لیوا حسن نوری
د براكتیككرنا كارێ پارتایەتی و سیاسی دا خو نویكرن و خوهاندان بگویرەی پێشهاتا مەرجەكێ سەركەفتنێ یە … پارتیا مە پارتی دیموكراتی كوردستان هەمی دەما باش دزانیت ل دەور و بەرا چ هەیە و هەلسەنگاندنا رێزێن خو و چەندایەتی و چەوانێیا كارێكتەرێن خو یێن مەیدانی و بیرمەندی باش تێدگەهیت، لەوا بو هەر قەیرانەكێ بو هەر ئالوزیەكێ چ دەستكرد چ خورسك چارەسەریێن یەكلاكەر هەنە و ئەڤ هەر دوو چەمكێن لسەرینە دهێلیت پێشرەوی كورد پارتی بیت و سەروكمان بارزانی بیت … و هەمی هەول و كوشش بو پروژێ نەتەوەیی بیت لەوا پارتی میحوەرێ كوردستانیانە و كوردستانی میحوەرێ پارتی و پارتیانە.
د دوازدە سالێن رابوری دا گەلەك بویەرێن مەترسیدار بەروكا كوردستانێ گرتن لسەر ئاستێ ئەمنی و لسەر ئاستێ ئابوری و لسەر ئاستێ لەشكری و سەربازی پارتی ئیدارەدانا ڤان هەمی هەڤركیا بئاوایەكێ لوژیكانە دایە مەشاندن و دخافكرنا ڤان هەمی دژواریاندا سەركەفت …
و هەر وەكو جەنابێ رابەر و سەروكێ خوشتڤی ئەمر دكەت (( مە گەلەك مین لسەر رێكا ئارمانجێن خو راكرن و ئەوێ مایی ژی هەمیا دێ راكەین )) و ئەگەر ئاڤریەكێ لمێژوویێ بدەین دێ گەلەك جوان زەلال و روهن بیت بەرەیێ وەلاتی و وەلاتپارێزان و بەرەیێ خائین و خوفروشان لەوا لڤێرێ پێتڤی یە ئەم لوژیكانە بیربكەینەڤە
كونگرە خوسازكرنە بو خورتكرنا بەرنامێ ولاتی و تێكوشەرێن وەلاتپارێز بو رویبرویبونا ئالنگاری و قوناغێن داهاتی و ئەو بویەرێن گریمانەی یێن كو دئێنە پێشبینی كرن لئایندەیدا كو بەروكا مە و بەرەیێ وەلاتی بگرن .
كونگرەیێ 14ێ یێ پارتی دیموكراتی كوردستان دێ ئێك ژ كونگرەیێن جوری و لئاست قوناغێ بیت ژلایێ ناڤەروكێ و لئاست خواستەكێن وەلاتیێن كوردستانێ كو ل لایێ هەمی پارتیا ئارمانجا سەرەكی كورد و كوردستانە … و پارتی دمێژوویێ دا سەلماندیە چ تشتەك گرنگتر نینە ژ ئیرادە و كەرامەتا خەلكێ كوردستانێ و پارتی ب دەها هزاران كادرێن خو گوری ڤێ ئارمانجا پیروز كریە و پێتڤی یە هەمی خەلكێ كوردستانێ بزانیت پارتی بئارامی سیاسەتێ دكەت و لئارامیێ پێش دكەڤیت و بئارامی ژی ئارمانجێن مەزن بدەست دئینینت و بەرنامەیێن چارەنڤیساز نەفەس و پشوویەكا درێژ و سینگەكێ فرەه دڤێت چونكی ڤان پرسا دەم دڤێت و دڤێت بزانیت دناڤبەرا چاڤ و بریادا چ ئارمانج پێك نائێن و ئەنجامێن كونگرەی دێ كاریگەر بن دێ دسودوبەخش بن بەلێ مەودایەكێ باش و لوژیكانە دڤێت كو دارا كونگرەی بێتە بەری تنێ ژمارەیەك نینە ژ 13ێ بچن بو 14ێ بەلكو ژ ئاسویێن بەرتەنگ كرنا قەوارەیی دێ چین بو ڤەگەراندنا شكو و ماف و بەركەفتیێن راستەقینەیێن مللەتێ مە . لسەر ئاستێ نشتیمانی و نەتەوەیی .
