گەلاوێژ نەزەریان: دەبێت وەرگێڕانی زمانی كوردی بۆسەر زمانی وڵاتانی جیهان بکرێت

16

خەبات: بەرهەم شێخ عزەدین:- دەربارەی ژیانی خۆی (گەلاوێژ نەزەریان ) بەمجۆرە قسەی بۆكردین: لەبنەماڵەیەكی هەژاری كوردپەروەری رۆژ هەڵاتی كوردستان لەدایك بووم،مامۆستام،لەگەڵ پیشەی مامۆستاییدا خزمەت بەئەدەب و زمانی گەلەكەم دەكەم لەوپێناوە تێدەكۆشم، وە ئەنجومەنێكی ئەدەبیم هەیە بەناوی چۆمان،لەگەڵ هەموو ناخۆشی و رێگرییەكانی ژیان كۆڵم نەداوەو دەستەو ئەژنۆ دانەنیشتووم بەردەوام لەپێناو بەرەو پێشچوونی فەرهەنگ و ئەدەب و زمانی كوردی تێكۆشاوم و هەوڵمداوە.،جگە لەم رێكخراوە بەردەوامم لەنووسین كەخاوەنی 3 كتێبی دیكەم جگە لەرۆمانی هەڵەبجە كە زیاتر پەروەردە یین.

رۆمانی قوربانی 256
دەربارەی تێكەڵبوونی بەدنیای نووسین گەلاوێژ دەڵێت: كاتێك كتێبم بۆمنداڵان دەخوێندەوە هەستم كرد منیش دەتوانم یان توانام هەیە وەكو ئەوەی دەیخوێنمەوە بنووسم یان باشتریش بنووسم،ئیدی ئەوە بووبەخولیام،بەڵام هیچ پشتیوان و هاوكارییەكم نەبوو،بەڵام ئاسان نەبوو بۆئافرەت لەشارێكی بچوكی وەك كامێران خەریكی چیرۆك نووسین بێت و لەشوێنی گشتی بیخوێنێتەوە بۆیە منیش ئەوهەستە هەرلەخەیاڵمدا مایەوە،باوكیشم بەردەوام لەماڵەوە چیرۆكی بۆدەخوێندینەوە،ئیدی ئەوانە هەمووی پاڵنەر و هاندەرم بوون بۆئەوەی كە بنووسم،هەتا كاتێك لەئێران بڵاو كرایەوە پێشبڕكێیەكی چیرۆك هەیە هەركەس ئارەزوو دەكات چیرۆكی خۆی بنێرێت،منیش چیرۆكێكم نارد قبوڵكرا وەك یەكەم نا،بەڵكو پێیان جوان بوو،ئیدی بانگیان كردم كەچووم مامۆستایەكی لێبوو،گوتی تۆ جوان دەنووسیت بەس نابێت كورتە چیرۆك بنووسیت،بەڵكو دەبێت رۆمان بنووسیت،ئەوەندەی كەپەسند كراون ئازادن چی دەنووسن جگە لەتۆ كەكوردی دەبێت لەسەر هەڵەبجە بنووسیت!سەرەتا پێم ناخۆش بوو،چوونكە شارەزا نەبووم،بەڵام ئەو سوور بوو كەدەبێت بنووسم لەسەری،بۆیە بیرم لەمنداڵی كردەوە كەخەڵكی هەڵەبجە ئاوارەبوون هاتنە لای ئێمە كەچۆن لێرە ژیان و گەورە بوون منداڵەكانیان ئیدی گەڕاشم لەشارەكان خەڵكی هەڵەبجە ماون لێرە ئیدی بەم جۆرە بووم بەڕۆماننووس كەئەمەیەكەم بەرهەممە وەك رۆمان كەزۆرم خۆشدەوێت.لەژێرناوی (قوربانی ژمارە (256) بەقەڵەمی (رێباز مستەفا )وەرگێڕدراوەتە سەرزمانی شیرینی كوردی و ئێستا لەكتێبخانەكانی كوردستان هەیە و پێشوازی باشی لێكراوە.

خوێندنەوە لەسەر مۆبایل
دەربارەی خوێندنەوە لەڕێی سۆسیال میدیاو بەشێوە پیدی ئێف pdf لەسەرئامێرە زیرەكەكان خاتو گەلاوێژ گوتی:من هەرگیز لەگەڵ ئەو خوێندنەوەیە نیم چونكە خوێندنەوە بەشێوەی كاغەز باشتر و چاكترە،بەڵام دنیا بەرەو شوێنێك دەڕوات،كە سەرجەم شتەكان خەریكە لەڕێی تەكنەلۆژیا لەبەین دەچێت لەگەڵ ئەوەی كەلەزۆر ڕووەوە خراپ نیە،بەڵام بۆخوێندنەوە لەگەڵی نیم چونكە ئەوخوێندنەوەی لەسەرئامێری زیرەك دەكرێت جگە لەزیانە تەندروستییەكانی بۆجەستەی مرۆڤ كەمتر لەزیهن و دەروونی مرۆڤ دەمێنێتەوە و لەزەتی رووحی كەمتر بەخوێنەر ئەدات،من وایدەبینم كەكتێب بەكاغەز بێت زۆر باشە.

كەمی نووسەری ئافرەت
ئینجا پرسیم بۆنووسەری ئافرەت كەمن ئەو خاتوونە ڕۆماننووسە بۆچوونی وابوو:من وا دەزانم ئافرەت بەدوای شوێنێكی ئارامدا دەگەڕێت و خەریكی خزمەتی ماڵ و خێزانن،ئەمانەو چەندین شتی دیكە هۆكارن بۆئەوەی نووسەری ئافرەت كەم بن،ئەم كێشانە هەرهەبوون و هەردەبن بەداخەوە،هیوام وایە گۆڕانێكی نەوعی بێتە كایەوە و نووسەری ئافرەت زیادبێت.

هونەر و ئەدەب
دواتر پرسیم تاچەندگرنگە چیرۆك و ڕووداوە مێژووییەكانی گەلی كورد بكرێن بەڕۆمان،بەتایبەت بەزمانی وڵاتانی جیهان؟ گەلاوێژ نەزەریانی نووسەر بۆچوونی وابوو: ئەوەی لای من گرنگە زانكۆیەكی تایبەت هەبێت بەئەدەبیاتی كورد و پاراستنی،ئەمەش هەرئەوە نییە تەنها بەكوردی بنووسیت،بەڵكو هەر رۆمان و چیرۆكێك بۆن و بەرامی كوردانەی لێدێت بیناسێنین بەجیهان،بۆنمونە كورد لەهەركوێی دنیایە ئەتوانێت وەرگێڕان بكات بۆنەیكات،ئەوەتا وڵاتانی جیهان بەهەمووشێوەیەك بەنووسین بەشێوەی فیلم بەگۆرانی بەشانۆ خەریكن ئەدەبیات و چیرۆكی نەتەوەكانیان بەجیهان دەناسێنن،هاواردەكەن كەئەو بەڵاو ناخۆشیانەمان بەسەرهاتووە،بەڵام ئێمەی كورد تاكو ئێستا نەمانتوانییوە دوو فیلم درووست بكەین بڵێین ئێمەش ئاوهامان بەسەرهاتوە و زوڵممان لێكراوە.بۆیە گرنگە لەڕێی ئەدەبیات و هونەرەوە رووداو وكارەساتەكانی بەسەرگەلەكەمان هاتووە بەدنیای بناسێنین.

هەركەس لەئاست خۆی هەوڵبدات
دەربارەی وەرگێڕان لەوخاتونەم پرسیی ئەویش گوتی: وەرگێڕان هەرئەوەنییە لەسەر زمانی نەتەوەكانی دیكە شت وەربگێڕدرێتەسەر زمانی كوردی،بەڵكو درووست ئەوەیە ئەوكارەسات و ناخۆشیانەی بەسەر گەلەكەماندا هاتووەو كراوە بەكتێب یان رۆمان بیكەنە زمانی وڵاتانی دیكە،بۆنمونە ئەوانەی لەئەوروپا دەژین و زمانی ئەو وڵاتە دەزانن،باكارەساتەكان بنووسن بەزمانی ئەو وڵاتە،بڕوابكەن من ئێستا خەڵك زۆر پەیوەندیم پێوەدەكەن دەڵێن زانیومانە كارەساتی هەڵەبجە،بەڵام هەرگیز بەو شێوەیە نەمانبیستبوو.بۆیەگرنگە هەركەس لەئاست خۆی هەوڵبدات.