ئەنجـوومەنی وەزیرانی عێراق بە زۆرینەی دەنگ ڕۆژی هەڵبژاردنی داهاتووی پەرلەمانی دیاری کرد.
چوارشەممە، 09-04-2025، نووسینگەی ڕۆژنامەوانیی محەممەد شیاع سوودانی، سەرۆک وەزیرانی فیدراڵ بڵاوی کردووەتەوە، ئەنجـوومەنی وەزیران بە زۆرینەی دەنگ، 11-11-2025ـی وەکوو ڕۆژی هەڵبژاردنی داهاتووی پەرلەمانی عێراق دیاری کرد.
ئەمە لە کاتێکدایە، دوێنێ سێشەممە، 08-04-2025، هاوپەیمانیی چوارچێوەی ھەماھەنگی شیعەكان لە ڕاگەیەندراوێكدا جەختی لەوە کردەوە “پێویستە ھەڵبژاردنی داھاتووی پەرلەمانی عێراق لە وادەی دیاریكراوی خۆیدا كە مانگی ئۆكتۆبەری ئەمساڵە، بەڕێوە بچێت.”
چوارچێوەی ھەماھەنگی دووپاتیشی کردووەتەوە “ھیچ لایەنێك بۆی نییە ھەڵبژاردن دوا بخات یاخود ئەو خشتە کاتییانەی بۆ پرۆسەكە دانراوە، هەڵبوەشێنێتەوە.”
ھاوكات چوارچێوەی هەماهەنگی داوا لە حکوومەت دەکات کەشێکی لەبار بۆ هەڵبژاردنی داهاتووی پەرلەمانی عێراق بڕەخسێنێت، ئاسایشی هەڵبژاردنەکان دابین بکات و پاڵپشتیی کۆمسیۆنی باڵای سەربەخۆی هەڵبژاردنەکان بکات بۆ دڵنیابوون لە سەرکەوتنی پرۆسەکە.
