خەبات: ساسان دەروێش – هۆڵەندا:- خێزانێكی هۆڵەندی كە بریتی بوون لە چەند كەسێ ، لەژن ومێردێك وكچەكانیان و زاوەیەكی كورد لە شاری ئەمستردامەوە بۆ یەكەم جار سەردانی كوردستانیان كرد ، بەمەبەستی پشت ڕاستكردنەوەی ئەوزانیاریانەی لەسەر كوردوكوردستان هەیان بوو لە جوانی سروست ومیوان دۆستی كورد و خواردنی بەتام و ئازایەتی پێشمەرگەو خۆڕاگری خەڵك لەبەرامبەر دوژمنەكانیان، هەموو ئەمانەیان لەگەشتێكی پڕلە چێژی چەند هەفتەی لەشار و شارۆچكەكانی كوردستان وبەتایبەتی هەولێر و هاوینە هەوارەكانیان بەسەركردەوە،لەدوای گەڕانەوەین بۆهۆڵەندا دەربارەی گەشتەكەیان بۆ كوردستان بۆ خەبات دوان:

ناسینی كورد و كوردستان
سەرەتا (tom van der scheld) دەربارەی ناسینی كوردوئاشنایەتی مێژووی كوردستان گوتی : لە دوای كۆچڕەوەكەی ملیۆنی كورد لە دەستی دیكتاتۆری سەددام لە شاشەكانی تیڤیەكانمانەوە كوردمان ناسی كە ڕاپەڕینیان دژ بەگۆڕینی دەستەڵاتی بەعس كردبوو بە ئاگروئاسن وەڵامی كورد درایەوە ،بەڵام بە ئیرادەی بەهێزیان سەركەوتن وبوونە خاوەنی نیمچە دەوڵەتێكی خۆیان كە ئێمە ئەم ساڵ بۆ یەكەمجارگەشتێكمان بۆلایان كردوهەموو ڕۆژەكانمان لەوێ بوونە یادگاری وهیچ كات لەبیرمان ناچنەوە ، ئای لەوسروشتە جوانەی كوردستان وشاخ وكانیاوەكانی وخەڵكە میوان دۆستەكەی وخواردنە بەتامەكانی كوردی و جوانی جلوبەرگی پێشمەرگەو پۆشاكی كوردی ئافرەتان و شارستانیەتی پڕ لە كولتورو پێكەوەژیان ڕەنگدانەوەی هەیە لەم نیشتیمانە كە بەچاوی سەرنج وتێكەڵیمان لە ڕۆژەكانی كوردستان لەگەڵ خەڵك ومامەڵەكردن لە بازاڕوشوێنە گشتییەكان هەموویانمان بینی بەچاوی خۆمان ، كوردستانمان زیاتر خۆش ویست وهیچ كات كوردستان لەبیر ناكەین.

تێكەڵیمان لەگەڵ خێزانێكی كورد
هەروەها خاتوو ( van der scheld Angelique) لەبارەی ناسینی خێزانێكی كوردوتێكەڵیان گوتی : ئێمە نیشتەجێی گوندێكین لە باشووری هۆڵەندا ، سەرقاڵی ژیانی خۆمانین هەریەكەمان لەكاركردنمان لە فەرمانگەكانی هەمان شار ، لە دوای هاتنی كۆچبەران لە ساڵانی نەوەتەكان بۆ هۆڵەندا ، خێزانێكی كوردیش ڕوویان لەم گوندەی ئێمە كرد ، مامۆستا عەدنان وخاتوو فەزیلە شۆڕش ومنداڵەكانی، سەرەتا هەموو شت بۆ ئەوان نامۆ بوو لەبەر ئەوەی لە نیشتیمانێكی پڕ لەجەنگەوە هاتبوون، زمان وكولتوری ئێمەیان نەدەزانی وئێمەش پێشوازییەكی گەرمان لێكردن وەك خەڵكی گوندەكەوفەرمانگەكانی و هەرزووش خۆیان دەیانویست خۆیان بگونجێنن ودەچوونە قوتابخانە بۆ ئەوەی فێری زمانەكەبن ومنداڵەكانیان بەهەمان شێوە تا مافی پەنابەری هەمیشەییان وەرگرت وبوونە هاوڵاتی هۆڵەندی ،لەكۆتاییەكانی قوتابخانەش كچەكەی ئێمە لەگەڵ كوڕی ئەوان عەبدوڵلا عەدنان، هاوسەرگیریان كردوبوونە خاوەنی چەند مندالێك ، لە خزمایەتی ئەمانەوە زۆر لە مێژووی كورد ئاشنابووین وبەهەمیشەی چاومان لە كوردستان بوو كە سەردانی بكەین وئەوخەون و خەیاڵەی كە عاشق بوونمانی بۆ كوردستان بوو لەگەشتێكدا بڕەوینینەوە.

ساڵانە سەردانی كوردستان دەكەین
هەروەها خاتوو ( Naomi van der schelde ) خێزانی عەبدوڵلای كورد ، دەربارە گەشتەكەیان بۆ كوردستان گوتی : زۆر بەداخەوە كە كوردستان وڵاتێكی سەربەخۆنیە كەهەمووسیفاتێكی دەوڵەت بوونی هەیە وتا ئێستاش لەژێر هەڕەشەدایە كە خۆیان توانیویانە بە ئیمكانیەتێكی بچووك لە حكوومەتەكەیان وڵاتەكەیان ئاوەدان وپڕ لە پێشكەوتن كردوە، بەڕاستی سەرسام بووین ، چیرۆكی ئازایەتی پێشمەرگەمان لەم خێزانە كوردەوە بیستبوو وەك ئەفسانەیەك كە دژی تیرۆریستانی داعش لەبری جیهان شەڕیان كردوسەركەوتن نموونەی جوانی ئافرەتی كوردیش دنیای سەرسام كرد ، لەدوای ئەم گەشتەمان بۆ كوردستان وئەوپێشوازییە گەرمەی خزمان ودۆستانی هاوسەرەكەم ، هانیان داین ساڵانە سەردانیان بكەین هەرچەندە خۆم چەندجارێك چوومەتە كوردستان ،بەڵام بۆ باوك ودایك وخوشكەكەم، یەكەم جاریان بوو ،بەڕاستی پشوویەكی خۆشمان لەگەڵیان بردەسەر بەتایبەتی لە هاوینەهەوارەكان ودیمەنەجوانەكانی چیاكان ومرۆڤ دۆستی كوردومیوانداریان بەپێشكەشكردنی خواردنە خۆشەكانیان ودیاری بەخشین پێمان ، ئەوەی لە رابردوودا پێشكەشی ئەم خێزانە كوردەمان كردبوو بەم گەشتەمان قەرزاریان كردین كە كوردوكوردستان لە یادگاریەكانمان بۆ هەتاهەتایە بمێنن وبەهیواین كوردستان سەركەوێت وبگەنە ئامانجە پیرۆزەكەیان لەهەبوونی دەوڵەتێكی سەربەخۆ كە ئاگادربووین كە چەند هەوڵیان بۆ دا بەڵام پیلانگێڕان بوونە بەربەست، بەڵام نائومێدنین ونیشتیمانپەروەرن ، من بەم خێزانە كوردەدا دەزانین كە لەهۆڵەندا شەوڕۆژ كاربۆ كوردستان دەكەن ودەیانەوێ پرسی كورد بگاتە دنیا بەتایبەتی خاتوو فەزیلە.

هیچ شوێنێكی دنیا وەك كوردستان ئارام نەبووە بۆمان
لە كۆتایشدا (van der scheld tom) ئەوەی نەشاردەوەوگوتی : ئەوەی زۆر سەرنجمانی ڕاكێشا ئەو ئارامیەیە كە كوردستان بە خۆیەوە بینیوە ، چەند وڵاتانی تری ڕۆژهەڵات گەڕاوین وهەستمان بەئارامی و بەرقەراربووی ئاسایشمان نەكردووە ، ئازادی وسەربەخۆیی ئافرەتی كورد زۆر بەرچاو بوو لە كوردستان كە جێگای خۆشحاڵی بوو، بەداخەوە كەمێك نیگەران بووم ، كە هەندێك خەڵك خەمخۆری ژینگەپارێزی وپاكوخوێنی شوێنەكانی خۆیان نابن وپابەند نین بەوپرسە گەورەیە كە ژیانیان جوانتر دەكات لەنێو ئەوهەمووسروشتە جوانەی كوردستان كە چەند دڵفڕینە لەهەوای سازگار ، سەرسامی شوێنەوارە مێژوویەكان بووین بەتایبەتی مێژووی پایتەختی كوردستان شاری هەولێری قەڵاومنارەوزۆر شتی تر ، ئەوەی زۆر جێگای داخە ئەوەیەكە لەلایەن ڕاگەیاندنی وڵاتانی دەرەوە بەتایبەتی ئەورووپا هیچ باس لە پێشكەوتن و ئارامی كوردستان ناكەن ،بەڵكو تەنیا باس لەلایەنی شەڕوناخۆشیەكان دەكەن بۆیە بەداخەوە خەڵك لە ئەورووپا زۆر هەوڵ نادەن كە سەردانی كوردستان بكەن ، زۆر سوپاسی مامۆستا عەدنان وخاتوو فەزیلە شۆڕش وزاواكەمان عەبدوڵلا دەكەین كە ئەم دەرفەتە جوانەیان بۆ ڕەخساندین لەنێو وڵاتەكەی خۆیان ومیواندارێكی جوانیان كردین لەناوكەسوكارەكەیان زۆر دڵخۆشیان كردین وجارێكی تر سوپاسیان دەكەین.