خه‌بات: ڕانیار دڵشاد: دوای كۆنگره‌ی 14 ی پارتی دیموكراتی كوردستان، یه‌كێك له بابه‌ته گرنگه‌كان، مه‌سه‌له‌ی ڕێژه‌ی ئافره‌ت بوو، له ئۆرگانه‌كاندا. ئه‌م هه‌نگاوه له كۆنگره‌ی چوارده‌وه ده‌ستی پێكرد، كه ڕێژه‌یه‌كی به‌رزی ئافره‌ت به‌شداریی كرد. ئێستا له هه‌نگاوێكی دیكه‌دا، پله‌ی به‌رپرسی ناوچه به ئافره‌ت ده‌درێت. له پارێزگای دهۆك و ده‌ڤه‌ری بادینان ئافره‌تێك، كرایه به‌رپرسی ناوچه، ئه‌ویش له سنووری لقی18، كه هه‌ڤاڵ (مه‌هدیه سه‌عدوڵڵا سه‌عید)ـه كراوه‌ته به‌رپرسی ناوچه‌ی دێره‌لوك. خه‌بات به پێویستی زانی ئه‌م هه‌ڤاڵه به‌سه‌ر بكاته‌وه.
*سه‌ره‌تا هه‌ڤاڵ مه‌هدیه، له‌باره‌ی ئه‌وه‌ی چۆن ئەو هەنگاوەی پارتی هەڵدەسەنگێنی، کە گرنگی بە ڕۆڵی ئافرەت دەدات، لە ڕووی عەمەلیشەوە ئێوە کران بە بەرپرسی ناوچە، کە یەکەم جارە ئافرەت دەبێتە بەرپرسی ناوچە؟ به ژیانی سیاسی و حزبیی ده‌ستی پێكرد، بۆ ئه‌م مه‌به‌سته، سه‌ره‌تایه‌‌كی له ژیانی خۆی له ناو حزبدا به‌م شێوه‌یه باس كرد:
– سالا(١٩٩٦) ل ئوردیگایێ زێوە وەلاتێ ئیرانێ، بوومە ئەنداما پارتی دیموکراتی کوردستان، سەر ب لژنا ئازادی ل ئوردیگایێ زێوە. ل سالا (١٩٩٩) ڤەگەریامە کوردستانێ، هەر بەردەوام بووم، ل سەر رێبازا بارزانی. ل سالا (٢٠٠٥) بوومە بەرپرسا ئافرەتان، ل سنورێ لژنا ناوچا دێرەلوکێ، ل سەر کارو چالاکیێن حیزبێ بەردەوام بوم. ل سالا (٢٠١٠) بوومە مەندوبا کونگرێ ئێکەتیا ئافرەتێن کوردستانێ و هەر بەردەوام بوم ل سەر کار و چالاکیێن خو. سالا (٢٠١٠) پشتی کونگرێ سێزدێ یێ پارتی، کونفرانس هاتنە کرن یێ پارتی دیموکراتی کوردستان، بوومە یەدەکا رێکخراوێ ب هاریکاری و پشتەڤان و باوەریا خەلکی. ل سالا (٢٠١٢) وەک کادیر ل بارەگایێ لقا (١٨) یا پارتی دیموکراتی کوردستان بەشێ جەماوەری، هاتمە وەرگرتن، بەرپرسایەتیا میلەڤێ ئافرەتان بمن هاتە راسپاردن.
ل سالا (٢٠١٤) دووبارە بوومە مەندوبا کونگرێ ئێکەتیا ئافرەتان، هەر ب هاریکاری و پشتەڤان و باوەریا جەماوەری، لێ ژبەر بارودوخێ ئەمنی و دەست درێژیا دوژمنێ گەلێ مە، کونگرە نەهاتە کرن، چنکو شەرەک هاتە کرن و چەکدارێن داعش خاکا پیروزا کوردستانێ داگیرکر، هەر بەردەوام بووم و من دەست نەداهێلا ژ رێبازا پیروزا بارزانی.
ل سالا (٢٠٢٢) وەک ئەنداما کونگرێ (١٤) یێ پارتی دیموکراتی کوردستان هاتمە هەلبژارتن، ب هاریکاری و پشتەڤانی و باوەریا ئەندامێن رێبازا پیروزا بارزانی،و پشتی کونگرێ (١٤) هاتیە کرن سەرکردایەتیا پارتی، دگەل مەکتەبا رێکخستنا پارتی و لقا (١٨) یا پارتی، ئەو باوەری دایە من، کو بهێمە هەلبژارتن وەک بەرپرسەک.
رێکەفتی (٢٠٢٣/٨/١٣) وەک بەرپرسا لژنا ناوچا دێرەلوک، یا سەر ب لقا (١٨) ڤە دەست ب کاربووم، هەر د کونگرێ (١٤) دا، د پروگرام و پەیرەوێ پارتی، مادێ (٤٩) بەحس ل یەکسانی هاوسەنگی، د ناڤ بەرا رەگەزێ مێ و نێر دا هاتبو کرن، کو بەرامبەر بەرپرسیارەتی و سەرکردایەتیێ دا، ئەڤ پێنگاڤە یا باش بوو، کو ئەز وەک ئێکەم ئافرەت هاتمە هەلبژارتن د بەرپرسیارەتیێ دا، کو ئەڤە دێ بیتە رێک خوش کەرەک، بو هەر ئافرەتەکێ، کو ڤی کاری رابیت و رولێ خو ببینیت، دناڤ ئورگانێن حیزبی دا.
*له‌باره‌ی ئه‌وه‌ی ئاخۆ خەڵکی ناوچەکە چۆن سەیری ئەو هەنگاوەی پارتی دیموكراتی كوردستان دەکەن، گووتی: خەلکێ ڤێ ناوچێ، کو ژ هەمی تەخو چینا پێک دهێت، ڤێ پێنگاڤا پارتی، باش ل قەلەم ددەن. چونکی ئافرەت مل ب ملێ زەلامی ڤە، شورەش دیڤ شورەشێ خەبات کریە، زەلامان ب چەکێ شەرەڤێ، ئافرەتان ژی ب زەند و باسکێن خو. ئەڤ دەلیڤە، دەلیڤەکا نویە د پەیرەوێ پارتی دا، کو ئافرەت هەلبژارتی و ئافرەت رولێ خو بینیت، هەروەسا ئەڤە دەلیڤەکا باشە، ئافرەت ب هێتە دناڤ مەیدانا بەرپرسیارەتیێ و سەرکردایەتیێ دا، باوەری ب خو هەبیتن، داکو ب سەرکەڤیت.
*له‌باره‌ی ئه‌وه‌ی ئاخۆ به‌رنامه‌ی هه‌ڤاڵ مه‌هدیه بۆ قۆناغی داهاتوو چییه، گووتی: بەرنامێ مەیێ داهاتی دا، ئەوو کو پارتی پشتی کونگرێ (١٤)ێ ب ئیرادەکا بهێز و باوەریەکا تمام هاتیە مەیدانێ. دا بەرنامێ مە ئەوە، رێکخستیێن پارتی و لایەنگیرێن پارتی، زێدە بکەین، کار ل سەر گەنجێن وەلاتی بکەین، کو گەنجێن مە زوور خو مەخدور دبینن. پلانێن باش و بەرنامێن جیواز، بو تەخا گەنجا دارێژین، چنکو گەنج پاشەروژا هەر وەلاتەکێ نە. سەرنجا جەماوەرێ خو راکێشین، هەروەسا وێ باوەریا کو ب مە و رێبازا مە ئینای باشتر لێ بکەین، ئافرەت روولێ خو ببینیت، پتر گرنگی ب ئافرەتێ بهێتە دان، د مەیدانا کارکرنێ دا.
