ڕێزان محەمەد مەلا
مانگی ڕابردوو یەكەم كۆنفرانسی ئافرەتان بە مەبەستی وەگڕ خستنی تواناكانیان بەسترا. ئەم كۆنفرانسە بە ئامادەبوونی سەرۆك بارزانی و دروشمی «بە تواناكانمان داهاتوو بنیات دەنێین» تونرا ببێتە خاڵی وەرچەرخان لە مێژووی بزووتنەوەی ئافرەتانی كوردستان و كاریگەری درێژخایەن لەسەر پێگە و ڕۆڵی ئافرەتان لە داڕشتنی داهاتووی هەرێمی كوردستانی دابنێت. بەشداریكردنی سەرۆك مەسعود بارزانی لەم كۆنفرانسەدا چەندین لایەنی گرنگی هەبوو: نیشانەی پشتگیری ڕاستەوخۆی باڵاترین ئاستی سیاسی بۆ ئافرەتان بوو، لە لایەكیتر متمانەی كۆمەڵگە و بەرپرسانی تر بەم جۆرە كۆنفرانسانە بەهێزتر دەكات. ئامادەبوونی سەرۆك بارزانی یارمەتیدەر بوو بۆ بەدواداچوونی جیددی دەربارەی بڕیارەكان و ئەم كۆنفرانسەی كردە ڕووداوێكی گرنگ لە سەر ئاستی هەرێم و ناوچەكە، حكومەت و حزبەكان و ڕێكخراوەكانی ئافرەتان لەژێر چەترێكدا كۆكردەوە و توانرا زەمینە بۆ گۆڕانكاری یاسایی پێویست خۆشتر بكات، دروشمی «بەتواناكانمان داهاتوو بنیات دەنێین» هێڵكاری ستراتیژی و فەلسەفەی ئەم كۆنفرانسەی ئافرەتان بوو كە ئەم دروشمە ئاماژە بە چەند ڕاستییەكی گرنگ دەكات:
١ـ بڕوابوون بەتواناكانی ئافرەتان وەك هێزێكی گرنگی گۆڕانكاری.
٢ـ ناسینی ڕۆڵی سەرەكی ئافرەتان لە بنیاتنانی داهاتووی هەرێمی كوردستان.
٣ـ گرنگی وەبەرهێنان لە پەرەپێدانی تواناكانی ئافرەتان.
٤ـ بانگەشەكردن بۆ بەشداری چالاكانەی ئافرەتان لە هەموو بوارەكان.
كۆنفرانسی ئافرەتان چەندین سوودی گرنگی دیكەش لەخۆدەگرێت، دەرفەت دەڕەخسێنێت بۆ گفتوگۆی ڕاستەوخۆی نێوان ئافرەتان و بەرپرسانی باڵا و ڕێكخراوەكانی ئافرەتان دەتوانن هەماهەنگی باشتر دروست بكەن و پلانی هاوبەش دابنێن، دەرفەت بۆ باسكردن و پەسەندكردنی ستراتیژی نوێ بۆ پێشخستنی پێگەی ئافرەتان دەرەخسێنێت، هەروەها یارمەتی دروستكردنی دەنگێكی یەكگرتووی بەهێز بۆ داواكارییەكانی ئافرەتان دەدات، لە لایەكیتر بەرزكردنەوەی هۆشیاری كۆمەڵگە دەربارەی گرنگی ڕۆڵی ئافرەتان لە ئەنجامی ئەو كۆنفڕانسە بوو، هەروەها دەرفەتێك بۆ نیشاندانی توانا و سەركەوتنی ئافرەتانی كوردستان و یارمەتی دروستكردنی تۆڕی پەیوەندی بەهێز لەنێوان ئافرەتانی كارا لە بوارە جیاوازەكان دروست دەكات.
