بڕیاردەری لیژنەی دارایی لە پەرلەمانی عێراق رایگەیاند، ھەردوو حكوومەتی عێراق و ھەرێمی كوردستان لە دانوستانەكان جیددین و حكوومەتی ھەرێمی كوردستانیش وەەرقەیەكی شەفافی بۆ دانوستان ئامادە كردووە و ئیرادەیەكی باشیش بۆ رێككەوتن ھەیە، بۆیە گەشبینین كە رێككەوتن بكرێت.

د. ئەحمەد سەفار، بۆ ماڵپەڕی فەرمیی پارتی دیموكراتی كوردستان گوتی: “دانوستانەكان لەگەڵ بەغدا بەردەوامن و ھەردوو شاندی حكوومەتی ھەرێم و بەغدا لە گفتوگۆدان، چونكە ھەردوو حكوومەت لە قەیرانی داراییدان، بۆیە پێویستە لەلایەن ھەردوو لا سازش ھەبێت بۆ ئەوەی بگەنە رێككەوتن، چونكە قەیرانێكی قوڵی درایی لە عێراق ھەیە”.

گوتیشی: “ھەردوو حكوومەت بۆ رێككەوتن جیددین و ئیرادەی بەھێز ھەیە، شاندی حكوومەتی ھەرێمی كوردستانیش ھەموو زانیارییەكانی لەگەڵ خۆی بردووە و وەرەقەیەكی شەفاف و رێكوپێكیان ئامادە كردووە بۆ دانوستان، بۆیە ئومێدی زۆر ھەیە بگەنە رێككەوتن”.

دەشڵێ: “گفتوگۆ لە نێوان ھەردووشاندی حكوومەتی ھەرێمی كوردستان و بەغدا لەسەر چەندین تەوەر دەكرێت، وەكو بودجە و نەوت و خاڵە سنوورییەكان و پێشمەرگە و ماددەی١٤٠، بۆیە گفتوگۆكان بەردەوام دەبن تا رێكدەكەون”.

لەبارەی وەرگرتنی قەرز لەلایەن حكوومەتی عێراقەوە، د. ئەحمەد سەفار گوتی: “ئێمە وەكو لیژنەی دارایی پڕۆژەیاسایەكمان ئامادە كردووە، كە حكوومەتی عێراق بە ھۆی قەیرانی دارایی قەرز بكات كە ٥ ملیار دۆلاری دەرەكی و ١٥ ترلیۆن دیناری ناوخۆییە و رەنگە گۆڕانكارییش بەسەر قەرزەكاندا بێت، چونكە لەناو ھۆڵی پەرلەمان بڕیاری لەسەر دەدرێت و حكوومەتیش داوای كردووە بۆ ئەم چەند مانگە یاسای بودجە نەبێت و بە قەرز بەڕێوە بچێت و ئەوبرەی دانراوە زیاد بكرێت، بۆیە دیار نییە چۆن دەبێت، بەڵام ئەمڕۆ بڕیاری لەسەر دەدرێت”.

ئەو هەروەها ڕاشیگەیاند، ئەمڕۆ سەعات یەك پەرلەمان كۆبوونەوەی خۆی ئەنجام دەدات لەبارەی وەرگرتنی قەرز و، كوردیش بەشداری دەكات و پشكی ھەرێمیش بەپێی رێككەوتن لەو قەرزە دیاری دەكرێت.