قەدەخەی هاتووچۆی نێوان پارێزگاکان درێژکرایەوە

وەزارەتی ناوخۆی هەرێمی کوردستان دەڵێت، بەبڕیاری لیژنەی وەزاری بەرەنگاربوونەوەی کۆرۆنا، ئاڵوگۆڕی هێزە ئەمنییەکان لەنێو پارێزگاکانی هەرێمی کوردستان هەر 30 رۆژ جارێک ئەنجامدەدرێت. ئەو هێزانەی ئێستاش لە ئەرکدان لە کاژێر 12:00ـی شەوی 15-6-2020 تاوەکو کاژێر 12ـی شەوی 18-6-2020، بەپێی رێنماییە تەندروستییەکان ئاڵوگۆڕیان پێدەکرێت.

بەپێی بڕیارەکانی وەزارەتی ناوخۆ، دەروازە سنوورییەکان و فڕۆکەخانەکانی هەولێر و سلێمانی بە داخراوی دەمێننەوە. بەڵام ئاڵوگۆڕی بازرگانی لە دەروازە سنوورییەکان بەپێی رێنماییەکانی پێشووتر بەردەوام دەبێت.

لەبارەی ئەو فەرمانبەرانەی لە دانیشتووی شارێکن و لە شارێکی دیکە فەرمانبەرن، وەزارەتی ناوخۆ دەڵێت، “لە شارەکانی خۆیان بمێیننەوە و پێویست بە هاتووچۆ ناکات”.

وەزارەتی ناوخۆ داوا لە هاونیشتمانیان دەکات پابەندی رێنماییە تەندروستییەکان و بەستنی دەمامک بن. لە بڕگەیەکی دیکەی بڕیارەکاندا هاتووە، دەبێت شۆفێر و سەرنشینی هەموو ئۆتۆمبێلەکان بە (تایبەت، کرێ و بارهەڵگرەوە) پابەند بن بە بەستنی دەمامک، بەپێچەوانەوە شۆفێرەکە 50 هەزار دینار سزا دەدرێت.

وەزارەتی ناوخۆ ئەوەشی گوتووە، هەر گردبوونەوەیەک لە دەرەوەی شوێن و باڵەخانەکانی حکومی و کەرتی تایبەت بەبێ بەستنی دەمامک و رەچاونەکردنی دووریی 1 مەتر و نیوی نێوان کەسەکان بکرێت، هەر کەسێک پێنج هەزار دینار سزا دەدرێت.