بەكر كەریم حەسەن
وەزیری پەروەردەی سعودی محەممەد ئەحمەد ئەل راشد 19955991 – 5002 دەلێ” لەدوای هەموو میللەتێكی مەزن و شكۆمەند پەروەردەیەكی مەزن و شكۆمەند هەیە، وە لە دوای هەموو پەروەردەیەكی مەزن و شكۆمەند مامۆستای نایاب و جیاواز هەیە”.
گومانی تێدانییە كە مامۆستا رۆڵی سەرەكی و یەكلاكەرەوەی هەیە لە كۆی پرۆسەی پەروەردە و فێركردن، لەو ووتارەدا نامەوێ باسی مافی مامۆستا بكەم، تەنها تیشك دەخەمە سەر رۆڵ و ئەركی مامۆستا لە كۆی پرۆسەی پەروەردە و فێركردن. مامۆستا كۆمەلێ رۆڵی جیاوازی هەیە هەموویان تەواوكەری یەكترن، لە هەموویان گرنگتر رۆڵ و ئەركی مامۆستا بەرامبەر قوتابییەكانی، بەرپرسیاریەتی و ئەركی مامۆستا بەرامبەر بە قوتابییەكانی سنوردار نییە و بێ كۆتاییە، ئەوە مامۆستایە قوتابی پەروەردە دەكات لەسەر ئادكارە جوانەكان و رواندن و چاندنی هەستی نیشتمانپەروەری و خۆشەویستی بۆ خاك و مرۆڤ و نەتەوە و ووڵات لە ناخی قوتابی، هەردەم مامۆستا نموونەی پێشەنگ و پێشڕەوی جوانە بۆ قوتابییەكانی لە كۆی هەڵس وكەوت و رەفتار و گوفتار و كردار و دڵسۆزی واتە هاندەری قوتابییەكانیەتی بۆ كاری باش و بەسوود و قازانج بۆكۆمەڵگە، لە هەمان كاتدا رێ نیشاندەر و ئامۆژگاركارێكی بەردەوامە بۆ ئاراستەكردن و رێنمایی كردنی قوتابییەكانی بەرەوكاری باش و بەسوود، لە هەمان كاتدا زانین و فێركردنی قوتابییەكان لە سەر بابەتە پسپۆڕییەكان و هاندانیان تاوەكو لە داهاتوودا ببنە ئەندامێكی كارا و شیاو بۆ ووڵات و كۆمەڵگە، كە رەنگدانەوەی دڵسۆزی و دادپەروەری مامۆستاكە نیشان دەدات لە كۆی هەڵس وكەوتی لە قوتابخانە دا لە ئەنجامی رواندن و بلاوكردن و ووشیاری نیشتمانی لە ناخی قوتابیان كە لە ئەنجامدا تاكێكی تۆكمە و بەهێز دروست دەبێت وەكو شاخ بۆ نیشتمان لە هەموو روویەكەوە، ئەوەیە بەرهەمی مامۆستای دڵسۆز و نایاب كە هەردەم هەوڵ دەدات ئەمانەتی كۆمەڵگە بپارێزێ كە قوتابییە و چەق و ناوەندی پرۆسەی پەروەردە و فێركردنە.
ئەلێرەوە رۆڵ و ئەركی مامۆستا بەرامبەر قوتابییەكان خاڵی وەرچەرخانی تێگەیاندن و پێگەیاندنی كۆمەڵگەیە، چونكە مامۆستا دەتوانێ تەكان بدات بە پرۆسەی پەروەردە، ئەو مامۆستایانەی كە نموونەیی و پێشەنگن لە هەموو روویەكەوە كۆمەلێ سیفات و ئادكاری جوان و سەرنج راكێشی هەیە، پێویستە مامۆستایان خۆیان پەری بەردەوامی پێ بدەن لە دڵسۆزی و راستگۆیی و دادپەروەری پابەندبوون بە كات و ئامادەیی بەردەوام و پاراستنی ئەمانەت و ووشیاری و بە ئاگایی لە كۆی پرۆسەكە لە ناو قوتابخانە و دەرەوەی قوتابخانە و خاوەنی هەڵگری بەها كۆمەڵایەتی و پەروەردەییەكان بێت. لەوەش گرنگتر پێویستە لەمەو دوا لەلایەن وەزارەتی پەروەردە و بەرێوەبەرایەتی گشتی پەروەردەی پارێزگاكان و بەهاوكاری و بەهەماهەنگی لەگەڵ رێكخراوە پەروەردەییە نێودەوڵەتییەكان، ساڵانە بە بەردەوامی جۆرەها خولی جیاواز بۆ سەرجەم مامۆستایان بكرێتەوە، هیچ مامۆستایەك نەچێتە پۆل و قوتابخانە گەر بەشداری لە خولە جیاوازەكانی پەروەردە و فێركردن نەكردبێت بە مامۆستایانی گرێبەست و وانەبێژەكانیشەوە، چونكە لە كۆتاییدا لە پۆل و قوتابخانەكانن و بۆیە بەشداری كردن لە خولە جۆراوجۆرەكانی پرۆسەی پەروەردە و فێركردن مەرجی سەرەكی بێت بۆمامۆستایان بۆ ئەوەی بتوانرێ رۆڵ و ئەركی پیرۆزی مامۆستا بپارێزرێت.
❊ بەرێوەبەری گشتی چاڵاكی وەرزش و هونەر
