شەنگە هاوار كاكەیی
نیشتمان موڵکی هەموانە، موڵکی تاک بە تاکی کۆمەڵگایە، موڵکی چینی هەژار و دەوڵەمەند و کاسب و سەرمایەدارە، موڵکی ئافرەت و پیاو منداڵ و گەنج و پیرە ، لەو باوەڕەوە بەختەوەری تاک بەستراوەتە بە خاک. ئەگەر چاو بخشێنینە یاسا نێودەوڵەتییەکان دەربارەی وەرگرتنی مافی دەستەبەرکردنی ( جنسییە)تەجەنووس لە وڵاتانی ڕۆژاوا، کە بەپێی پڕەنسیپە یاساییە جیهانییەکان ڕێکخراوە، بەپێی ئەو یاسایە لە پاش تێپەربوونی چەند ساڵێک ماف دەبەخشرێتە ئەو پەنابەرانەی کە ڕوویان لەو وڵاتانە کردووە هەڵگری ڕەگەزنامەی ڕۆژاوایی بن، هەروەها بەهەمان شێوە ئەو مناڵانەی لەسەر خاکی ئەو وڵاتانە لە دایک ئەبن ڕاستەوخۆ ناسنامەی ئەو وڵاتەیان پێدەبەخشن کە وا باوانیان لێنیشتەجێن، لەم تێفکرینە دەگەینە ئەو باوەڕەی کە وا نیشتمان هەر نیشتمانێک یەکپۆشە و یەکڕەنگ و یەک بەرگی هەیە بۆ هەموان.
لەو بارەیەوە یەکێک لە بەرنامە و میتۆدە یاساییە سەرنجڕاکێشەکانی ئەو وڵاتانە بەدەر لە مافی نیشتەجێبوون (الإقامة )، وەکوو مافێکی بەخششدار (حق مکتسب )، دەستنیشانکردنی ڕۆژێکە بۆ بەڵێنی دووپاتبوونەوە ( قسم قانوني ) پێیان ڕادەگەیەندرێت و لە بەڵێنەکانیادا دووپاتدەکەنەوە کە خیانەت لە یاسا و ڕێسا و لە ئاووهەوا و خاکی ئەو وڵاتانە نەکەن کە وا مافی پەنابەراێتی و ڕەگەزنامەی پێبەخشیون، چوونکە لە مامەڵەکردن و هەڵسوکەوتی یاساییدا تاکی پەنابەر هیچ جیاوازییەکیان نییە لەگەڵ هاونیشتمانییەکی ڕۆژاوایی ڕەسەن، لەو ڕوانگەیەوە، ئەرکی سەرشانیانە بەوەفا و بەوەلا بمێنن بۆ ئەو نیشتمانە ڕۆژاواییەی کە وا ناسنامەی پێیان بەخشیوە، چوونکە لەڕووی هەڵگرتنی بەرپرسیارێتی و مافی هاووڵاتیبوون یەکسانن.
بەڵام! ئەوەی جێگای سەرنجە لە وڵاتی ئێمەدا؛ پشتگوێخستنی ڕیسکی نیشتمانییە وەلاخستنی ئینتیما و وەلائییەت کە لە هەست و نەستی بەشێک لە هاووڵاتیان زۆر لاوازە تا ڕادەی بێباوەڕی بە پرسە نیشتمانییەکان. هەرچەندە گەیشتن بەو دەرنجامە لە کاریگەریی ئالنگاری فەزای شیلوی بارودۆخ هۆکار و قورسی پەیداکردنی بژێوی ژیانە، هەڵبەتە ئاماژەدان بە فاکتەرەکان لە نووسینی وتارێک جێگای نابێتەوە، بە دەرخستنی گرنگترینیان ئەو لاپەڕە ڕەشبینییە نییە کە وا لە دڵ و دەروونی بەشێک لە هاووڵاتییان ڕسکاوە، لەکاتێکدا بە وزەی ئومێد نیشتمان لە بنیاتکردنەوەی دەرگای گەشەسەندنی ئابووری ڕۆژ لەدوای ڕۆژ لە هەرێمی کوردستان لەسەر پشت واڵاتر دەبێت لەوەی کە هەیە بۆ ژیانەوە و بونیادنانەوەی پڕۆژە ئابوورییەکان کە بە ستراتیج کەوتووەتە بواری جێبەجێکردنەوە.
بە سەرنجدان لەوەی زۆربەی گرفتەکان تەنیا گرفتی ڕۆژن و لە سەرچاوەی ئابووری سەریهەڵداوە، لەو حاڵەتەدا دەتوانین بە گەشبینییەوە بڵێین! گرفتەکان چارەسەرکردنیان دوگما نییە، ئەگەر لە ئێستادا بارودۆخ و پاشخانی ئابووریی نیشتمان لاوازی هەیە، بەڵام مەرج نییە لە ئایندەدا بەم لاوازییە بەردەوام بێت کە تەوژم و ئیرادەی بیناسازیی نیشتمانی لە گەشەسەندنێکی بەرچاوە؛ گەرەکە یەخەی ئومێد بەرنەدەین. بەو پێیەی بوونی ئەم گرفتانە کاتی و دەرەنجامی ململانێی دەرەکی و ناحەزانە بەرانبەر نیشتمان، بەڵام خۆڕسکیی ژیانی سادەی ڕۆژانەی هاووڵاتیی ئاسایی تێکداوە. لە ڕووبەڕووبوونەوەدا ئەوەی ئەرکی سەرشانە نیشتمانپارێز بین و هیوای بووژانەوەی کوردانە لەدەست نەدەین. ئاشکرایە پەیداکردنی بژێوی ژیان بەهۆی نەبوونی دەرفەتی کار قورس بووە، لە دانەمەزراندنی دەرچووانی زانکۆکان، سەرباری ئەمانە خراپیی هەڵسوڕاندنی ڕیتمی سیاسی و ئۆپۆزسیۆن ئەو دەنگە نەشازانەی کە وا هیچ حیسابێک بۆ ڕیسکی نیشتمانی ناکەن، هەمیشە مەسجی شەڕەنگێزییان و چەواشەکاری و کاڵکردنەوەی ئینتیمای نیشتمانییان هەیە لەپێناو هەڵتەکاندنی ئەو بۆن و بەرامە کوردییە کە هەیە لە هەرێمی کوردستان، بەمەش ئاو دەکەنە ئاشی دوژمن و داگیرکەر و ناحەزان و شڵەژاندنی ئاسایشی دەروونیی هاووڵاتییان و گومڕاکردنی هزری تاکی ئاسایی، هەوروەها ژاوەژاو و هات و هاواریان چەواشە و کاریگەریی نەرێنییان هەیە بەسەر هزرمەندیی کوردانە بۆ لەبیربردنەوەی خواستی سەرەکی هاونیشتمانییانی کوردستان کە ئازادی و سەربەخۆیی کوردستانە. لەبەرئەوەی نیشتمان موڵکی هەموانە، پێویستە خەڵکی کوردستان بە هەموو نەتەوە و ئایین و ئایینزاکانییەوە، نیشتمانپەروەرانە هەڵوێست وەرگرن لەسەر دیدگا و بۆچوونە نەرێنییەکانی دژی نیشتمان و نیشتمانپەروەران.
گرنگە بەوەفا و بەوەلا بن بۆ نیشتمانی بەشمەینەتی، چوونکە ئەگەر بەراوردی بکەین بە نیشتمانی گەلان لە جیهاندا جیاوازیی نیشتمانمان لەوەدایە کە سنوورەکانی بە قوربانیدان بەخوێنی گەش نەخشێنراوە. لێرەدا پرسیاری گریمانەیی ئەوەیە؟ ئایا ئەم هەرێمە ئەگەر ئەو قەوارەیەی نەما؛ ئەگەر داگیرکراو ڕاسپێردرا بە نەیارانی کورد!؛ ئایە چارەنوسی کچان و دایکانمان لە چارەنووسی کچانی ئێزدی و دروزی باشتر دەبێت؟!، ئایەخاوەندارێتیی نیشتمان بۆ کێ دەبێت؟!
