خەبات- هەولێر:
كەمئاویی وەك زۆرینەی ساڵانی دیكەیش سەریهەڵداوەتەوە و هاووڵاتیانیش پێیانوایە چارەسەرەكان درەنگ كەوتوون و دەبوو زووتر مشووری ئەو بارودۆخە بخورایە نەك ئێستا كە لە وەرزی هاوینداین، بەشێك لەو هاووڵاتیانەی قسەیان كردووە جیا لەوەی كێشەی كەمئاوییان هەیە، هاوكات گلەیی لە پێوەری ئاویش دەكەن و پێیانوایە “پارەی هەواش دەدەن.
رزگارمحەمەد لە گەڕەكی ژین دەڵێت: ماوەی دوو هەفتەیە ئاومان نییە و ئاو بەپارە دەكڕین، هەندێجاریش ناچاردەبین ماڵەكانمان بەجێبێڵین، بێگومان لەسەر بێ ئاوی زۆرجار كێشە لەنێوان ماڵە دراوسێكاندا دروستدەبێت و دەبێتە شەڕیان.داوا لەلایەنی پەیوەندیدار دەكەم كە بەهانامانەوە بێن و كێشەی بێ ئاویمان بۆ چارەسەر بكەن.
شەیدا عەبدوڵڵا هاووڵاتیەكی دیكەی گەڕەكی رۆشنبیری بوو گوتی: ماوەی چەند رۆژێكە كێشەی كەم ئاویمان هەبوو بۆیە بەباشمانزانی سەردانی ئاوی هەولێر بكەین كە بەدواداچوونی بۆ بكەن، بەڵێنیان پێداین و هەرواش چاوەڕێی بەڵێنەكەین.
بارزان سلێمان لە گەڕەكی ژیان دەڵێت: خراپ دابەشكردن لەئاویش هەیە، ئیشپێكەری بیرەكان بە یەكسانی ئاو دابەش ناكەن و خۆیان بەشتی ترەوە سەرقاڵ كردووە، كە ئیشی ئەوان نییە، من ئیشپێكەری بیرەم بینیووە یەخەی خەڵك دەگرێت كە ئاو بە فیرۆ نەدەن، لە كاتێكدا ئەوە ئەركی چاودێری شارەوانییە نەك ئیشپێكەری بیر.
مستەفا ئیبراهیم دانیشتووییەكی دیكەی گەڕەكی ژینە لە دارەتوو گوتی: ئێمە دانیشتووی كەرتی هەزاریەكانین و ماوەی چەند رۆژە كێشەی كەم ئاویمان هەیەو داواكارین كە (فەرمانگەی ئاوی هەولێر) چارەسەری كێشەی كەم ئاویمان بۆ بكەن.
مستەفا گوتیشی: دەبووایە لایەنە پەیوەندیدارەكان زووتر خەمی ئەو كێشەیە بخۆن نەك ئێستا كە هەروا بەرەو گەرمتربوونی وەرزەكە دەچین و خواست لەسەر بەكارهێنانی ئاو زیاتر و زیاتر دەبێت، ئێستا هیچ ناكرێت و تەنیا ئەوە نەبێت كە هەندێك هەوڵ هەیە بە تەنكەر ئاو بگەیەندرێتە ماڵان، ئەوەیش چارەسەرێكی كاتییە و بێسوودە.

هاووڵاتیان گلەییان لە خراپی و زۆریی پارەی پێوەری زیرەكیش هەیە

لەو ڕاپۆرتەدا ژمارەیەك لەهاووڵاتیان گلەییان لەو پێوەرە هەیە، كە بۆ خوێندنەوەو خەرجكردنی ئاو بەستراوەو زۆرینەیان پێیانوایە هەواش دەخوێنێتەوەو بەشێكی ئەو پارەیەی دەیدەن پارەی هەوایە نەك ئاو.
مام عەلی لە گەڕەكی مەنتكاوە گوتی: پارەیەكی زۆرم بۆ هاتبووەوەو سەردانی فەرمانگەی ئاوی هەولێرم كردو بڕەكەی 932 هەزار دینار بوو، منیش كەسێكی خانەنشینم ناتوانم ئەو هەموو پارەیە بدەم، دەستخۆشی لە كارمەندانی ئاو دەكەم كە هاوكاریان كردم و پارەكەیان بۆ كردم بەقیستی مانگانە، ئەگەرچیش دەزانم بەشێكی ئەو پارەی من دەیدەم پارەی هەوایە نەك ئاو، چونكە پێوەرەكان هەواش دەخوێننەوەو داواكاریشم لە وەزی شارەوانی و بەرپرسانی پەیوەندیدار چارەسەری ئەو كێشەیە بكەن.
ستار سەمەد گوتی: زەویەكی بەتاڵم هەبوو بە ناچاری خۆم سەردانی فەرمانگەی ئاوی هەولێرم كرد تا هاوبەشی ئاو رابكێشم ماوەیەكی زۆربوو دراوسێی زەویەكە ئاویان بەكار دەهێناو دەبووایە من بەناچاری پارەی ئاوی ئەو زەویە بەتاڵەش بدەم، كەچی هێشتا وەك پێویست ئاومان نییە.
كەمال شێرزاد لەگەرەِكی ژیان گلەیی لە ئیشپێكەری بیرەكان دەكات و گوتی: ئیشپێكەری بیرەكانی گەڕەكی ئێمە بە میزاجی خۆیان ئیش بە بیرەكان دەكەن و هیچ حیساب بۆ كات و بەرژەوەندی خەڵك ناكەن، ئەوە وێڕای ئەوەی كە پارەیەكی زۆری ئاوم بۆ هاتۆتەوەو بەقسەی ئەو كەسەی پارەی ئاو وەردەگرێتپێوەرەكەشم كێشەی هەبووە، ئەوەبوو سەردانی فەرمانگەی ئاوم كردو دوای چەند رۆژێك، ئینجا كێشەكەیان بۆ چارەسەر كردم، بەڵام بێ ئاویی هێشتا هەرماوە .