خەبات: سلێمانی
بەمەبەستی پاككردنەوە و گێڕانەوەی گەشتیار بۆ هاوینەهەواری سەرچنار لە سلێمانی، بەبەشداری ژمارەیەك هونەرمەند، رۆشنبیر و كەسایەتی ناسراوی شارەكە هەڵمەتێكی پاككردنەوەی هاوینەهەواری سەرچنار بەرێوەچوو.
بەمەبەستی پاككردنەوە و گێڕانەوەی گەشتیار بۆ هاوینەهەواری سەرچنار لە سلێمانی، بەبەشداری ژمارەیەك هونەرمەند، رۆشنبیر و كەسایەتی ناسراوی شارەكە هەڵمەتێكی پاككردنەوەی هاوینەهەواری سەرچنار بەرێوەچوو.
هەڵمەتەكە لەلایەن گرووپی فۆتۆگرافەرانی گەڵاوە دەستیپێكرد و بە ئامادەبوونی پارێزگاری سلێمانی، هەڤاڵ ئەبوبەكر، چەندین كەسایەتی شار، هونەرمەند و رۆشنبیر لە هاوینەهەواری سەرچنار بەڕێوەچوو كە سەردەمانێك ئەو هاوینەهەوارە جمەی دەهات لە گەشتیار و ئێستا بەهۆی پشتگوێ خستنییەوە، كەمترین گەشتیار رووی تێدەكات.
سەرپەرشتیاری گرووپی فۆتۆگرافەرانی گەڵا، ناسح عەلی خەیات لە لێدوانێكدا ئاماژەی بەوەدا كە بەمەبەستی گێڕانەوەی قورسایی جارانی هاوینەهەوارەكە، بە بەشداری چەندین سیاستمەدار، كەسایەتی شار، رۆشنبیر و هونەرمەندان هەڵمەتێكی پاككردنەوەی هاوینەهەواری سەرچناریان دەستپێكردووە و چاوەڕوان دەكەن كە زۆرترین كەس بەشداربن تیایدا.
ناسح عەلی خەیات باس لەوە دەكات كە سەرچنار لەپێشوودا جێگەیەكی دڵگیری شاری سلێمانی بووە، زۆرترین گەشتیار روویان تێكردووە، بەڵام ئێستا بەهۆی پشتگوێخستنییەوە گەشتیاران زۆر بەكەمی لەناوەوە و دەرەوەی شارەكە رووی تێدەكەن، هەر بۆ ئەو مەبەستە داوایان لە پارێزگار و چەندین لایەنی تایبەت كردووە كە گرنگی بدەنەوە بە هاوینەهەوارەكە بۆ ئەو مەبەستەش سەندیكای هونەرمەندان بڕیاری داوە كە هەفتانە كۆنسێرتێكی گۆرانی بۆ هونەرمەندان ئەنجام بدات لە هاوینەهەوارەكە ئەگەر بێت و پارێزگاری سلێمانی سەكۆیەكیان بۆ دروست بكات لە ناوجەرگەی هاوینەهەواری سەرچناردا.
سەرۆكی گرووپی فۆتۆگرافەرانی گەڵا داوا دەكات كە هەفتانە پێشانگای شێوەكاری، فۆتۆگرافەری و كۆنسێرت لە هاوینەهەوارەكە رێكبخرێت، تاكو گەڕموگوڕی جاران بدرێتەوە بە سەرچنار.
پارێزگاری سلێمانی، هەڤاڵ ئەبوبەكر لە لێدوانێكدا بۆ رۆژنامەنووسان رایگەیاند كە ئەمڕۆ بۆ پشتگیریكردنی ئەو هەڵمەتە بەشدارن لەگەڵ خۆشەویستانیان كە بەدەستپێشخەری گرووپی فۆتۆگرافەرانی گەڵا بەڕێوەدەچێت و گوتی: لێرە دەستكراوە بە پاككردنەوەی هاوینەهەواری سەرچنار، لەسەر شەقامەكەوە، تاكو ئەمە ببێت بە دەستپێشخەریەك بۆ پاككردنەوەی شوێنەكانی تر، ئومێد دەكەم هەموو هاووڵاتییانی خۆشەویست، كۆمپانیاكان، دامودەزگاكانی دەوڵەت و بەتایبەت شارەوانی بەدەم ئەم جۆرە پرۆژانەوە بێن و هەماهەنگمان بن بۆ ئەوەی هەموو بەیەكەوە بتوانین ژینگەی سلێمانی كە ژینگەیەكی لەبارە و سەوزایی و پاككردنەوە و ریسایكلین لە ئاستێكی باشدایە، بتوانین باشتری بكەین، هەروەها پارێزراوتری بكەین.
بەڕێوەبەری كۆمپانیای گەشتیاریی جزیرەی نوح، دڵشاد عەبدولقادر كە بەمەبەستی پاككردنەوەی ناوچەكە و زیندوكردنەوەی هاوینەهەوارەكە بەشداری كردبوو ئاماژەی بەوە كرد كە هەرچەندە كەسانێكی كەم هاتوون بۆ بەشداری لە هەڵمەتەكەدا، بەڵام ئەمە دەستپێكێكی باشە و هیوای خواست كە بتوانن گرنگی زیاتر بە شوێنە گەشتیارییەكان بدەن تاكو بتوانن شەپۆلی گەشتیاری لە دەرەوە بۆ ناوخۆی سلێمانی رابكێشن.
