خەبات: هەولێر:- لەژێر چاودێری پارێزگاری هەولێر و بەئامادەبوونی نەبەز عەبدولحەمید، قائیمقامی ناوەند و ژمارەیەك لە پەرلەمانتار و هونەرمەندان و نووسەران و ڕۆشنبیرانی شاری هەولێر و خانەوادە و دۆستانی هونەرمەند، لە مۆزەخانە و ئەرشیفی پەروەردەی هەولێر مێزی یادەوەری و دیكۆمێنت و بەشێك لە كەل و پەل و یادەورەییەكانی قوتابی دێرینی ئەربیل ئولا و هونەرمەندی گەورەی شارەكەمان (سەلام كۆیی) كرایەوە.لەڕێورەسمەكەدا، پارێزگاری هەولێر، لەوتارێكدا ڕایگەیاند: “سەلام كۆیی ئەو ناوە بەرزەییە كە لەڕێگەی بەرهەمەكانی و مێژووی كارە هونەرییەكانیەوە خەمەكانی نیشتمان و ئازارەكانی نەتەوەكەی كردۆتە پەیامێك و تێكەڵ بە تێكست و دەقە شانۆییەكان و نواندن كردووە و گوزارشتكارێكی ڕاستەقینەی میللەكەی بووە، بۆیە هەمیشە بەرهەم و كارو كردەوە و كارە هونەرییەكانی بەزیندووی لەلامان دەمێنێتەوە، ئەوەی ئەمڕۆش بۆ ئەو جوامێرە كراوە وەفایەكی كەمە دەرهەق بە مێژووی پڕ لە سەروەری هونەری سەلام كۆیی” پارێزگاری هەولێر گوتیشی: “ئێمەی خەڵكی هەولێر و كوردستان شانازیی بە مێژووی پرسەروەری هەولێر دەكەین، ئەو مێژووەی بە كەسانانی جوامێری وەك سەلام كۆیی دروست بووە كە بەشێكن لەمێژووی شارەكەمان و هەموومان شانازیان پێ دەكەین”