هۆشەنگ باوانی
بیستوومە ودەڵێن بەکارێزما بوون یاخود باشترە بڵێم کەسایەتیە کارێزماکان هەندێ خسڵەت و ئاکاروتایبەتمەندیان هەیە کە بێگومان لەکەسە ئاساییەکاندا کەمتربەدى دەکرێن . لەوانەش زێدەتر پشتبەستن بە عەقلانیەت , سادەیی وخاکى بوون , پشتنەبەستن بە وەهم وئیلهام , بڕوا نەبوون بە هەرەس وکۆست ونسکۆ, هێزوحزوورى بەردەوام , ئەمانە و ڕەنگە سیفەتى ترى گرینگتریش مابن.

بەهەرحاڵ زیاترمن نیازمە باس لە کارێزماى نیشتمان پەروەرى وخۆبەستنەوە بەخاکى وولات وقوربانیدان بۆپاراستنى سەروەرى خود و تاکى نەتەوە و ململانێ لەپێناومانەوەی گەل لەچوارچێوەى رێبازو مەنهەجییەتێکى درێژخایەن بکەم کە لەفەرهەنگى ئێمەدا بە شۆڕش و بەرخودان وڕاپەڕین و خەباتى چەکدارى ناسراو وپێناسەکراون، پێشمەرگەیەک کە ئێستا تەمەنى ژیانى ٧٦ ساڵە وتەمەنى خەبات وکوردپەروەرییەکەى ٦١ ساڵە و سەربارى چەندین برین و زامى قووڵى قوڕبانیەکانى گەل ومیللەت وبنەماڵەکەى و چەندىن کۆدێتا و پیلان و نسکۆ و هەوڵەکانى سڕینەوەى نەتەوەکەى , ئێستاش لەسەر تەواوى ئاستە جیاجیاکانى سیاسەت و کوردایەتى ئەسپى خۆى لەمەیدانى دەوڵتبوون و سەربەخۆیی دا تاو دەدات و بێ سڵەمینەوە وبە متمانە بە خود هەنگاوەکانى لەبەردەوامى دان. ئەو پیشمەرگەیەش , کارێزما(( مەسعود بارزانى))یە.

کەدەڵێم کارێزما مەبەستم چەمکە هزرى وفەلسەفیەکەیە چونکێ خسلەت وخاسیەتە سەرەکیەکانى مەرجەعییەت وکارێزمایی وەکو دوو گیان لەیەک جەستەى دا هەڵگرتوون، با بێمە سەر خوێندنەوەکەم بۆ خود لە گووتارەکانى و کورتە شڕۆڤەیەک لەئاست ووردى و دیقەت وئایندەبینى و ڕووئیا دوورەکانى بۆ پاشەڕۆژى گەل ووڵات, خۆزگە خوازم تاڕادەیەک سەرکەوتووبم. زیاتردەچمە نیو قووڵایی و ووردبینیەکانی بەڕێزیان لە هەردوو گووتارەکانى دەستپێک و کۆتایی هاتنى کۆنگرەی ١٤ى پارتى لە ٣-٦ى نۆڤێمبەرى ئەم ساڵدا کە لە پارێزگاى دهۆک بەسترا.

بەکارهێنانى دەستەواژەى ((من ئەوکەسەنیم … یان من لەوکەسانەنیم)) کەلە دوا ووتارى هەڵمەتى پڕۆسەى ڕیفڕاندۆمى ٢٥ى ئەیلولى ٢٠٠١٧ لەشارى هەولێرى پایتەختى هەرێم زۆر بەڕوونى ئاماژەى بەوەدا کە ((من ئەوکەسە نیم خۆم شەرمەزارى میللەتەکەم بکەم )) وئەمجارەش لە کۆتایى کارەکانى کۆنگرەدا ڕوونترفەرمووى ((من لەوکەسانە نیم کە هەتا دواى سەرۆک بم یان بەرپرس بم)) , سەربارى ئەوەى کە ماوەى نێوان ئەو دوودەربڕینە نزیکەى شەش ساڵێک دەبێت بەڵام ڕۆحى شاراوەى هەردوو دەربڕینەکە یەکە و ئا لێرە دا قوڵایی ستراتیجیەتى هزرى سەرۆک بۆ ئایندە و پاشەڕۆژوچارەنووسى حزب و هەرێم ونەتەوە دەست نیشان دەکرێت , بەڵکو ئەگەر هەڵە نەبم دەبێ وەک ڕێبازێک بخوێندرێتەوە.ئەو کارێزما سیاسییەى کەنەیەوێت لە گەورەترین وپیرۆزترین پڕۆسەى سیاسیدا کەسەربەخۆیی میللەتەکەیەتى خۆى شەرمەزارى گەل وووڵاتەکەى نەکات, دەبێ هەرهەمان ئەوکارێزمایە بێت کە بەغەیرى خزمەت وتێکۆشان وخەبات هیچ مەرەمێکى ترى نەبێت.

سەرۆک بارزانى ئاشکراتر دەفەرمووێ که بەتەنها پێشمەرگایەتى نەبێت هیچ بەرپرسیارەتیێکى تر قەبوول ناکات. هەر لەمیانى دەقە دووربینەکانى سەرۆک گێڕانەوەى ڕووداوە ڕاستەقینەکانى مێژووى سەدەى ڕابردووى گەلەکەمان وبەجێگەیاندنى وەسییەتە پیرۆزەکانە لەپێناویەکریزى و تەبایی ویەکگرتووى و بەهێزبوونى سەرکردایەتى بەمەرەمى گەیاندنى کەشتى سەربەخۆیی بەرەو قەراغە ئارامەکان، بەرێزیان پیشبینى ئەوە دەکات کە قۆناغى داهاتوو قورس وسەختردەبێت و باس لە ڕێکخستنەوەى دامودەزگانى حزب دەکات بۆیە بەڕوونى دەڵێت ((کاری سەرەکى وئەرکى قوڕس لەمەودوا دەست پێدەکات , دەبێ زۆربەجدى خەریکى ڕێکخستنەوەى دامودەزگانى حزب بین)).

لەلایەکى تریشەوە جەنابیان بۆبەردەوام بوونى پارتى دیموکراتى کوردستان و گۆڕانى بارودؤخەکانى ناوچە و هەرێم و حزب بەرەوداهاتووێکى باشترو گەشاوەترو پێشکەوتووتر دواى رەزامەندى تێکرای ئەندامانى کۆنگرە بڕیاڕى مانەوە و خزمەتکردنى وەرگرت، ئەمەش ڕامانى ئەوەدەدات کە داهاتووى نزیک و دوورى گەلى کوردستان و ئایندەى نەوەکانى نوێی ئەم میللەتە دەکەوێتە ئەستۆى پارتی دیموکراتى کوردستان و سەرکردایەتیە حەکیمانەکەى.

ئەگەرپوختەیەکى ویژدانانە لە تێکڕای گووتار و پەیام ولێدووانەکانى سەرۆک مەسعود بارزانى لەمیانى ئەو ٣٠ساڵەى دەسهەڵاتى کوردیدا گەڵاڵە بکەین وخوێندنەوەیەکى زانستى گشتگیروشڕۆڤەیەکى کوردانەى بۆ بکەین, دەگەینە ئەو حەقیقەتە کە بەغەیرى فەلسەفەى کوردایەتى و ئازادى گەلانى ناوچەکەش, هیچ چەمکێکى تری سڕینەوە و ڕەتکرکردنەوە ونەخوێندنەوەى هیچ لایەن وکەس و دەستەڵاتى تێد بەدى ناکەین، ئەوەش خسلەت وسیماێکى کوردانە بۆ کارێزمایی.