خه‌بات: په‌ری محه‌مه‌د:- ئەندامێکی خولی پێشووی پەڕلەمانی کوردستان دەڵێت، دادگا دەبێت بێلایەن بێت و نەک وەک ئامرازێک بۆ گوشار خستنە سەر هەرێمی كوردستان بەکاربێت. دەشڵیت، لە جیهاندا نییە کە وەزیرێک یان بەڕێوەبەرێکی حکوومەت بە ئاشکرا دژی بڕیارێکی دادگا یان پەرلەمان ڕاوەستێت و جێبەجێی نەکات. بەڵام لە عێراقدا، بەهۆی ئەو ئاڵۆزییە سیاسییەی هەیە ئه‌و شتانه ڕووده‌ده‌ن.
ئیدریس ئیسماعیل ئەندامی خولی پێنجەمی پەرلەمانی کوردستان تایبەت بە ڕۆژنامەی خەبات ڕایگەیاند: لە سەرەتاوە ئەم دادگایە ڕاستەخۆ و ناڕاستەخۆ دژی هەرێمی كوردستان بەکارهاتووە، چوونکە هەرکاتێک حکوومەتی عێراق بڕیارێک دەدات بەتایبەتی کە مەسەلەکە پەیوەست بێت بە هەرێمی کوردستان ئەوا بەدەستی دادگه‌ی فیدراڵی بڕیارەکان هەڵدەوەشێتەوە و جێبەجێ ناکرێت یان بەپێچەوانەوە خۆی دادگا دەبێت بێلایەن بێت و نەک وەک ئامرازێک بۆ گوشارخستنە سەر هەرێم.
ئه‌و ئه‌ندامه‌ی خولی پێشووی په‌رله‌مان گوتیشی: ئەو بارودۆخەی خەڵکی هەرێمی كوردستان تێیدایە، بە تایبەتی لە نێوانی دادگای فیدراڵی و حکوومەتی عێراق و وەزیری دارایی، بەهۆی ناکۆکییەکان و پەککەوتن لە جێبەجێکردنی یاسا و ڕێکكەوتنە سیاسییەکان، لە جیهاندا نییە، کە وەزیرێک یان بەڕێوەبەرێکی حکوومەتی بە ئاشکرا دژی بڕیارێکی دادگای فیدراڵی یان پەرلەمان ڕاوەستێت و جێبەجێی نەکات. بەڵام لە عێراقدا، بەهۆی ئەو ئاڵۆزییە سیاسییه‌ی كه هەیە ئه‌و كارانه ڕووده‌ده‌ن.
ئیدریس ئیسماعیل ئاماژەی بەوەش دا: لەبارەی گرووپە چەکدارەکانیشەوە، ئەوەش یەکێکە لە کێشە سەرەکییەکانی عێراق، کە ماوەی چەندین ساڵە بەردەوامە و حکوومەتی عێراق نەیتوانیوە بە تەواوی کۆنتڕۆڵیان بکات. ئەمەش دەبێتە هۆی نائارامی لە وڵاتدا، وەزیری دارایی دەتوانێت ڕاپۆرتێک بکات و بۆ حکوومەتی بنێرێت کە هەرێم چەند پارەی نەوت و دارایی ناردووە. بەڵام سزادان یان کۆنتڕۆڵی ڕاستەوخۆی هەرێمی كوردستان کاری ئەو نییە، ئەگەر عێراق بڕیاری سزادان یان کەمکردنەوەی بودجەی هەرێم بدات، ئەوە پێویستە لە ڕێگەی یاسایی و دادوەرییەوە بێت، نەک بە دەستی وەزیری دارایی، ناوبراو لەبارەی دەست لەکارکێشانەوەی ژماره‌یه‌ك ئه‌ندامی سه‌ره‌كی و یه‌ده‌گی دادگای فیدراڵی عێراق، نیشانەی ئەوەیە کە دەسەڵاتداران و سیاسییەکان دەیانەوێت کۆنتڕۆڵی دادگای فیدراڵی بکەن بۆ پێداچوونەوەی بڕیارەکان بە پێی ئارەزووی خۆیان.
