خه‌بات: بەرهەم شێخ عزەدین:-
یوسف عەبدولڕەحمان ناسراو بە (یوسف یوسفی) لە ساڵی 1974 لە دایكبووە هەڵگری دوو بڕوانامەی هونەرییە، لەساڵی 1996 چۆتە پەیمانگای هونەرە جوانەكانی هەولێر لقی نواندنی تەواوكردووە لە ساڵی 2001 بڕوانامەی دبلۆمی لە شانۆ بە دەستهێناوە لەهەمان ساڵ دامەزراوە، وەكو مامۆستا لە سنووری پەروەردی شەقڵاوە ، لە ساڵی 2007 دوای كردنەوەی بەشی شانۆ لە ناو كۆلیژی هونەرە جوانەكان جارێكی تر دەستی بە خوێندن كردۆتەوە كولیژی بە پلەی زۆرباشە تەواو كردووە، بۆتە خاوەنی بڕوانامەی بەكالۆریۆس لە بواری نواندن و دەرهێنان ئێستاش وەكو مامۆستا لە كۆلێژی هونەرە جوانەكان دەوامدەكات و بەردەوامە لە سەر كاری هونەریی، خاوەنی زیاتر لە بیست و پێنچ كاری شانۆیی و دوو كورتە فلیمە، كارەكانیشی جیاوازن هەندێكیانی دەقی نووسەرانی جیهانین و هەندێكیشان ناوخۆن هەندێكیشان نووسەرانی عەرەبین شانۆگەریەكانیش بۆ گەورەكان، شانۆی هۆڵ و شەقامی هەیە لە بواری شانۆی منداڵاندا چەندین كاری كردووە، توانیویەتی خەڵاتی باشترین دەرهێنەر بەدەست بهێنێت لە سەر ئاستی عێراق. ئەمانە دەستپێكی وتەكانی دەرهێنەرو شانۆكار (یوسف یوسفی) بوو كە بۆ (خەبات) كردی، تەواوی بۆچوونەكانی لەم دیمانەیەدا بخوێنەرەوە:
دەرهێنەری باشمان هەیە
دەربارەی ئاستی دەرهێنەرانی كورد بە بەراوورد لەگەڵ دەرهێنەرانی بیانی یوسف یوسفی گوتی: دەتوانم بڵێم بە دڵنیاییەوە دەرهێنەرانی بیانی باشترن، بەڵام ئەوە بەو مانایە نایە كەوا ئەوان لە ئێمە زیرەكترن چونكە ئێمەش دەرهێنەری باشمان هەیە لێرەو لەوێ، بەڵام لەوانەیە ئەو كەشە لەبارەی بۆ ئەوان ڕەخساوە بۆ ئێمەمانان نەڕەخسا بێت چ لەباری هەبوونی ئەكتەری باش و نووسەری باش و هۆڵی باش و ژیانی باش.. هیتر. نەبوونی سەرچاوەی باش بۆ خۆ ڕۆشنبیركردن لە سەر ئەو دەقەی كەوا دەرهێنەرانی ئێمە كاری لەسەر دەكەن بۆیە ناتوانین دەرهێنەری كورد بەراوورد بكەین بە دەرهێنەرێكی بیانی چونكە دونیای ئێمەو ئەوان زۆر جیاوازە لەگەڵ یەكتری.
یەك هۆڵی شانۆییمان نییە
دواتر بەمجۆرە باسی هۆكارەكانی پشت لاوازی كارە خۆماڵییەكان كردو گوتی: ئەوانەی تۆ باسی دەكەی هەر هەموویان هۆكارن ئەگەر تۆ نووسەری باشت هەبێت ئەوە دڵنیابە ئەكتەری باشت دەبێ لەگەڵ دەرهێنەری باش، بەڵام ئەگەر هۆڵت نەبێت و ئامێری تەكنەلۆژیای باشت نەبێت چۆن دەتوانی كارێكی باش بەرهەم بهێنیت ئەگەر سەیری پایتەخی خۆمان بكەین چەندان هۆڵی ئاهەنگگیڕان و پرسەی تێدایە، بەڵام یەك هۆڵی شانۆییمان نییە ئەگەر ئەوانەش نەبوو واتا مەرگی شانۆ بوونی هەیە لەم شارەدا.
دەربارەی ئایا دەرهێنەرانی كورد توانیویانە بینەر بەلای بەرهەمی خۆماڵیا ڕابكێشن ؟ دەرهێنەر یوسف یوسفی گوتی: دەتوانین بە شێوەیەكی تر ئەم پرسارە بكرێت بڵێن ئایا دەرهێنەرانی كورد توانیویانە شانۆ بە بینەری كورد بناسێنن؟ نەك بەرهەمەكانیان دەتوانم بڵێم لە سەردەمی بەعسدا كاری باشیان كردووە بۆ سەرنجڕاكێشانی بینەر بۆ ناو هۆڵەكان، بەڵام ئەویش وەكو پێویست نەبووە لە غیابی تی ڤی و سەتەلایت هەموو تەكنەلۆژیاكانی سەردەم لێرەو لەوێ هەندێك شت كراوە، بەڵام بۆ بینەری سادە نەبووە بەڵكو شانۆكاران تەنها خۆیان بینەری كارە شانۆیەكانی خۆیانن بۆیە دەتوانم بڵێم نەخێر نەیانتوانیووە، بۆ بەرهەمی خۆماڵی رایانبكێشن.
هیچ بابەتێكی باشمان نیە
دەربارەی تۆرانی بینەر لە درامای كوردی ئەو مامۆستای زانكۆیە بۆچوونەكانی وا خستە ڕوو: لەبەرئەوەی درامای كوردی ناتوانێت شان لە شانی دراماكانی بیانی بدات هەم لە ڕووی كوالیتی و هەم لە رووی بیرۆكەو نواندن، ئەگەر تەماشای درامایەكی بیانی بكەین دەبینین جوانترین جل و بەرگ و مێك ئاپ و جوانترین ئەكتەرو جوانترین ئێكسسوارو دیكۆری هەیە، لە ڕووی رەنگ و دەنگی باشترینەكان بەكار دەهێنن بە سەرفكردنی پارەیەكی زۆر لەم درامایە كاتێكیش تەواو دەبێت دەتوانی داهاتێكی زۆر لەوە بەدەستبێنێ، بەڵام ئەگەر تەماشای درامای كوردی بكەین ئەوانەی هیچی تێدانیە بەڵكو بە پێچەوانەی ئەوە جا بەڕای ئێوە بینەری كورد تەماشای كامیان دەكات، هیچ بابەتێكی باشمان نییە یان بڵێین نووسەری باشمان نییە لە بواری دراما ئەوانەی هەشە كەموكوڕی زۆر هەیە بۆیە بینەری ئێمە توانای ئەوەی نییە لە بەرامبەری كاری خراپ یان ناكامڵ دانیشێت كەوا لە هەستی بینین و بیستنی بدات.
زەرەری زۆریان بە كۆمەڵگای كوردی گەیاندووە
یوسف یوسفی دەرهێنەر دەربارەی فلیمی دۆبلاژ كراوی بیانی بۆچوونی وابوو: ئەم فلیمانە زۆربەیان زەرەری زۆریان بە كۆمەڵگای كوردی گەیاندووە، چونكە زۆربەی بابەتی ئەو فلیمانە دوورە لە كۆمەڵگای كوردی دواتر هەندێكیان وشەی زۆر ناشیرینی تێدا بەكار دەهێنن كەوا هیچ پەیوەندی بەم فلیمەوە نییە، بە كۆمەڵێك هەڵەوە وەرگیڕانی بۆ دەكەن، دۆبلێرەكانیش زۆر جاران بە ئارەزووی خۆیان حیوارەكان دەڵێن، دەبێ وەزارەتی ڕۆشنبیری سانسۆری تەواو لەسەر ئەو جۆرە فلیمانە دابنێت تاكو بزانین كام فیلم شایانی ئەوەیە نیشانی بینەری كورد بدرێت.
زۆر قورسە بتوانین ببینە خاوەن درامای خۆمان
دەربارەی پرسیاری دەبێت چی بكرێت هەتا بینەرو درامای كوردی ئاشتبكرێنەوە؟
یوسف یوسفی بۆچوونی وابوو:جارێ پێش هەموو شتێك ئێمە درامامان زۆر كەمە، دەتوانم بڵێم بە پەنچەی دەست دەژمێردرێن بۆیە دەبێ بڵێین چیبكەین تاكو ببینە خاوەن درامای كوردی، لە بواری دراماو شانۆ من دەڵێم زۆر قورسە بتوانین ببینە خاوەن درامای خۆمان هەر وەكو لە پرسیاری پێشوودا ئاماژەم پێكرد ئێمە نووسەری باشمان نییە چۆن دەتوانین درامای باشمان هەبێت؟ دواتر بە هۆی تەكنەلۆژیای سەردەم ئێستا دونیا گوندێكی بچووكە ئەگەر تۆ نەتوانی كارێكی باش بكەیت ئەوە بینەر ناتوانێ تەماشای درامای كوردی بكات چونكە ئەو بینەرە دەتوانێ درامای زۆر جوانتر ببینێ بەڕای من كورد زیاتر كاری كورت كورت بكات چ لە بواری فیلم چ لە بواری دراما نەك درامای چەند حەڵقەیی تاكو هێواش هێواش بینەر ڕادەكێشێت بۆ لای خۆی ، جا دەتوانین كاری دراما و فیلم و شانۆ بكات بۆ بینەری خۆی.
هیچیان گونجاونین بۆ نمایشی شانۆ
دەربارەی نەبوونی هۆڵی شانۆیی لە پایتەخت ئەو مامۆستای زانكۆیە وایگوت: بە ڕای من هیچ هۆڵێكی گونجاومان نییە بۆ شانۆ لە شاری هەولێری پایتەخت ئەو چەند هۆڵەی هەشە هیچیان گونجاونین بۆ نمایشی شانۆ ، من پێشنیار دەكەم بۆ حكومەتی هەرێمی كوردستان با چیتر پارە بۆ فیستیڤاڵەكان سەرف نەكات، با بیر لەدروستكردنی هۆڵێكی شانۆیی بكاتەوە بۆ شانۆكاران.
وەكو پێویست كادیری باشیان نییە
دەربارەی ڕۆڵی كۆلێژو پەیمانگاكان لە سەر هونەر بە گشتی یوسف یوسفی گوتی: بەڵێ كاریگەرییان هەبووە چونكە زۆربەی ئەوانەی ئێستا كاری هونەری دەكەن دەرچووی ئەم دوو شوێنەن، بەڵام ئەم دوو شوێنە وەكو پێویست كادیری باشیان نییە كەوا بتوانن هونەر زیاتر بەرەو پێشەوە ببەن.
