خەبات: مسلم دۆله‌مه‌ری:- هونه‌رمه‌ندی قامشلۆی ڕۆژئاوای كوردستان دڵیار، كه‌ئێستا له‌وڵاتی سوید ژیان به‌سه‌رده‌بات به هونه‌ره ڕەسەنەکەی خزمه‌ت به بواری هونه‌ری ڕه‌سه‌نی كوردی دەکات، له‌م دیداره‌دا دڵیار باس له ژیان و ئه‌زموونی هونه‌ری خۆی له ده‌ره‌وه‌ی وڵات ده‌كات.
*وه‌ك باس ده‌كه‌ن له ته‌مه‌نێكی زۆر بچووكه‌وه گۆرانیت گوتووە ئه‌وه چۆن بووە؟
من له ته‌مه‌نی پێنج ساڵییه‌وه گۆرانیم گووتووه، له‌و كاته برایه‌كم هونه‌رمه‌ند بوو گۆرانی ده‌گووت و ته‌مبوریشی ده‌ژه‌نی، ته‌مه‌نم زۆر بچوك بوو به‌ڵام ده‌نگم خۆشبوو له‌به‌ر ئه‌وه براكه‌م به به‌رده‌وامی گۆرانی پێده‌گوتم و خوشك و برا و دایك وباوكیشم هه‌وادار و جه‌ماوه‌رم بوون. به (ته‌زجیل) ده‌نگییان تۆمار ده‌كردم و بڵاویان ده‌كرده‌وه، براكه‌م له‌ته‌مه‌نی 12 ساڵی فێری ئامێری ته‌مبور ژه‌نینیشی كردم و دواتر فێری ژه‌نینی بزقشی كردم، ئیتر له‌وكاته‌وه توانیم وه‌ك هونه‌رمه‌ندێكی تازه پێگه‌یشت و به‌شداری ئاهه‌نگ و فیستیڤاڵەكان بكه‌م، یه‌كه‌م به‌رهه‌میشم به‌فه‌رمی له ساڵی 1998 بڵاوكرده‌وه له‌قامشلۆی ڕۆژئاوای كوردستان.
*هه‌ركاتێك ناوی هونه‌رمه‌ند دڵیار دێته سه‌ر زار ڕاسته‌وخۆ گۆرانی فۆلكلۆری كوردی دێته خه‌یاڵ بۆچی؟
ڕاستی من له‌ته‌واوی گۆرانییه‌كانمدا ته‌نها ئامێری بزق به‌كاردێنم كه خۆم ده‌یژه‌نم، ئه‌ویش ئامێرێكی ته‌واو فۆلكلۆری ڕۆژئاوایی كوردستانه، هه‌روه‌ها زۆر به‌ی گۆرانییه‌كانیشم هی قوتابخانه‌كانی هونه‌رمه‌ندانی گه‌وره‌ی كوردن وه‌ك ( محەمەد شێخۆ – سەید یوسف – سەعید گاباری – هتد… گۆرانییه‌كانیشم هه‌مه جۆرن، ئه‌ڤینی، نیشتمانپەروەری، نه‌ته‌وه‌یی…
*ئێستا له ده‌ره‌وه‌ی وڵات ژیان به‌سه‌ر ده‌به‌یت ده‌كرێ باس له ژیانی هونه‌ری خۆت بكه‌ی له هه‌نده‌ران؟
ماوه‌ی چه‌ند ساڵێكه له وڵاتی سوێد نیشته‌جێم له‌وێ به به‌رده‌وامی به‌شداری ئاهه‌نگه كوردستانییەکانم ده‌كرد تاوایلێهات زۆربه‌ی سوێدییه‌كانیش منیان بۆ ئاهه‌نگه‌كانی خۆیان بانگ ده‌كرد، دواتر له ساڵی 2017 به‌فه‌رمی له لایه‌ن به‌ڕێوه‌به‌ری ( ئۆرکستراها جۆرج گراهم ) ( تجی مایتان ) له سوید داواكرام وه‌ك هونه‌رمه‌ندێكی كورد ببم به ئه‌ندامیان، به‌خۆشحاڵییه‌وه تاكو ئێستا له‌م ئۆرکسترایه به‌رده‌وامم و به‌گۆرانی و میوزیكی كوردی توانیوومه خزمه‌تێكی باش به هونه‌ری فۆلكلۆری كوردی بكه‌م و به‌جیهانی بناسێنم.
*پێموایه گۆرانی دوێتیت له‌گه‌ڵ هونه‌رمه‌ندانی سوێدیش هه‌یه ئه‌وه كه‌ی بوو له‌گەڵ كێ بوو؟
به‌ڵێ دوایی ئه‌وه‌ی وه‌ك هونه‌رمه‌ندێكی كورد ده‌ركه‌وتم له نێو (ئۆرکستراها جۆرج گراهم) له‌سوید تێكه‌ڵ به ژماره‌یه‌كی زۆر لەهونه‌رمه‌ندانی بیانی بووم به‌م هۆیه‌وه له‌ساڵی 2019 له‌لایه‌ن هونه‌رمه‌ندان ( دووگه‌لیتۆ وتریسنایمی ) داوام لێكرا كه گۆرانییه‌كی كوردی و ئینگلیزی به‌یه‌كه‌وه بڵێین به‌میوزیكی كوردی، ئامێری بزقەکەش خۆم ده‌یژه‌نم به‌ناوی ( شاهین ئۆن لایك ئاستار ) ئه‌م گۆرانییه له سوێد زۆر ده‌نگی دایه‌وه ئێستاش به به‌رده‌وامی له‌ڕادیۆكانی سوید پەخش ده‌كرێته‌وه.
*چ جیاوازییه‌ك هه‌یه له‌پێشكه‌وتنی هونه‌ر له نێوان كوردستان وڵاتانی بیانی هەیە؟
وه‌ك ده‌بینم ڕۆژ به ڕۆژ له‌كوردستانیش هونه‌ر به‌ره‌وپێش ده‌ڕوات، به‌ڵام له وڵاتانی بیانی زیاتر گرنگی پێده‌درێت و هونه‌رمه‌ندیش ده‌توانێت زیاتر خۆی پێشبخات و زیاتریش به دیار بكه‌وێت، من خۆم له‌م ماوه‌یه‌ی كه له سوید ژیان به‌سه‌ر ده‌به‌م زیاتر توانیمه هونه‌ره‌كه‌م پێش بخه‌م و زیاتر توانیمه به‌شداری زۆربه‌ی ئاهه‌نگه‌كانی ده‌ره‌وه‌ی وڵات بکەم ، هه‌روه‌ها تاكو ئێستا چه‌ند خه‌ڵاتێکی گرنگی میوزیك ژه‌نین و گۆرانی گوتنم وه‌رگرتووه، له‌وانه خه‌ڵاتی ده‌زگەی ( ستیمی ) مافی هونه‌رمه‌ند و میوزیكژه‌نه‌كان له‌سوید، هه‌روه‌ها دیبلۆمی میوزیكژه‌نی پڕۆفیشناڵیشم وه‌رگرتووه ،له‌به‌ر ئه‌زه زۆرجار لێره پێم ده‌ڵێن سه‌فیری هونه‌ری كوردی له ئه‌سكه‌نافیا.
*هیچ كات هه‌وڵتنه‌داوه كه ( ئۆرکستراها جۆرج گراهم ) سویدی میوانداری كوردستان بكه‌ی؟
هه‌وڵمداوه، بەڵام پێویسته لایه‌نی په‌یوه‌ندار و حكوومه‌تی هه‌رێمی كوردستان بۆ یادێكی نه‌ته‌وه‌یی وه‌ك نه‌ورۆز یان شتێكی تر به‌فه‌رمی میوانداریمان بكه‌ن بۆ ئه‌وه‌ی ئێمه‌ش بتوانین به‌فه‌رمی سه‌ردانی كوردستان بكه‌ین و ئاهه‌نگ بگێرین ، ئێمه خۆشحاڵ ده‌بین وه‌ك ( ئۆرکستراها جۆرج گراهم ) له‌سوید داوامان لێبكه‌ن بۆ یادێکی وەک نه‌ورۆز بێینه كوردستان و له‌نێو نه‌ته‌وه‌ی خۆمان ئاهه‌نگی سه‌رساڵی كوردی بگێرین. له‌كۆتایدا من زۆر خۆشحاڵم به دیداره‌كه‌م بۆ ڕۆژنامه‌ی خه‌بات، به‌ڕاستی دیدارم بۆ خه‌بات خه‌ونێك وابوو، چونكه هه‌ر له‌ته‌مه‌نی هه‌رزه‌كاریمه‌وه من خوێنه‌رێكی سه‌رسه‌ختی خه‌بات بوومه و تاكو ئێستاش ڕۆژنامه‌ی خه‌بات لای من خۆشه‌ویسته.
