خه‌بات: مەحمود شێرزاد:-
تا ئەو سەردەمە لەنێو كۆمەڵگای كوردە نەبووە بەكلتور خەڵكی سەرمایەدارو دەوڵەمەند، دەستپێشخەری بكەن لەئەنجامدانی پڕۆژەی مرۆڤدۆستانە و كاری خێرخوازی دا، ئەگەرچی لێرەو لەوێ كارو چالاكی چەند پرۆژەیەكی خێرخوازی هەن، بەڵام هێشتا لەئاستی پێویستدا نین.
ماڵی ئارام لەشاری هەولێر یەكێكە لەو پرۆژەو كارە مرۆییە دەگمەنانەی كە لەلایەن ئافرەتێكەوە سەرپەرشتی دەكرێت لەپێناو بەخشینی ئارامی بەو خاوەن پێداویستە تایبەتانەی كە لەسەر شەقام و شوێنە گشتیەكان ژیان بەسەر دەبەن.
نەرمین شەعبان رەزا بەرێوەبەرو سەرپەرشتیكاری ماڵی ئارام بۆ خاوەن پێداویستە تایبەتەكان، دوای سی و پێنج ساڵ كارو خزمەتكردن لەبەرێوەبەرایەتی بەساڵاچوان لەئێستادا خانەنشینە لەبارەی ئەم پرۆژەیە دەڵێت: بەهۆی ئەوەی لەرابردوودا ئەزموونێكی دەیان ساڵەم هەیە لەبواری خزمەتكردنی بەساڵاچوان، پاشان لەسەر داوای خۆم خانەنشین كرام وەك حەزو خولیاو ئاسوودەكردنی ویژدانم بیرم لە ماڵی ئارام كردەوە بۆ خزمەتكردنی بەشێك لەو خاوەن پێداویستییە تایبەتانەی كە لەسەر شۆستەو شەقامەكان دەژین، بەتەنها ئەو ئەركەم خستۆتە سەرشانم وەك پڕۆژەیەكی خێرخوازی و قازانج نەویست.
ناوبراو ئاماژەی بەوەكرد لەماڵی ئارام دا بێ جیاوازی رەگەزو ئایین بەچاوێكی مرۆڤانە سەیری كەسانی خاوەن پێداویستی تایبەت دەكرێت و بارودۆخیان لەبەرچاو دەگیرێت و رۆژانە ژەمەكانی خواردنیان بۆ دابین دەكرێت و لەگەڵ ئەوانەش پزیشكی پسپۆری خۆبەخش دێن سەردانیان دەكەن و لەباری تەندروستی و دەرونیان دەپشكنن.
سەبارەت بە یارمەتی و هاوكاریكردنی ماڵی ئارام لەلایەن حكوومەت و لایەنە پەیوەندیدارەكانەوە نەرمین شەعبان دەڵێت: تا ئێستا هیچ لایەنێك هاوكاری نەكردوم تەنها خەڵكی خێرخواز نەبێت بەردەوام هاوكاری پێشكەش بە ماڵی ئارام دەكەن و بەشێك لەداهاتی خۆم تەرخان كردووە بۆ ئەم پڕۆژەیە، دەمەوێت سوپاسی حكوومەتی هەرێمی كوردستان بكەم بەپێدانی پارچە زەویەك بۆ دروستكردنی باڵەخانەیەكی مۆدێرن و شایستە بۆ ئەو خاوەن پێداویستە تایبەتانەی ماڵی ئارام، چونكە شوێنی ئێستایان بچووكە و پێویستی بە فراوانكردن هەیە تاوەكو ژمارەی زیاتر لەخاوەن پێداویستە تایبەتە بێ سەرپەرشتیكاران وەربگرین، داواكارم لە حكومەت و وەزارەتی كارو كاروباری كۆمەڵایەتی هاوكاری و پشتگیریم بكەن و بێنە سەرخەت بۆ سەرخستنی پرۆژەكەم.
(ش.م ) دەرچووی بەشی پەرستیاریە یەكێكە لەو كچە خۆبەخشانەی كە لەماڵی ئارام ماوەی چوار ساڵە كاردەكات سەبارەت بەخزمەتكردن و هاوكاریكردنی ئەو خاوەن پێداویستە تایبەتانەی لەو ماڵەدا دەژین گووتی: بەرلەوەی بێم بۆ ماڵی ئارام لەشوێنی تر كارم كردوە بەڵام لەهیچ شوێنێك بەقەد ئەوەی وەك خۆبەخش لەم ماڵەدا ئەو ماوەیە كاردەكەم ئاسوودەنیم، لێرە هەست بەخۆشی و ئارامی دەروونی دەكەم و زۆربەی كاتەكانم بۆ خزمەتكردن و یارمەتی ئەو خاوەن پێداویستە تایبەتانە تەرخان كردووە سەڕەڕای ئەستەمی و ئەو ئەركە قورسەی سەرشانم لەگەڵیان دا، ئەوان وەكو كەس و كاری خۆم مامەڵەیان لەگەڵ دەكەم و لێرە هەست بەمرۆڤ بوونی خۆم دەكەم و مانای ژیانم بۆ دەركەوتووە.
(شكور كەریم)ی تەمەن چل و یەك ساڵ خاوەن پێداویستی تایبەتە، ماوەی سێ ساڵە لەماڵی ئارام ژیان گوزەر دەكات گوتی: من لەو ماڵەدا هەست بە خۆشی دەكەم و تا بڵێی بەختەوەرم لەگەڵ نەرمین خان و ئەو ستافەی لێرە كاردەكەن و مامەڵەیان وەكو دایك و باوك وایە بۆ ئێمە، رۆژانە سێ ژەم خواردن و پێداویستی ترمان بۆ دابین دەكرێت و تاكە كێشەش كە هەمان بێت ئەوەیە ئەو خانووە بچووكە و پێویستمان بەشوێنێكی فراوان و پاركی بچووك هەیە، لەگەڵ ئەوەشدا سوپاسی نەرمین خان دەكەم كە منی لەباوەش گرت و لەماڵی ئارام جێگەیەكی بۆ كردمەوە، چونكە من لەسەر شەقام و شۆستەكان دەژیام و سواڵم دەكرد.
ماڵی ئارام لەساڵی 2014 دامەزراوە حەوت كارمەند تیایدا خزمەت پێشكەش دەكەن و ژمارەی ئەو خاوەن پێداویستە تایبەتانەی تیایدا دەژین لە 32 كەس پێك دێت، ئەگەر لە داهاتوودا شوێنێكی فراوانیان بۆ فەراهەم بكرێت ئەوا لەو ژمارەیەی ئێستادا خاوەن پێداویستی زیاتر لەخۆ دەگرێت.
