێر سوپاسی هاووڵاتییان دەكات، كە هەمیشە هاوكاریانن لە پێدانیان زانیاری.
