دیمانە: كارزان حەیدەر
زانكۆی پۆلیتەكنیكی هەولێر لەگەڵ ئەوەی ساڵی 2012 دامەزراوە، هەوڵی ئەوە دەدا ببێتە زانكۆیەكی نێودەوڵەتی لەڕێگەی ئەو یاداشتانەی لەگەڵ زانكۆ جیهانیەكان ئیمزای دەكا لەگەڵ ئەو سەدان توێژینەوەیەی ساڵانە پێشكەشی دەكات، سەرباری پەرەپێدانی توانای مامۆستاكانی لە دەرەوەی وڵات.
پرۆفیسۆری یاریدەدەر د.كاوە شێروانی سەرۆكی زانكۆی پۆلیتەكنیكی هەولێر لە دیمانەیەكی لەگەڵ(خەبات)باسی هەوڵەكانی پێشخستن و پەرەپێدانی زانكۆكەی دەكات و دەڵێ: “ئەمساڵ 200 كورسی خوێندنی باڵا دەكەینەوە كە دبلۆمی باڵای ئەكادیمی و ماستەر و دكتۆرایە، بۆ كچ و كوڕانی شەهیدیش كورسی تایبەت دابین دەكەین بە مەرجی دەرچوون، بێ ئەوەی كاریگەری بكەنە سەر كورسیەكانی دیكەی قوتابیان كە كێبڕكێی لەسەر دەكەن.
خەبات: زانكۆی پۆلیتەكنیكی هەولێر چەند كۆلیژ و پەیمانگای هەیە؟
د.كاوە شێروانی: پێشتر تەنها پەیمانگای تەكینكی هەولێر بوو، دوای ڕاپەڕینی كوردستان دەستەی پەیمانگا تەكنیكیەكان دامەزرا تا ساڵی 1996? پاشان بە بڕیاری پەرلەمان دەستەی خوێندنی تەكنیكی دامەزرا، ئینجا چەند كۆلیژێك كرایەوە و دوای ئەوەی ساڵی 2012 بوو بە زانكۆی پۆلیتەكنیكی هەولێر كە 3 كۆلیژ و 8 پەیمانگا لەخۆ دەگرێت، لە كۆلیژەكانی تەكنیكی ئەندازیاری و تەكنیكی كارگێڕی و تەكنیكی تەندروستی، لەگەڵ پەیمانگا پسپۆریەكانی هەولێر كە پەیمانگای تەكنیكی پزیشكی و تەكنیكی كارگێڕی و تەكنیكی تەكنەلۆژین، سەرباری 5 پەیمانگای دەرەوەی هەولێر كە گشتین و پەیمانگاكانی شەقڵاوەو سۆران و چۆمان و كۆیە و خەباتن، ئەمساڵ 15 هەزار قوتابیمان هەیە لەگەڵ 600 مامۆستا لەبڕوانامەی ماستەر بەسەرەوە، لەگەڵ 1800 فەرمانبەر.
خەبات: لەگەڵ زانكۆی چەند وڵات ڕێككەوتن و لێكتێگەیشتنی زانكۆیتان ئیمزا كردووە بۆ پێشخستنی زانكۆكەتان؟
د.كاوە شێروانی: لە ساڵانی ڕابردوو گرنگیمان بە پرسی نێودەوڵەتیكردنی زانكۆكەمان دا و بۆ ئەوە ئۆفیسێكی تایبەتمان دامەزراند لەبەر ئەوەی ئێستا كاری زانكۆكان لە چوارچێوەی نێوخۆیی دەرچووەو بۆتە ژمارە لەنێو زانكۆكانی جیهان، بەوەش كاری ئیدارەكردنی زانكۆ گۆڕدراوە و دەبێ زانكۆ بە نێودەوڵەتی بكرێت، زانكۆی پۆلیتەكنیكی هەولێر بۆ ئەوە كاری كردووەو یاداشتی لەگەڵ لەگەڵ چەند زانكۆیەكی توركیا و قوبرس و دوو زانكۆی ئەڵمانیا ئیمزا كردووە، سەرباری ئەوەی لە هەوڵداین پەیوەندی لەگەڵ چەند زانكۆیەكی بەریتانیا دروست بكەین، لەگەڵ زانكۆكانی مالیزیاش پەیوەندیمان دروستكردووە، یەكێ لە زانكۆكانی مالیزیاش 14 ی مانگی شوباتی داهاتوو كۆنفرانسێكی نێودەوڵەتی لە هەولێر ڕێك دەخات، لەگەڵ دروستكردنی پەیوەندیەكانیش، بوینەتە ئەندامی یەكێتی زانكۆكانی عەرەبی و لەگەڵ زانكۆكانی میسر و ئەردەن و لوبنان پەیوەندی زانستیمان هەیە، هاوكات ئەندامین لە ئەنجومەنی نێودەوڵەتی زانكۆكان و تێیدا 150 زانكۆی جیهان ئەندامن.
خەبات: توێژینەوەكانتان چەند زیادیان كردووە لەوەتەی دامەزراون؟
د.كاوە شێروانی: بەهۆی ڕێزبەندی زانكۆكان، ڕێژەی توێژینەوەیان لە تەواوی زانكۆكانی كوردستان زۆر بەرز بۆتەوە، زانكۆی پۆلیتەكنیكی هەولێریش بەشێكە لەو زانكۆیانە و ئێستا بە سەدان توێژینەوەمان هەیە، چونكە ڕێژەی 35% ی هەڵسەنگاندن بۆ ڕێزبەندی نیشتیمانی زانكۆكان لەسەر توێژینەوەكانە، ئەمە وای كردووە هەوڵی زیاتر بدەین و توێژینەوەی زیاتر ئەنجام بدەین.
خەبات: چ هەوڵێكتان داوە توانای مامۆستاكانتان بەرز بكەنەوە؟
د.كاوە شێروانی: ساڵی ڕابردوو 2019، نزیكەی 100 مامۆستامان ناردۆتە دەرەوەی وڵات بۆ ڕاهێنان، زۆرینەی ئەو مامۆستایانەش سەرۆك بەشەكان بوون لەو 65 بەشەی لە تەواوی كۆلیژ و پەیمانگاكان هەمانە، بۆ توێژینەوەو ڕاهێنانی ECTS كە پرۆگرامێكی ئەوروپیەو ئێستا بە دەستكاریەوە دەمانەوێ لەگەڵ كوردستان بیگونجێنین، ئەگەر دەسەڵاتی دارایشیمان هەبێ، هەوڵ دەدەین ساڵانی داهاتوو تەواوی مامۆستایانی زانكۆكەمان بە قۆناغ بنێرینە دەرەوەی وڵات بۆ ڕاهێنان.
خەبات: لە بۆنە و یادە نەتەوەیی و نیشتیمانیەكان چاڵاكیتان هەیە، پلانی ئەوە چۆن دادەڕێژن؟
د.كاوە شێروانی: ئێمە پێمان وایە زانكۆ بەشێكە لە كۆمەڵگا و نابێ لە یەكتر جیا بكرێنەوە، بۆیە بە پێویستمان زانیوە لە بۆنەو یادەكان چاڵاكیمان هەبێ، لەگەڵ ئەوەی دەمانەوێ لە ڕێگەی ئەو چاڵاكیانە خۆمان بناسێنین وەك زانكۆیەك، چونكە هێشتا زانكۆكەمان نوێیەو پێویستی بە خۆ ناساندن، بۆ ئەمساڵیش وەك پار، لە ڕێو ڕەسمێكدا ڕێز لە 15 كەسایەتی هەولێر دەكەین لە بواری جیاواز كە خزمەتیان بە شارەكەیان كردووە.
خەبات: پلانتان بۆ بەرزكردنەوەی زیاتری ئاستی زانكۆكەتان چییە؟
د.كاوە شێروانی: خاڵە بەهێز و لاوازەكانی خۆمان دەست نیشان دەكەین و لەسەر خاڵە لاوازەكان كار دەكەین و ئەوانیش بەهێز دەكەین هەرچەند پێویستی زۆرمان لە ستاف و سەنتەری توێژینەوە هەیە، بەڵام دەستە وەستان نابین.
خەبات: چۆن گەیشتنە ئاستی گروپی B لە ڕیزبەندی نیشتیمانی زانكۆكان؟
د.كاوە شێروانی: ئێستا ڕێزبەندی نێودەوڵەتی و نێوخۆیی زانكۆكان بنەمای خۆیان هەیە و لەسەر بنەمای ئەوە ئێمە چاڵاكیەكانمان بەڕێوەدەبەین، ساڵانی پێشوو لە خوارەوەی گروپی D بووین، بە حۆشحاڵیەوە ئەمساڵ گەیشتینە پێشەوەی گروپی B لەگەڵ ئەوەی زانكۆكەمان نوێیە، خواستمانە ساڵانی داهاتوو پتر بچینە پێش.
خەبات: بۆ ئەمساڵ چەند كورسی خوێندنی باڵاتان تەرخان كردووە؟
د.كاوە شێروانی: ئەمساڵ لە تەواوی بەشەكانی كۆلیژ و پەیمانگاكان كورسی دبلۆمی ئەكادیمی و ماستەر و دكتۆرمان كردۆتەوە، هەست دەكەین پێویستی زیاترمان پێیانە، لەگەڵ ئەوەش پێمان باشە قوتابیانی كوردستان نەچنە دەرەوە بۆ خوێندن و پارەیەكی زۆری كوردستان بەهەدەر نەدەن، بە باشمان زانی دەرفەتی زیاتر بە قوتابیان بدەین بەو 200 كورسیەی لە دبلۆمی باڵای ئەكادیمی و ماستەر و دكتۆرا تەرخانمان كردووە.
پرۆفیسۆری یاریدەدەر د.كاوە شێروانی سەرۆكی زانكۆی پۆلیتەكنیكی هەولێر ڕایگەیاند: بەپێی فەرمانی وەزارەتی خوێندنی باڵا لە 15/1/2020 كە بە ژمارە 914 دەرچووە، كوڕ و كچ و ژنی شەهید و ئەنفال لەكاتی پرۆسەی پێشكەشكردن بۆ خوێندنی دبلۆمی باڵای ئەكادیمی یەك ساڵەو ماستەر و دكتۆرا بۆ ساڵی خوێندنی 2019-2020 لەو بەشانەی خوێندنی باڵا تێیاندا كراوەتەوە لە زانكۆكان، ئەگەر هاتوو پێشكەشكاران تەواوی مەرجەكانی پێشكەشكردنیان بەپێی ڕێنماییەكانی پەیوەندیدار تێدا بوو، هاوكات لە تاقیكردنەوەی توانستی زانستی دەرچوون، ئەوە بەبێ پێشبڕكێ وەردەگیرێن و كورسی خوێندنیان بۆ زیاد دەكرێت لە دەرەوەی پلانی پەسەند كراوی زانكۆكان كە لەلایەن وەزارەتی خوێندنی باڵا و توێژینەوەی زانستی لەو بەشانەی خوێندنی باڵایان تێدا كراوەتەوە.
سەرۆكی زانكۆی پۆلیتەكنیكی هەولێر ئاماژەی بەوە كرد كە زیاد كردنی كورسی خوێندنی باڵا بۆ كوڕ و كچ و ژنی شەهید و ئەنفال، كاریگەری لەسەر كورسیەكانی دیكە ناكات كە تەرخان كراون بۆ قوتابیان و پێشبڕكێی لەسەر دەكەن، بەڵكو لەگەڵ كورسیە تەرخانكراوەكانی بەشەكان، وەك ڕێزێك لە خوێنی شەهیدان و ئەنفالكراوان، كورسی كەسوكاری پلە یەكی شەهید و ئەنفالكراوان زیاد دەكرێت.
