خەبات: موسلیم دۆڵەمەڕی:- زۆرن ئەو هونەرمەندانەی كەتەمەنێكی بچووكیان هەیە بەڵام خزمەتێكی گەورەو جێ پەنجەی دیاریان هەیە لەنێو جیهانی هونەری كوردیدا . هونەرمەندی شێوەكارو پەیكەرساز عارس صاڵح یەكێكە لەوهونەرمەندە گەنجانەی كەلەتەمەنی بچووكی هونەری خۆیدا خزمەتێكی گەورەی بەهونەری شێوەكاری وپەیكەرسازی كوردستان كردووە.

عارس ئارت كێیەو كەی دەستی بەهونەری شێوەكاری وپەیكەر سازی كردووە؟
من عارس صاڵح خەڵكی گوندی باقەشپێی سەربەناحیەی گردەسێنی قەزای ئاكرێم , هەرلەپۆلی نۆیەمی بنەڕەتی دەستم بەكاری شێوەكاری كردووەو تابلۆی جۆراوجۆرم دروستدەكرد تاوای لێهات لەبەر زۆری حەزی شێوەكاریم وحەزی پەیكەرسازیم لەپەیمانگای هونەرەجوانەكانی ئاكرێ بەشی پەیكەرسازی وەرگیرام و خۆشبەختانە بەسەركەوتوویی ئەم بەشەم تەواوكرد.

لەسەر چ ڕێبازێك كاردەكەیو تابلۆكان وپەیكەرەكانیشت زیاترلەسەرچین؟
بێگومان سەرەتای كاری هەرهونەرمەندێك دەبێ لەسەر شێوازی لاسایی و رێبازەجیاجیاكانی جیهانیی و ناوخۆیی بێت بۆئەوەی بتوانی شارەزایی باش لەبوارەجیاجیاكانی هونەری جیهانی و ناوخۆی وەرگرێ. بەڵام ئێستا من ڕێبازی تایبەتی خۆم هەیەو گشت تابلۆو پەیكەرەكانم بیرۆكەو كاری تایبەتی خۆمن و سەبارەت بەتابلۆ و پەیكەرەكانم زیاتر لەسەر سەركردەی كوردوقارەمانیەتی براپێشمەرگەكان وجوتیارو هەژارانی گەلەكەمن.

بۆچی زیاترڕەنگی ڕەش لەتابلۆكانت بەدیدەكرێت؟
من گشت ڕەنگەكان لەتابلۆكانم بەكار دێنم بەڵام پرسیارەكەشت زۆر ڕاستە زیاتر ڕەنگی ڕەش بەكاردێنم و زۆرحەزیشم بەڕەنگی ڕەش هەیە چونكە دەمەوێت بەڕەنگی ڕەشی تابلۆكانم ئێش وئازارو مەینەتی چەندین ساڵەی گەلەكەم بەجیهان بناسێنم.

خۆت دەرچووی بەشی پەیكەرسازی بۆچی زیاترگرنگی بەكاری شێوەكاری دەدەی؟
ڕاستە من دەرچووی بەشی پەیكەرسازیم بەڵام شێوەكاری حەزی منداڵیمە وكاركردنی ئاسانترەو داواكاریشی زیاترە لەلایەن خەڵكەوە ,چونكە كاری پەیكەرسازی كەلوپەل وخەرجی زیاترو كاتی زیاتری پێویستەو داواكاریشی زۆركەمە لەلایەن خەڵكەوە بۆیە من زیاتر كاری شێوەكاری دەكەم بۆئەوەی بتوانم زیاترسەرنجی هونەردۆستان ڕابكێشم و هەروەها بتوانم هونەرەكەم بەشێوەیەك لەشێوەكان ببێتە سەرچاوەیەك بۆ بژێوی ژیانم وسەرچاوەیەكیش بۆبەرەو پێشخستنی زیاتری هونەرەكەم.