سەرۆکی هەرێمی کوردستان لە پەیامێکدا بە بۆنەی یادی 55 ساڵەی دامەزراندنی یەکێتیی زانایانی ئایینی ئیسلامیی کوردستان، رایگەیاند: يه‌کێتيى زانايان و مامۆستايانى ئايينى، وه‌ک چۆن له سه‌رده‌مى شۆڕشدا خه‌باتيان کردووه و قوربانييان داوه، له سه‌رده‌مى ئازاديیشدا ئاماده‌يى و ڕۆڵى به‌رچاويان هه‌يه له قووڵکردنه‌وه‌ى کولتوورى پێکه‌وه‌ژيان و يه‌کترقبووڵکردن و لێبورده‌يى.
دەقی پەیامی سەرۆکی هەرێمی کوردستان بۆ یادی 55 ساڵەی دامەزراندنی یەکێتیی زانایانی ئایینی ئیسلامیی کوردستان
يادى (55) ساڵه‌ى دامه‌زراندنى يه‌کێتيى زانايانى ئايينى ئيسلامى کوردستان، به گه‌رمى له به‌ڕێزان سه‌رۆک و ئه‌ندامانى مه‌کته‌بى ته‌نفيزيى يه‌کێتيى زانايانى ئايينى ئيسلامى کوردستان و ته‌واوى مامۆستايان و زانايانى ئايينى پيرۆز ده‌که‌م، هيواى به‌رده‌واميى سه‌رکه‌وتنيان بۆ ده‌خوازم.
يه‌کێتيى زانايان و مامۆستايانى ئايينى، وه‌ک چۆن له سه‌رده‌مى شۆڕشدا خه‌باتيان کردووه و قوربانييان داوه، له سه‌رده‌مى ئازاديیشدا ئاماده‌يى و ڕۆڵى به‌رچاويان هه‌يه له قووڵکردنه‌وه‌ى کولتوورى پێکه‌وه‌ژيان و يه‌کترقبووڵکردن و لێبورده‌يى، هه‌روه‌ها له به‌ره‌نگاربوونه‌وه و نه‌هێشتنى بيرى توندڕه‌وى و ده‌مارگيرى و بره‌ودان به گيانى نيشتمانپه‌روه‌رى و ئاشتيى کۆمه‌ڵايه‌تى.
له‌م ياده‌دا شه‌هيدانى يه‌کێتيى زانايانى ئايينى ئيسلامى کوردستان به ڕێزه‌وه به‌بير ده‌هێنينه‌وه و دروود بۆ گيانى پاکيان ده‌نێرين، هه‌روه‌ها هه‌موو پشتگيرييه‌کمان بۆ کار و کۆششى يه‌کێتيى زانايان له‌پێناو ده‌ستبه‌رکردنى هه‌موو مافه‌کانى مامۆستايانى ئايينيدا دووپات ده‌که‌ينه‌وه.
جه‌خت ده‌که‌ينه‌وه که هه‌رێمى کوردستان بێ جياوازى بۆ هه‌ميشه به نيشتمانى پێکه‌وه‌ژيان بۆ هه‌موو پێکهاته ئايينى و نه‌ته‌وه‌يييه‌کانى ده‌مێنێته‌وه و به هه‌موو شێوه‌يه‌ک ڕووبه‌ڕووى گوتارى ڕق و هه‌ر هه‌وڵێک بۆ تێکدانى کولتوورى پێکه‌وه‌ژيان ده‌بينه‌وه.
نێچيرڤان بارزانى
سه‌رۆکى هه‌رێمى کوردستان
2025/9/21
