خەبات: ساسان دەروێش:-
ئەگەرچی لە رابردوودا بڕیاری دابەشكردنی كوردستان لە شاری لۆزانی سویسرا ڕوویدا، ئەمەش لە هزر و مێشكی هیچ نەوەیەكی كورد ناسڕێتەوە، بەڵام ئەوەی ئەمڕۆ لە كۆڕبەندی ئابووریی جیهانی و لە نێو چیا سەركەش و پڕ لە بەفر و ساردەكەی هاوینەهەواری ئەڵپاین سكای لە شارۆچكەی داڤۆسی هەمان سویسرا ڕوویدا، لە دانانی ئاڵای كوردستان و پێشوازیكردنی گەرم لە نێچیرڤان بارزانی سەرۆكی هەرێمی كوردستان كە هاوكات بوو لەگەڵ هەڵكردنی ئاڵای كوردستان لە كۆماری كوردستان لە مەهاباد لە74 ساڵی ڕابردوودا كۆبوونەوەی هەردوو سەرۆكی هەرێمی كوردستان و سەرۆكی ئەمەریكا بۆ گەلی كورد هەنگاوێكی تری دیپلۆماسییەت بوو بۆ چوونە پێشەوەی دۆزی گەلی كورد و ناساندنی زیاتری شووناسی نەتەوەی كورد لە دیدار و گفتۆگۆ گەرمەكاندا لەنێو سەرۆك و سەركردەكانی جیهاندا، دروستبوونی ئەم سەكۆیەش دەگەڕێتەوە بۆ50 ساڵ لەمەوبەر و لە ساڵی1971 لەلایەن پڕۆفیسۆری ئابوورییناسی ئەڵمانی كلاوس سكاوب وەك رێكخراوێكی ئابووریی قازنج نەویست دایمەزراند لەپێناو جیهانێكی ئارام بۆ هەمووان و كۆكردنەوەی سەركردەكانی جیهان لە تەك یەكتردا كە ساڵانە لە مانگی كانوونی دووەم بەڕێوەدەچێت و چەند ساڵێكیشە هەرێمی كوردستان هاوشێوەی وڵاتێكی سەربەخۆ بەشداری كۆڕبەندەكە دەكات، پێشتر سەرۆك بارزانی و دواتریش نێچیرڤان بارزانی وەكو سەرۆكوەزیران و ئەمساڵیش وەكو سەرۆكی هەرێمی كوردستان بەشداربوو بە كارنامەیەكی چڕ و پڕ و هەگبەیەكی نەتەوەییانە جارێكی تر باسوخواستی نەتەوەی كوردی خستەوە سەرمێزی زلهێزەكانی جیهان، لەمبارەیەشەوە رەوەندی كوردی تاراوگە بیروبۆچوونی خۆیان بۆ خەبات دەربڕی.
پێگەی هەرێمی كوردستان بەهێزتر دەبێت
هێرۆ عەلی عوسمان لە دانیمارك بۆ خەبات گوتی: دنیایەك خۆشحاڵبووم بەم ڕووداوە گرنگە، لەم كاتوساتەدا و كۆبوونەوە و دیدارەكانی نێچیرڤان بارزانی سەرۆكی هەرێمی كوردستان رەنگدانەوەیەكی باشی هەبوو لە تاراوگە بە تایبەتی زۆرترین گفتوگۆ و باسكردنی بەدوای خۆیدا هێنا لە دوای ئەوەی تەلەفزیۆنی فۆكس نیوزی ئەمەریكی راستەوخۆ قسەی هەردوو سەرۆكی پەخشكرد و هەروەها سەرۆك دۆناڵد ترەمپ گەلی كوردستانی بە گەلێكی مەزن وەسفكرد و گوتی ئێمە قەرزارتانین، هەروەها سوپاس و پێزانینی ئەمەریكا بۆ رۆڵی هەرێمی كوردستان و پێشمەرگە لە تێكشكاندنی داعش و پاراستنی پێكهاتە ئایینی و نەتەوەییەكانی كوردستان دووپاتكردەوە، ئەمە خۆی لەخۆیدا ئیسپاتبوونی هەرێمەكەمانە بە فەرمی و ناساندنی زیاتری.
ئەركان مستەفا كۆیی لە هۆڵەندا گوتی: داڤۆس وێستگەیەكی گرنگیی مێژوویی بوو بۆ كورد و پەڕینەوەی بەسەر نائومێدییەكانی لە لۆزان و سڕینی فرمێسكی لە داڤۆس بە دانانی ئاڵای كوردستان لە كۆبوونەوەی هەردوو سەرۆكی ئەمەریكا وكوردستان ئەمە لەخۆڕا نەڕەخساوە بەڵكو یاریزانی لە سیاسەتكردن و بردنەوەی گرەوەكانە كە دبلۆماسیەتی كورد و هەڵوێستی نەگۆری سەرۆك بارزانی بۆ داهاتووی كوردستان گەیشتۆتە ئاستێك وڵاتان بەچاوی ڕێزوهەستكردن بە كوردستانێكی بەهێز چاوی لێ بكەن وبیانەوێت پەیوەندی توندوتۆڵیان هەبێت لەگەل كورد كە وەك ئەوەی لە چەند ڕۆژی ڕابردوودا لە دیداروكۆبوونەوەكانی نێجیرڤان بارزانی سەرۆكی كوردستان بینرا بە وەرچەرخانێكی مێژووی دادەنڕی وپشت بە هەنگاوەكانی ببسترێ.
دایە ئایشێ خاوەنی دوو شەهید لە بەریتانیا گوتی: هەركاتێك پرسی كورد كەوتبێتە دەست ماڵباتی بارزانی، كەواتە لە دەستێكی ئەمین دابووە و مامەڵەیەكی تەندروستی لەگەڵدا كردووە و سازشی لەسەر خاك وگەل نەكردووە، بارزانیی باوك لە شۆڕشی مەزنی ئەیلوولدا لەپێناوی كەركووك هیچ تەنازولی نەكرد ، درێژەی بە خەبات و تێكۆشاندا لە 11ی ئازارەوە بۆ ڕیفراندۆم كە دوو بەڵگەنامەی مێژوویی بۆ كورد تۆمار كرد و لە ئێستاشدا بەهۆی بیری جوان و سیاسەتی هێمنانەی سەرۆك بارزانی، وڵاتان فەرشی سووریان بۆ سەرۆك راخست و وەك سەرۆكی كوردستان پێشوازیان لێكرد و ئاڵای كوردستانیان بۆ دانا، ئەمەشی كە بینیمان لە داڤۆش هەمان سیاسەتە كە نێچیرڤان بارزانی پەیڕەوی دەكات بۆ گەیاندنی دەنگ و رەنگی كورد و سەرخستنی دۆزی ڕەوای كوردستان لەنێو كۆبوونەوەكانی سەركردەكانی جیهاندا.
ئەفشار ئەقدەسی بەرپرسی نوێنەرایەتی ئەورووپای پارتی ئازادیی كوردستان گوتی: دانانی ئاڵای كوردستان و پێشوازی گەرمی سەرۆكی ئەمەریكا لە سەرۆكی كوردستان لە كۆڕبەندی ئابووریی جیهان بەڕووداوێكی مێژوویی و گەورە سەیر دەكرێت بۆ نەتەوەی كورد كە هاوكات بوو لەگەڵ هەڵكردنی ئاڵای كوردستان لە74 ساڵی ڕابردوو لە كۆماری كوردستان، لە هەمان سویسرای بێلایەن و دوور لە جەنگ لە ڕووداوێكدا لە لۆزانی شووم كە بووە ماڵوێرانی بۆ كورد، بەڵام ئەمجارە لەم هەلە مێژوویەدا لە داڤۆس بووە خۆشحاڵی تەواوی نەتەوەی كورد و بەردەوامی خەبات و تێكۆشان بۆ گەیشتن بە ئامانجە پیرۆزەكەمان لە سەربەخۆی كوردستان.
جەبار جاسەنەیی پێشمەرگەی دێرین لە ئەڵمانیا دەڵێت: ئەوەی منی خۆشحاڵتر كرد لەم كۆڕبەندی ئابووریەدا ئەوە بوو سەرۆك دۆناڵد ترەمپ وەكو سەرۆكی كوردستان پێشوازی لە نێچیرڤان بارزانی كرد، ئەمەش مانا و بایەخێكی گرنگی بۆ كوردستان و داهاتووی دەبێت، لە كۆبوونەوەی هەردوولا ئاڵای كوردستان و ئەمەریكا لە پشت هەردوو سەرۆك دانرابوون، كە دەنگدانەوەیەكی باشی لەسەر ئاستی نێودەوڵەتی لێكەوتەوە لە نیشاندانی پێگەی بەهێزی كوردستان و سیاسەتی حەكیمانەی سەرۆك بارزانی و هەڵوێستە جوان و ڕوونەكانی بۆ داهاتووی كوردستان و هەڵسوكەتی لەگەڵ دۆستەكانی.
سازان مستەفا ساڵح لە سوید گوتی: دانانی ئاڵای كوردستان ئاماژەیەكی گرنگە بەوەی كە هەرێمی كوردستان هەرێمێكی دەستووری و دانپێدانراوە بە تایبەتی لەلایەن بەهێزترین وڵاتی جیهان كە ئەمەریكایە، ئەگەر وردبینانە هەڵوەستە بكەین ئەوەی ترەمپ باسی كرد راستییە بەو مانایەی كە ئەمڕۆ یان سبەی بێ كوردستان سەربەخۆ دەبێت و بارزانیش سەرۆكی كوردستان دەبێت و هۆكارەكەشی بۆ سیاسەتكردنی حەكیمانەی سەرۆك بارزانی دەگەڕێتەوە لەگەڵ ڕاگەیاندنی ئابووریی سەربەخۆ بۆ كوردستان و ئەنجامدانی ڕیفراندۆم بۆ سەربەخۆیی كوردستان.
