شاخەوان برایم عەبدوڵڵا
راسپاردنی محەمەد عەللاوی بۆ پێكهێنانی حكوومەتی نوێی عێراق، لە قۆناغێكی سەخت و ئاڵۆزدایە، ئەو پیاوەش ناوبانگێكی گەورەی سیاسی نییە، ئەگەرچی وەك سیاسییەك بەشداری پڕۆسە سیاسییەكانیش بووە.
قسەكردنی ئێستای ئەم وتارەش، هێندەی قسەكردنە لەسەر روئیای عێراقییەكان بۆ حوكمڕانێتی و تێوەگلانیان لەو گەڕەلاوژەیەی لە پەنای مەزهەب و شەڕی خێڵەكان و بزنسمانە دۆمبەڵانئاسا هەڵتۆقیوەكانی بەغدایە، بەڵكوو شەنوكەوكردنی خودی ئەو كەسایەتییە نییە، چ جای ئەوەی هێشتا زووە بتوانین گرەنتی ئەوە بكەین كە دەتوانێت حكوومەتەكەی پێكبهێنێت! ئاخر ئەگەر بەردێكی بدرێتە دەست بۆ دروستكردنی دیواری حكوومەتەكەی، لە بەرانبەردا سەدان بەردیشی تێدەگیرێت و بە خاكەناس و پیشەقانیش بناغەی حكوومەتە چاوەڕوانكراوەكەی بنكۆڵ دەكەن.
خودی دكتۆر عادل عەبدولمەهدیش بە هەمان دۆخی ئەو پیاوەدا تێپەڕی، ئەگەرچی سەرەتا ویستی نموونەیەكی نەختێك نوێتر پێشكەشی گەلانی عێراق بكات، بەڵام هەرزوو لەوە تێگەیشت ئەوەی ئەو بیری لێ دەكاتەوە، لەگەڵ روئیا و ئەجێندای سیاسی و كۆمەڵایەتی و مەزهەبی ئێستای بەغدا نایەتەوە، لە یەكەم چركەساتیشدا پێیگوتین لە پۆستەكەی سەركەوتوو نابێت! كاتێك ویستی لە رێگەی سیڤی ئاشكراوە پۆستەكان پڕ بكاتەوە، بەڵام ئێستاش كەس نەیزانی ئەو سیڤییانە واتە فۆڕمەكە چیان بەسەرهات! سەرئەنجام دۆخە ئاڵۆزەكەی بەغدا نەك سیڤییەكان، تەنانەت خۆری ئەویشی ئاوا كرد.
هێشتا ئەو پیاوە بە فەرمی كابینەكەی رانەگەیاندووە لە چەند شوێنێكی عێراق دژی وەستاونەتەوە، تەنانەت وەك پێویستیش پێشوازی لە دیاریكردنەكەی ناكرێت، ئەوەی دەكرێ وەك ئاماژەیەك بۆ شكستی ئەو پیاوە بخوێندرێتەوە، خودی دۆخە ئاڵۆزەكەی بەغدایە بەوەی چارەسەركردنی نەك هەر لە توانای محەمەد عەللاویدا نییە، رەنگە ئاڵۆزتریش بێت، ئاخر سیاسییەكانی بەغدا بە ماندووبوون و خەباتی سیاسیی خۆیان و بە قوربانیدان نەهاتوونەتە سەر ئەو كورسییە كێشەدارانەی بەغدا، بەڵكوو لە ئەنجامی خوانێكی ئامادەكراوی ئەمەریكاوە هاتوون و چاویان بەو كورسییانە و خێروبێری عێراق كەوتووە، ئەمەش بەری چاوی زۆربەیانی سووركردووە بە جۆرێك هەرگیز ناتوانن رێز لە سەقامگیریی سیاسی بگرن و خۆشگوزەرانیش بۆ خەڵك بەدیبهێنن، لە قۆناغی زنجیرە حكوومەتەكانی دوای سەددام و پڕۆسەی حوكمڕانێتی كە كابینە لە دوای كابینە كۆمەڵك كێشەی نوێ و هەڵپەسێردراوی بە میرات بۆ خەڵك و حكوومەتی دوای خۆیان جێهێشت، سەرئەنجام وەك بۆمب تەقییەوە!
كورد لە بەغدا رەگەزێكی گرنگیی سیاسییە، رەگەزێك زۆربەی كاتەكان غەدر و گەلەكۆمەكی لێكراوە تا ئاستی ئەوەی هەرچی ئەو گرووپ و لایەنە سیاسییە عێراقییانەی لە بنەڕەتدا دژی یەكتریشن، بەڵام بۆ دژایەتیكردنی كورد، یەكگرتوون، كەوایە بەشداریكردنی كورد لە حكوومەتەكەی محەمەد عەللاویش هێندەی دەبێت بەشدارییەكی سیاسی و نەتەوەیی لەسەر بنەمای بەدەستهێنان و پاراستنی زیاتری مافەكانی كورد بێت، راستە كورد دژی ئەو پیاوە نییە، كەچی گرنگە كوردیش روئیا و مافەكانی خۆی بەروونی بەو پیاوە بڵێت كە ئەوانەی هێڵی سوورن، ناكرێت گفتوگۆیان لەسەر بكرێت و ئەوانەیشی جێی گفتوگۆن، دەكرێ دانوستاندنیان لەسەر بكرێت، لە هەموویان گرنگتریش ئەو پیاوە دەبێ كورد بە جوانی بەو پیاوە بڵێت بەغدا خێر بە كورد ناكات لە پێدانی مووچە و بودجە و پرسە داراییەكانی دیكە و چەك و تەقەمەنی بۆ پێشمەرگە، هەموو ئەوانە بەگوێرەی دەستوور بۆ كورد دیاریكراون و ناكرێ چیتر پێشێلبكرێن، لە سەرووی هەموو ئەوانەیشەوە پێویستی بە یەكگووتاری و یەكهەڵوێستی هەیە، بۆ ئەوەی كارتە نەتەوەیی و سیاسی و ئابووری و دەستوورییەكانی كورد بەهێزتر دەربكەون، لە قۆناغێكدا كە چاوەڕێ ناكرێ حكوومەتی نوێی عێراق، دۆخە ئاڵۆزەكەی بەغدای پێ چارەسەر بكرێت.
